Книга - Арсеман, монь арсеман…

Арсеман, монь арсеман…
Нуянь Видяз


Это сборник произведений разного жанра: повесть, рассказы, миниатюры о природе (на эрзянском языке), публицистические статьи и заметки (на русском языке).






Кавтосто вейке



Кавто ёвтнемасто келей ёвтнема

Медаленть кавто ёнксонзо

Валмеревкс




Вант юрс



Васенце пелькс




Вастовома


Ардан ошсто. Бусонь меельце лотксема таркантень пачкодезь, ванан, ахоли кедьсэнзэ, энялды озавтомс сэрьс аволь сэрей, шожда, ёлганя рунго ава. Оршазь, вановтом вакска эзь юта, кизэкс. Лангсонзо нурька ожа сэняжа тюс, мерть, пачк невтиця ковтыне ды нурькине, кумажадо верьга, чопода-сэнь понкст. «Сэнь нимилявне…» – ювк ютась пряван.

Урныгайсэнть ськамон, тарка уле. Мекс а саемс? Лоткинь. Венстия вить кедем ды келес панжия кенкшенть. «Озак!» – меринь те шкастонть эсь пачкан, авастонть сельмень апак сае. Васня «пассажиркам» лашк путызе чевте озамо таркантень эседензэ стака, эрьва мезде пештязь коцтонь юдманзо. Мейле венстизе озамо тарканть икеле кундамонтень вить кедензэ ды керш пильгензэ кепедизе урныгаентень. Кепедизе-саизе юдманзо ды лоцьк озамсто путызе цитниця штадо кумажанзо лангс.

«Яла кись истямо кувакакс а карми марявомо, яла аволь ськамон… – кивчк ютась пряван мелесь. – Мекс а озавтомс ломаненть?»

– Ды ков усксамак? – мизолдозь варштась чамазон ды пшкадсь тень вакссон ардыцясь, гайги вайгельсэнзэ пештизе урныгаенть потмонзо, матрызе ювк шкас моторонть кувака моронзо.

– Ков мерят… – паро ёжосо меринь каршонзо теке лувсонть, верьга вайгельть, кистэнть вановтом апак сае, монсь арсезевинь: «Тонь марто, ванан, дугай, а матедеват ветямкаеть вельксс, набоят, неяват, аволь тухмужатнестэ, аволь айшатнестэяк… Куш эрямосонть мезть а эрсить! Лия «сэтьмежасонть» зняро кежть-апарот кирдевкшнить, а онкставить мейсэяк».

Ардтано. Кись валаня, келей, цивтёрды чипаенть каршо, теке парсте шлязь-нардазь сулика. Моторось урны, прок псака лембине-чевтине таркасонзо стакачинь апак маря. Вайгельпе, омбоце, колмоце… Лови сынст выжнэзь пувиця вармась. Вальматнень тона ёнга сравтневсть ожо тюссост оймень кецневтиця товсюронь паксятне. Чиить ваксканок, мерят кияк тандавтынзе, пиже чама килейтне, пичинетне, калькуракштне… Таркань-таркань полавтнить сынст дюм пиже кукурузань гектартнэ. Юты тарго, мельганзо омбоце, ды теевить лангсост азорокс комбайнат, ушодыть урядамо тундонь-кизэнь перть, вейсэ Чипазонть марто, таштазенть.

«Кить, кить, кить… Зяро эйстэст янсто саезь ведь потмова, ведь ланга ды коштка сравневицятнес? Кияк ёвтасы? А мода ланга чиицятнеде ледстямс стувтыть? Зяро ломанесь эскели, содавлия, эрямопингензэ перть эрьва кодат? Лововить? Текенекс, кие-кодат? Вейкесь янсто а лисни, омбоцесь пель эрямопинге ардтни машинасо, поездсэ, колмоцесь цюхаи пельтнеде верьга. Ней ламот арсезевсть ялго якамодонть. Икелень, лишмень шкатнень коряс, кадызе те «тевенть», ловт, каназкадсь, секень вант, сядоксть. Ков те вети, кевкстнемс а мезть. Кшнинь, кевень, модань… китнеде башка, улеть кить пайстомочинь, кенярксонь, салыцянь…

Кить, кить, кить…»

Аламос аштезь мария икеле ёвтазь кевкстеманть:

– Ды ков усксамак? – сертизе ютксонок каштмолеманть, лип варштась лангозон ды кевкстимим омбоцеде, черензэ вить кедьсэнзэ витнезь, содавиксэкс теевезь вайгелесь.

