Книга - Даниялдың ғажайып әлемі

Даниялдың ғажайып әлемі
Джан Амании


Психолог Джан Аманиидің өзінің cүйікті ұлы Даниялға арнап шығарған «Даниялдың ғажайып әлемі» атты ертегі кітабы – отандық жас жазушының тырнақалды әдеби шығармасы. Қазақстандық балалардың ұғымына түсінікті, жанына жақын келетін заманауи отандық авторлар жазған осындай ертегілердің жетіспейтіндігі сөзсіз. Мұндай ертегілер бүлдіршіндердің бойында жақын-жуықтарына, туған жеріне деген сүйіспеншілік пен құрмет сезімін тәрбиелейді. Кітап отбасылық оқуға арналған.






Даниялдың ғажайып әлемі.














Дүниеде Даниял есімді кішкентай бала бар. Даниялды әке-шешесі, ата-әжесі, аға-тәтелері, барлығы ерекше жақсы көреді. Даниялдың сиқырлы сандар туралы әңгімелерін көрші көшенің балалары да келіп тыңдайды. Себебі Даниял көзін жұмса болды, сол заматта құлағына «Бір-екі-үш – сиқырлы күш!» деген сөздер естіліп, ол ғажайып ертегі әлеміне тап болып, қызықты жайттарды басынан кешетін. Даниял сол балалардың арасынан көздері терең мұңға толы, аса көп күле бермейтін Ай деген сүйкімді қызды байқайды. Ол үнемі жалғыз келіп, Даниялды ойлы, жабырқау жүзбен тыңдап, елеусіз кетіп қалып жүреді. Даниял Айды қанша көңілдендіргісі келсе де, еш нәтиже шықпайды. Ақырында ол «Айды өзінің Ертегі әлеміне ертіп кетемін!» деп шешеді.






Тоңазытқыштағы қала







Сол күні Даниял достарымен ұзақ ойнап, үйге кеш келді. Қатты шаршап, қарны да ашты. Анасының кешкі асы дайын болғанша, жұмсақ орындыққа жайғасып, жоспарын қалай жүзеге асыру туралы ойлады. Анасының «Ниетің таза болса, тілегің міндетті түрде орындалады» деген сөздері есіне түскені сол еді, әлдебір дауыс «Бір-екі-үш – сиқырлы күш!» дегендей болды.

…Даниял анадайдан жарқыраған үлкен тоңазытқышты көрді. Оның жарқырап көз тартқаны соншалық, Даниял есігін қалай ашқанын байқамай да қалды.













О, керемет! Ішінде нағыз ғажайып көрініс: түрлі-түсті тәтті мұзкәмпиттер төселген жол тура ертегілер қаласына дейін созылып жатыр. Қандай тамаша! Шыр айналған әткеншектер! Жарқыраған шарлар мен ойыншықтар! Көңілді күлкі сыйлаған кейіпкерлер! Шаттана жүгірген балақайларға жарқырай нұрын шашқан алтын күн! Кенеттен Даниял жан-жағына жалтақтап қарап тұрған Айды көріп қалды. Қуанышы қойнына сыймаған Даниял қыздың қасына жетіп келді. Екеуі қол ұстасып, таңғажайып тәтті сүрлеумен шапшаң жүгіріп өтіп, көзді ашып-жұмғанша қалаға жетті.








Осы кезде қайдан екені белгісіз, алдынан дүкен сөресі пайды болды, бірақ дүкеннің өзі көрінбейді. Сөренің жанындағы күлімсіреген сатушы балаларды көре сала әндете жөнелді:

Батыл келіп, балалар!
Бәрі тегін, таңдап ал.
Бәліштер мен тоқаштар,
Шырын, кола, фанта бар.
Балмұздақ, кәмпит сан түрін,
Қалағанша ал бүгін!








Айдың сәл күлімсірегенін байқап қалған Даниял сатушыға:

– Шоколад қосылған шұжық беріңізші! – деді.

Сатушы ризашылықпен басын изеді:

– Тамаша! Мүмкін, тағы бірдеңе қаларсың?

– Иә, балмұздақ қосылған түшпара, – деді де, Даниял Айға қарап:

– Сен не қалайсың? – деді.

– Мен… гамбургер,.. бүлдірген қосылған гамбургер жегім келеді, – дей сала, өзінің тапқырлығына масаттанған Ай Даниялға қарап жымиды.

Даниялдың жүзі бақыттан бал-бұл жайнады.








Сатушы түк те таң қалмастан тәтті нан-нан жасалған қоңырауды қақты. Сол-ақ екен, ортаға дөңгелектері бар үлкен қазан келе қалды. Қазанның ішінен шұжықтан алқа таққан аспазшы мен балмұздақтан жасалған қалпағы бар он көмекші атып шықты. Тапсырыс қабылданды.