– А содан. Ков теть эряви, ков капшат? Мон, теня, – кудов, Пичелев, – аволь сеске, нурька каштто мейле ёвтыя тарканть лемензэ, ков кирдян ки. «Кевкстни, кевкстни, паряк, – арсезевинь, – тензэ ёвтамат лемем ды тетялемемгак? Теке кадовсь…» Теке басом визькс саимим те чаво, аволь превей мельденть, янксезевинь. Мезень пежеть тейсь – пшкадсь омбоцеде?

– Вай, ды те монь чачома велем! Монгак тов… Яла мерить, паз арась. Эно кие тонь кучинзить? – кецнезь ёвтызе мелензэ асодавикс киялгам, вайгелезэ седеяк гайгезевсь, велявтызе мизолдыця чаманзо монь ёнов, варштась икельганзо чииця кинь коцтонть лангс ды поладынзе валонзо: – Лисни, минь ве велень. Истя? Тон кинь?

– Теня, кода теть меремс, мон эрян Пичелесэ аумок, омбовелень мон, киньгак парсте а содан, – моторонть урноманзо изнязь, икелев, кинть лангс, ванозь ды ветямкаенть тей-тов черьказь, пижнезь топавтыя кевкстницянть мелензэ. – Ве велень, мерема, эрицят, ансяк аволь ве велень ломанть.

Велькссэнь-икелень чамаваномастонть понгони вановтозон асодавикс аванть чамазо. Аволь келей, а мерят – ваканшка, седеяк – пешксе ковшка, седе курок – теине. Черензэ валдот. Коня верьга вейкетьстэ керязь. Кадык а тарказонзо, видькстан: а вечкан раужо черть-сельмть. Мекс? Содык азё… А содан ды сюрту! Кирксала чаманзо вечкевиксэкс теи эль-эль редявикс будолмине марто виде судозо. Сельмензэ – менельчелькст, сэнть-сэнть. Варшты лангозот – солат. Паро – преветь а човоргадыть. Мизолксозо – чуросто кинь аватнестэ истямо неят.

«Зяро, содамс, иензэ? – токимим мель, велькссэнь чамаваномантень салава варштнезь. – Неяви, байтяк, ведьгеменьшка улить, апак кавтолдо. Паряк, эскельдяськак трокскаст. Ялатеке, кадык таркань-таркань черькстнизь чамакиськензэ сормсевкстнэ, срадыть сынь седеяк неявиксстэ сельмеужотнестэ, икелень вечкевиксчизэ эзь ола, нейгак вельмевтни вечкемань толкельнеть. Кемеви, нейгак цёратне сельмень конязь ваксканзо а ютнить. А сонсь, умок уш аволь од авась, ютни? Ну, те уш лия таркань кортамо, теде соды ансяк сонсь… Ды эрьвась эйстэнек – эседензэ».

Чатьмонезь, кистэнть вановтом апак сайне, ветямкаенть тей-тов велявтнезь, чаравтынь колгансон мельпетнень: велень стакачитнеде, масторсонть теевикс зыянтнэде, певтеме кенгелематнеде ды… аватнеде, нурька понкскесэ, валаня кумажа авадонтькак. Эзинь кирдеве, велявтыя прям ёнонзо ды венстия келем, пшкадинь тензэ:

– Леметь а ёвтасак? – полашт варштынь икелень чамаваномантень.

– Мекс а ёвтамс? Ёвтаса. Наталия, Наташа, велесэ весе тень мерить велекс – Наталь, – ёвк чиремтизе прянзо ды, лангозон эльканясто ванозь, ёвтызе истя сеедьстэ ней вастневиця, куш кодамо кельсэ мазый лементь. Сеске теде мейле педявтызе вановтонзо велев тердиця-капшиця кинтень. Тень пингстэ кепедизе вить штапо кедензэ кенкшенть велькссэ кундамонтень. «Неяви, цёрась аволь кольнягайтнеде, аволь кодамояк альгач. Пелемс эйстэдензэ а мезть… – арсезевсь авась ускицядонзо. – Понгонинь весть, куломазон а стувтови…»

– Леметь, мерема, ютавтови эрзянь кельс кода «тиринем». Кодамо мазый! Кодамо покш зэме эйсэнзэ! – эзинь кардаво содамс вакссон аштицядонть, таго кевкстия, куш тунь, торох эзинь сода, мезекс те тень эряви. – А кудолеменк? Велесэ, содат, кудолемесь – фамилия. Кинь улят?

– Вай, тон уш сюлынень пес бажат содамс, – марявсь, эзь вечкеве Натальнень меельце кевкстемам, куш мезеяк берянь, монь койсэ, эйсэнзэ арасель. Аламос чатьмонезь, поладызе: – Мон – Черькаень. Марсить истятнэде? – чатьмонезевсь элесэнзэ кирдевикс юдманзо седе ёнсто аравтомсто. – Черькаень Лиза, Черькаень Шура, Черькаень Нюра… Киньгак сода эйстэст?

– Конат эрить Пичепесэ? Марсинь, кода эно… Аламонь велесэнть содан, сындест – марсинь. Минь, лисни, аволь васоло вейкеденек-вейкеденек эрятано, – ёвтыя мелем ды кекшнезь варштынь икелень-велькссэнь чамаваномантень. «Ули-арась мирдезэ? Кода арась, истямо мазый, вечкевикс – ды арась?» – бизмолк ютась пряудемган апак терде мелесь.

– Мон, маряви, пелензэ «биографиям» ёвтния. Тон – ве валгак, – мерсь ардыця ялгам ды лепштинзе якстерестэ эль артозь човине турванзо, вальмаванть сыреждиця товсюронь паксятнень лангс ванозь. Саизе кедензэ вере кундамостонть ды путызе юдманзо лангс. Мезть те лип шкастонть велясть пряудемсэнзэ, кодат мельть эвтсть-кашкасть, теде содась гайги вайгель верка авась ансяк сонсь.

– Теня, монь вельсоветэнь лемем Алексей. Алексей Андреевич. Кода? Туи? Мерить аламнеде лиякс – Алё, лиясто Лёня, – паро мельсэ, та-кода талнозь, прок од цёра, ёвтыя, кода монь «сёвныть». Чатьмонезевинь… Зяро тензэ? Монень марявсь, кевкстницянть коряс одан кеменьшка иеде. А вана кортавксонь, прянь ветямонь, веркачинь коряс сон, неявсь тень, – монь шкань. Валаня, човине ды лийканя вайгелезэ седеяк одкстомтсь.

Шкань-шкань теде-тонадо нурькинестэ пшкалезь, шкань-шкань каштмолезь, эзь марявояк, кода ютынек буйкуншканть – кавто ёндо алкине пандосо пирязь эрзянь покш веленть – Валдайвеленть, мельганзо текекс кивчкадсь Пурнаесь. Те аволь кода умонь эли пек умонь шкатнестэ, ардат аволь крандазсо эли бричкасо, мейсэ ардтнесь содавикс Чичиков ялгась. Ней комсьвейкееце пинге, вейсэнь алтымань шка, а мезть вейкень омбоце ваксс путнемс.

Ютасть торох аламо, кавто кедень сурсо лововиця минутат, ды минь уш Пичелесэтяно. Икелень покш сюпав колхозонь конторанть, ней чаво покш кудонть, икелетяно. Чиресэнзэ кавто сыре рацяня килейтне важов вармань эрьва лекстявксто, прок удомань пачка, састыне юхаить тарадсост. Эрьвань эсензэ: кие арды, кие ливти, кие пейди-аварди, кие юхаи… Улить истяткак, кить оймень апак полавтне рамсить-микшнить. Лиядо сынст иля кевкстне. Истя теи Пичелень прявт микшницяськак, Сеськень Валюш, икелень конторанть каршо «Чивалгома» лавкасонзо.

Ютынек пекстазь удыця «конторанть» ды сеске пачкодинек велень ламо кудотнеде мазычисэнзэ явовикс кудонок икелев. Сон – минек, монь, куш… Зяро вийть, мелявкст путынь – теемс лембекс ды, аламошка пря шнан, васолдо неявиксэкс, – а онкставить мейсэяк. Секс – монь.

– Мон пачкодинь, вана кудонок, – яволявтынь, «чиеманок» матразь, Натальнень. – Тонеть седе тов?

– Пароль… – эзизе прядо Наталь, мезе мериксэль, сонсь кургонь автезь, кода кортыть, вансь керш ёнов, монь сэнела-пижестэ артозь кудонок лангс. .

Арсезевинь: учось, мезе мерян мон. – Чавонь кедть ялгояк молевлинь, молемась тесэ… аволинь солакадо. Канстось вана… кедьсант тарги.