Бес минут өтпестен дүкен сөресінде ыстық шоколадқа малынған шұжықтар, бүлдірген қосылған гамбургер, бірер сәттен кейін балмұздақты түшпара да пайда болады. Ай осындай ғажайыптарды көргеніне мәз-мейрам болды.














Осы кезде Даниял сұраулы жүзбен:

– Сіздерде тауық еті қосылған мәнпаси бар ма? – деді.

Аспазшы көмекшілерімен сыбырласа кетті. Бес минуттан кейін түрлі-түсті ғажайып кәмпиттер де пайда болды. Даниял кәмпиттің бесеуін бірден аузына, біразын өз қалтасына, басым бөлігін Айдың қалталарына бөліп салды.











Кенет анасының «Даниял, Даниял» деп шақырған дауысы шығады. Ояна салып, анасына тоңазытқыштағы сиқырлы қала мен Ай туралы айтып беруге асығып, жүгіре жөнеледі.

Даниялдың әңгімесін қызыға тыңдаған анасы күлімсіреп:

– Әй, ертегішім менің, бар, ас үйге жүгір, сені бір қыз бала күтіп отыр. Бұны ести сала «Мүмкін, ол – Ай шығар?» деп, Даниял ас үйге асықты.

Дастархан басында Айдың әкесіне әлденені көтеріңкі көңілмен әңгімелеп отырғанын көрді.

Үстел үстіндегі кәмпит салғышта сиқырлы қаланың ғажап кәмпиттері толып тұр. Даниял өзін сондай бақытты сезінді. Себебі, оның бар арманы орындалды, ең бастысы – Ай көңілді еді.










Алып Жеміс-Жидектер ғаламшары







Ол күні Даниял достарымен өзенде шомылды. Олар арлы-берлі жүзіп, тоқтаусыз сүңгіп, биіктен секіріп, күні бойы судан шықпады… Тамағына суық тиіп, ауырып қалған Ай ғана достарымен бірге бара алмай қалды.

Әбден шаршаған Даниял үйге келіп, жұмсақ төсегіне жайғасып, көзін жұмды.

Тылсым сырға толы «Бір-екі-үш – сиқырлы күш!» деген сөздерді естігені сол еді, Даниял ылғи жарқыраған аспаптарға толы бір бөлменің ішіне тап болды. Бұл не, ол қай жерде – ешнәрсе де белгісіз.








Үлкен басқару құрылғысында жанып тұрған қызыл түймешікті көріп, баса қойып еді, алдынан ғаламшар жүйесінің картасы шыға келді. Сонда ғана Даниял өзінің ғарыш кемесінің ішінде екенін білді. Ғаламшарлардың атауын ол «Ғаламшар ойынынан» жатқа білетін. Даниял басқару тетігін өзіне қарай қозғалтты. Таңғаларлық оқиға басталды да кетті, кеме баланың дегеніне көніп, қалықтап ұша жөнелді.

Қалың әйнекті терезенің сыртындағы көрініске Даниял сүйсіне қарап, тамашалай бастады: оңынан да, солынан да түрлі-түсті оттар көрінеді, алдында тылсым сыр түйген түнгі аспан, көздің жауын алған жұлдыздар. Жұлдыздар арасымен біраз ұшқаннан кейін Даниял ғарыш картасын ашып қарап, өзінің Алпауыт Жемістер мен Көкөністер ғаламшарына жақындап қалғанын байқайды.








Ғаламшарға көзді ашып-жұмғанша жеткен Даниял жылтыр тұтас киім киген ергежейлі адамдарды көрді. Әлгі ергежейлілер тікұшаққа мініп алып, биіктен көкөністер мен жемістерді суарып жүр екен.

Қарбыздарының көлемі машинамен бірдей. Бір топ адам бір қарбызды тікұшақ алаңына әрең жеткізіп, үлкен торға салып, ұшаққа байлап қойды. Даниял тікұшқыштарды тиісті орындарына бағыттап, жалау ұстап тұрған адамды байқады.








Алыстағы тау-тау боп үйілген қарбыздарға назары ауды. Даниял дүрбіні алып, бірнеше адамның көтергіш кранға бекітілген пышақпен бір қарбызды кесіп жатқанын көрді. Міне, қызық, қарбыздың іші сары, ал дәндері қызыл.





Конец ознакомительного фрагмента. Получить полную версию книги.


Текст предоставлен ООО «ЛитРес».

Прочитайте эту книгу целиком, купив полную легальную версию (https://www.litres.ru/pages/biblio_book/?art=64735831) на ЛитРес.

Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.