Чарькодемс а стакаль, ков «менди» авась. Мон чатьмонезь нолдынь «ведьметнень», ды «айгором», кудонок ютазь, тусь кополсо. Эрьва кода поркснезь асфальтонь кись прядовсь. Саинь витев чуваронь киванть, куроксто – кершев ды, вирькиява ардозь, таго витев саезь, эртевинь Черькаень (Наталь ёвтызе) пирест келей, сэньстэ артозь кшнинь кенкшезэнзэ.

Авась ливчанясто панжизе кенкшкенть, кундась вить кедьсэнзэ икеленгзэ кундамкаентень ды капшазь валгссь урныгайстэнть. Саизе озамканть лангсто канстонзо. Ютась монь ёнов. Панжия кенкшкенть. Стясь каршон ды, ашо пеензэ невтемга мизолдозь, лангозон ванозь, ёвтась тень ускоманзо кис сюкпря, тердимим инжекс. Панжизе пирекенкшенть ды стака юдманзо марто – кудов.

А содан мекс, теке кияк кармавтымим: вановтсо ильтия икельдень туиця, сэньсэ оршазь, штадо пря аванть.

Ансяк мурдынь ды ур-ур-ур туинь ардозь вирьга ютавтозь киванть кудов, мекшвелекс бизнэзевсть удемсормсевкссэнь кодат-бути ачарькодевикс, седеень китнэвтиця, вечкевикс мельть: «Кие те сэнь сёлмо нармуннесь? Косто саевсь? Зяроце ие уш эрян Пичелесэ – неия васенцеде. Каня эзь сакшно теде икеле чачома велезэнзэ? Кодамо тувталось? Кода ды мезе илязо уле, эйсэнзэ мезе-бути ламотнень коряс лия, аёвтавикс, мазый, кецневтиця. Мезе? Содык азё!».

Содамс ломаненть, умок ёвтазь, – сэвема мартонзо пондо сал. Те кортыть истя – пондо. Икелень ним марто эринь комсьветееде ламо иеть. Зняро, текенекс, сэвинь мартонзо пондот. Ды мезе? Эзия чарькоде. Паряк, моньгак эзимим панжо педе-пес. Ламонь кувалма, арсян, текеде явовстькак эрямонь кинек. Сон вейсэнь эрямо пизэнек каладомадо дёкушкадокшнось, чевгекс коськекшнесь, мон озакшнынь таблетка лангс – верем ламбаськадсь.

Эсь кор, эсь ойме ды рунговий, ёжот… Эрьвасо эрьва мезть. Эрьвасо Паз ды вакссонзо Идемевсь. Теньгак сынтемест, маряви, а явсак лиятнеде. Теке марто мезе-бути ули эйсэнзэ, се, мезенть а мусак лиятнень потсто-лангсто. Умок редязь, пертьпельксэсь, весемесь, мезе Моданть лангсо ды мик Менельсэяк, вейкетьксчи а вечкить. Авейкеть пиземень байгинетне, авейкеть молекулатне, атомтне…

«Кодамо монень тев? Мекс педясть эйзэнь сондензэ арсематне? Мезе теде – ардсь мартон ошсто, уския кудов? Ульнинь мартонзо час малава. Мезе тень эйстэ? Ульнинь ды – арасян! Ошов-ков эрьва ардомстон киньгак ды озавтан. Ардан, кортнян, кевкстнян, пеняцян тень-тонань лангс… Мезе берянесь?..

Вана сыречись а кадны, ормасонзо вансты эйсэнь чинек-венек, эрьва косо, куш кудоскак иля совсе: пильгетне нузялгалеме кармасть, седеесь кирнявтнеме ушоли, лиясто пштикст педсить шоркаеме… А мон, айша, кие соды мезть нолдтнян колганозон… Мезеяк а теят: ормат, сыречи – те вейке, а арсематне, конатне ней куродымизь, – те лия».

Эськан кортнезь, эзия редяяк, ютыя васня дринькаиця чуваронь, мельганзо ансяк лемезэ асфальтонь кинть ды вастовинь сэньсэ мизолдыця, оймень оймавтниця кудом марто. Лоткавтыя урныгаем, нолдынь эйстэнзэ пильген масторов. Панжия пирявксонь келей кенкшенть, одс совинь урныгаезэнь ды совавтыя латалов.




Преввелявкст


Кудосо эйсэнь учость ним Груня ды чокшнень, кадык а маласольгак, ашо ванькс нардамосо копачазь ярсамопельть. Дивансо, чевте-лембе таркинесэ, пря шны, венемтни рунгонзо, «оймси», атяка псаканок, прясто пильгс раужо Нузяй. Вадря эрямозо. Сонзэ а талновтыть а эрьва кува молиця войнатне, а миллиардонь питнесэ саламотне, а эсензэ икелечизэ. Чеертне курок кармить сонзэ ноцкиеме пулодо. Мень а рай раужкаень эрямозо? Сон аволь ськамонзо. Ломантнень юткстояк ламот эрить сонзэкс. Пекест пешксеть, удома таркаст чевтеть – кодамо теть лия уцяска? Мезекс содамс, кодамокс карми, икелечить?

– Теветь лиссть? Торох, весе яксевтить? – ютавтызе ланган вановтонзо, шкань ютазь пшкадсь тень стуворонть перька котьмиця Груня. Допрок икелень, ловт, судом алов, путсь ям вакан, чирезэнзэ комавтсь цитниця кшнинь пенч. Таргась стувор потсто пеель ды каштмолезь печксесь розень, мекс-бути мерить тензэ раужо, кши. Каня сон эрси истямо, раужо? Тень теезь, таргась кельменькайстэ «чай» марто суликань банка. Эйсэнзэ кирдеви арвотикшень ведь. Панжизе ды нуртясь тень, «Алёнь кечинес», зяро эряви тюжа ведтенть. Сеске пештизе аравтозь кедьгенть лакиведьсэ. Човоризе. Качады, качады кода арвотикшесь! Истя кодамояк лавкань чай-тикше а качады.

– Пенчесь учи, ямоськак кшинть марто… Ярсак. Ужока, а таблеткат симить? – мель путсь, якась мирдензэ мельга ковгак-зярдояк а капшиця Груня. Седе малав, ловт, улонзо алов, айгизе ям ваканонть, вельтизе, илязо кельме, чай кечиненть. «Чоп вачоль, андома, ямозо илязо кельме…» – чийнесь Грунянь пряудемга мелявт-мелесь. Кудонь ломань, лиякс те авадонть а мереват, сонзэ эрямо масторозо кудось ды перьканзо кардазтнэ-пирявкстнэ.

– Сюк-сюк, – меринь, свалшкань таркасон озадо аштезь. Вить кедьсэнь вакан чирестэ саия пенченть, керш кедьсэнь – цяпласто кшипечть, ушодынь тувтамо, вачозь пекень пештямо. Ансяк пидезь ямось, вишкинестэ керсезь куяв сывель марто, марявсь тантейдеяк тантейкс. Коршинь-амолинь седеень витезь. Икелень путозь ваканонть чамдыя баксорсо.

Ярсынь-теинь. Ёвтынь анокстыцянтень сюкпря ды стинь таркастон. Озынь стуворонть вакссо диванонтень – тесэ монь, кода аволь умок лемдия, «ловномань залом». Теске удсетянояк нузякс, ялатеке вечкевикс, Нузяй марто. Тесэ ды диванонть песэ вальмалангось – таркат, косо кирдевить эрьва кодамо лемень кулялопат, журналт, зярыя книгат… Течи калоньчи, почтань кандтнема-сравтнема чи. Секс истямо сюпав «ловнома залом».

Саия ды кандыя, каштор-каштор, кулялопатнестэ вейкенть сельмень икелев. Ловныя икельксэкс путозь статьянть лемензэ. Эзь туе мелезэнь. Таго политикадо, таго кочкамотнеде, салыцятнеде, авань полавтницятнеде… Налкставсть. Од мезеяк арась. Сынст таркас сельмень икелев апак учо лиссь ошсто велев мартон ардыця, нурька понкскесэ авась. Каня тердия мон сонзэ? Косто саевсть мизолдыця сэняжа сельмензэ?

«Вай, те мезень дюния? Мезень лецькай?!» – эль эзть пра кельпрястон марямга валтнэ. Превсэнь челькень пес вельмесь сень чачозо, конань марто вейсэ ульнинек аволь чить, част, ансяк минутат. Весемезэ. Ды вант вана… кадсь мештезэнь, а кемевияк, истямо анардтневиця тешкс. Неия, кода сон, шождынестэ, кизэкс оршнезь, стядо аштесь кичиресэ ды ахолясь, кедензэ полавтнезь, ваксканзо «прянь-полдань синдезь» юхаиця урныгайтнень каршо. Мельсэнь, кода кепедизе ды путызе озамканть лангс юдманзо, озась, кода теевинек содавиксэкс, мезде кортынек. Ледсть мелезэнь сиянь баягинекс гайгиця вайгелезэ, сэнь сельмензэ, мизолксто панжозь човине турванзо.

Неия сэрьс алкине аванть мазыйстэ оршазь рунгонзо ды мик аламнеде тандадынь, зуйк мерсь седеем, пачкан ютась чевте-вечкевикс лембе. Теке марто содавтымим мезе-бути визьксэнь кондямо; прок мезеяк салынь каршон аштиця Грунянь экшстэ эли теинь кодамояк лия пежеть.

…Мекс истя, мезде карминь, маряви, аймельгадомо? Мезе те, мезе мартон моли? Илязо уле… потсо пикстердиця вечкемань сятко! Илязо гувкаде эйстэнзэ… У-ух, авакай-тирякай! Кодат вечкемат васень нинть марто явомсто певтеме майсематнеде мейле? Эрдекстамот, сюдомат, сельведть, тандавтнемат… Мезть ансяк арасельть! Пазось эрьвань ванстозо эйстэст, эрьвань. Вечкема… Сон ансяк книгатнесэ ды певтеме ламо фильматнесэ-косо неяви мазыйстэ цитниця, чиналсо пургсиця пазонь тештекс. Соват эрямонтень, чарькодьсак: кодат ансяк нулгодькс, чопода тевть, ризкст-сельведть а лиснить эйстэнзэ!

А шумбрачись… Седеесь, кона кирдеви таблеткань нежесэ, пильгень чулгсетематне… Кодат вечкемат… Те истя. Ансяк философось истя мерекшнесь: «Ломаненть седейсэ меельцекс кулыть кавто ёжот: вечкемась ды кежень сазь авечкемась». Секскак кирьвали сон, сядо падежсэ шназь «ормась», иетнень, орматнень, лиятнень-мезтнень лангс апак вано, трокскаст эскелязь. Астяко поэтэсь мерекшнесь:



Нет, у седой реки

Всё то же буйство,

Всё та же быстрина и глубина…



Пурнынь вийть ды вырновтынь ушов стака килангов ветиця арсематнень, ледстнематнень эрямонь сеть ёнкстнэде, конатнесэ томбавкшнынь а весть. Одс саия кедезэнь веёнов путозь кулялопанть. Таго седейколавкс – нусмакавтымим экологиядо покш, цифрадо пешксе статьясь, се, конасо ёвтневи, кода ваятано эсенек шукшс ды мезеяк тень каршо масторсонть, ловт, а тееви. А тееви модамасторсонтькак. Куш черть раздек виень аразденть куш мезеяк полавтомс паро ёнов! Мекс истямокс панизе-пидизе пазось ломаненть? Мекс? …Пазось каня?

Омбоце покш, виев, седеяк превей сёрмадовксось – пертьпельксэнть ёжодонзо ды мезе учи планетанть, учи икеле шкасто. Солыть Пелевеёнксонь океанонть эензэ. Модамасторонть лембезэ кепети иестэ иес. Теде солыть эйтне, домкалгадыть ды келейгадыть морятне-океантнэ. Ламо модат ды масторт вельтявить, сы шка, ведьсэ.

Ды таго теке: киньгак те а талновты, весенень буень а содыця, певтеме ялатеке. Те – орма, конадо ламодояк ламот а арсить. Натой а содытькак. Тунь а мелявтыть «менельсэ» эриця ломантнеяк. Сестэ эно мекс монень оймамо а максыть неть стакачитне? Мекс певтеме ламотнень те дух а мелявты?

Омбоце чистэ сыргинь кудазораванть кармавтоманзо топавтомо – лавкав кшинь рамамо. Пачкодинь, перькан ваннозь, неень ды умонь шкань эрямо таркатнеде, кудотнеде, вастовикс ломантнеде арсезь. Пачкодинь, стамбаро эскелязь, шкастонзо. Кшинь усксиця «газелесь» аштесь Сеськень Валюшонь озязонь пизэшка лавканзо икеле. «Паро, шкастонзо сынь, пси кши саян!» – кивчкадсь прясон.

Ноцковтыя кенкшенть ды эскельдинь аволь сэрей кенкшалксонть трокс. Нупальнесь тыц пешксе эрьва кодамо ярсамопельде. Мезе, кодат ярсамопельть ансяк арасть! Кува ансяк апак путне! Каня истят ульнесть микшнема таркатне эйкакшшкастон ды мейлеяк? Чаво лавсят… Ванность, арсесть мезе рамамс «ламо килограммань кандтниця» ветешка од ды сыре ават. Косто неень шкасто муемс цёратнень? Мекс, кона ёнов а варштат, ават?

Эль кенеринь мельган кенкшенть пекстамо, мельган совась, мерть, судодо-судос эртевинь исень «ардыця ялгам» марто.

– Шумбрат! – сельмезэнзэ ванозь, кирнявтсь вельмиця кеняркс ёжодонть мизолдыця турван ютксто шумбрачинь арсемась.

Истямо апак сёрмадо лув уле: васенцекс шумбрат-парт арсезэ цёрась авантень, одось – сырентень; теке марто кедь максозо, васняяк, сыресь одонтень, аволь мекевлангт, авась – цёрантень. Пшкадинь Натальнень, ды ёвтазенть марто совась мештезэнь лембе налнэ.

– Шумбрачи! – вастовсть вановтонок, ды маринь каршо налксиця сельме, рунгонзо видьстэ кирдиця Наталень пельде: – Содат мезе… Мхы, теня, нолдык чумом – леметь сеске а ледстяви. Эрси…

– Алё, Алексей, – ледстия, талномадонть эль а кокнозь, сурсон мештезэнь невтнезь, лемем Наталень чамас ванозь.

– Содат мезе, Терентий Тимофеевич, мирдем марто ульнесь кортамо: мартонк вастовомс, теевемс седе малавиксэкс. Кода тон арсят? Кодаяк таргонь ютазь, – та-кода нильнезь ёвтынзе тердема валонзо Наталь. – Туи? – ноцковтызе мазыйстэ-валанясто судрязь штадо прянзо.

– Мекс а туи? Туи… Тердеманть кис, Наталь, сюконян, – талнозь, паряк, секс эрязкалезь, ёвтынь валон, кивчк варштынь кирьксала, сэнь сельме чамазонзо ды сеске виздезь комавтыя прям.

Наталь шаштсь полканть ваксс, кармась прянзо нолдазь ванномо суликатнень алга аравтнезь микшневиця ярсамотнень. Эскельдинь сонзэ вакска икелев. Пирявксонть тона ёно сонсь Валюш, аволь сэрей, раужо сельме, тюжала чама, эчке, аволь сыре аваломань. «Аволь эрзянь Валюшонь чамачачозо, – ютась, теке кияк кучизе, превган мелесь. – Тетянзо, аванзо? Косто сынь цопадизь те тюсонть? Муик азё… Сталмонтькак кандтни…»

– Монень кавто кшикопшат, розень, лиякс – раужо, ды ашо, седе чевтине, меринь, кшинь лавканть вановтсон злыдардезь.

Путынь полиэтиленэнь юдмазон максозь рамавксон, пандыя, сокаринь зепсэнь, питнест ды лисинь ушов.

Лембе. Чись маней. Чипаесь, сэнь паксятнень азорост, пейдезь пейди. Кецневти виртнень-паксятнень, ломантнень. Мартон лавкав якиця шабратнень вазошка пинест Ашакай. Ёжом вадря, кайксэм седеяк.

Эскелян теке каладырь киванть мекев, кудов. Юткоськак тесэ ютамс кемень минутат. Пильгетне метрат ловить, а аштить таркасост. Превтнеяк а содыть нузякскалемат. Оймсить ансяк удомсто. Вана нейгак: «Кодамо паз чачтызе те мазычинть? Аволь сэрей, седе виде карми – алкине. Валдо, аволь покш чама. Варштат веёндо – таташке. Вайгелезэяк… Чольдерди тундонь чудикерькскекс. Кеман, серьгеди моро – марясызь удыця пельтнеяк, ломантнеде а мезть кортамс – стувтсызь леместкак».

Течи, вановтом вакска эзь юта, оршазель Наталь лиякс. Ушонть псинзэ лангс апак вано, лангсонзо кувака пильге, валдо-якстере тюс понкст, нурька ожа икелень палянть полавтызе якстерть-мери, кувака ожа палясо. Мезть илязо кая ланганзо – молить, невтить рунгоь мазычинзэ. Варштат лангозонзо, – мерят, икелеть од тейтерь. Седеяк, зярдо несак сетнень ютксо, конатне майсевить велькска сталмодост. Кода истя вансты эсь прянзо? Мезде ярсни? Кодат тевть уски-сяворды астакалгадомадо?

Неень шкасто, зярдо ярсамопельтне – кодат ансяк арасть лавкатнесэ! – сынсь эцить кургс, ды, текенень, чинек-венек озадо аштемась панить эйсэнек тона пелев, косто мекев ки арась. Ванстомс эсь прянть – те неень эрямосонть ине, менелень сэрьсэ тев, сынь мельс, Черькаень Наталень ёндо. Виев ломанесь, маряви. Виев сон потмовийсэ, ламо вий, неяви, коськана рунгосонзояк.

Вастымим кузтемпесэ ним, Груня. Лангсонзо ашо балягав, пиже, шожда коцтсто стазь кумажа видьга халат, прязо шержей, черензэ кирьга видьга вейкетьстэ керязь, яки штадопрят.

Мизолдозь лангозон ванозь, саизе кедьстэнь кши марто юдманть ды потазь совась кудыкелев. Кодат питнест копшатнень, чевтеть-аволь – эзь кевксте.

Совинь кардазс, саинь артомань кедьёнксон, артомапель марто кедьгетнень ды лисинь вальмалов. Озынь анокстазь нурька пильге эземнезэнь ды поладыя исяк ушодозь тевем – кудонок икельга пирявксонть одс артоманзо. Колмоце кизэ уш эскели, кода васенцеде сэньстэ ваднекшнинь цицинатнень. Тедеде саинь мель артомс валдо-пижесэ, лиякс ёвтазь, салатонь тюссо.

Артынь чикуншкасто саезь чокшнес, меельце пелев нильтякадокшнынь. Пелинь пиземеде, секс истя панинь. Чинь-чоп кодат ансяк мельть эзимизь содавтне! Арсинь банянь путомадо, яжинь превть, кода ды косто ускомс ярсамопель тувотненень, поремадо башка, сынь а содыть мезеяк, порить… ансяк кенерть максомо. Модамартнеяк, кадовсь аламо, таргамат. Каня лововить зяро-кодат мельть чинзэ перть пивтсть-ютасть удемган?

Велень эрицянть тевензэ каня содыть пе? А вечкевкшны вейкесь: сынь, кудонь-пирень мелявкстнэ, эрва кодат тевтне, ушодксто саезь пес чарыть-велить тутманть перька. Поремс, поремс, поремс… Сон свал улезэ пешксе. Тень туртов топавтовить ламодояк ламо мелявкстне. Ламот эрицятнестэ эрить пекень эрямосо. Сонзэ ловить эрямонь зэмекс. Лия, мельс туиця ёнкстонзо, а содыть, содамскак мелест арась. Оймесь чаво, пештемс сонзэ – те сынст а мелявтовты, а токши, а ризнэвти..

Шкань-шкань лиснесь, сакшнось икелень кичиресэ кедензэ кепсиця аволь сэрей-покш авась, кодамокс ды кода васенцеде неекшния Черькаень Наталень. Икелеяк некшния превсэнь сонзэ алкине, тейтерькс ёлганя рунгонзо. Ней неия ды мекс-бути аравтыя од килей ваксс. Кода теевемс мартонзо седе содавиксэкс, кортнемс мартонзо седейшкава? Кода истя – кода? Инжекс тердимизь? Тердимизь… Мезе теть невак? Истя мерськак: «Таргонь ютазь». Чинть эзизе ёвта. Исяк ульнесь куншкачи. Те, лиси, учома таргонь перть. Учома, ков эно молят!

«Теня, саты течис!» – марямга путынь пе тевезэнь, стинь эземнестэнь, варштынь топавтозь тевем лангс, пурнынь-саинь цёкон, лия кедьёнксон ды совинь мартост кардазс. Важодема чим прядовсь. Манеель. Шканзо коряс лембель. Макссь теемс, кецневтимим, аволь аламо.




Терентий Тимофеевич


Ошов ардтнемадон мейле ютасть зярыя чить. Кудос совсинь чуросто. Котьминь, кода сеедьстэ эрси, кардазсо: лаксинь-инзэдинь, рисовинь, чувтосто керсинь-пильсинь мазыльминеть, някат. Теинь вечкевикс, оймень витиця тевть. Эзинь стувтне ниле пильге лангсо чийницятнедеяк. Мезть кортамс, чуросто кие а соды, кодамо тевсэ сюпав велень эрицясь?

Апак учо панжовсь, чикорк мерсь, кудыкельде кардазс аволь покш-келей лазонь кенкшесь, ды стясь кенкшалкс лангс аволь сэрей, аволь човинеяк, кудоютконь халатсонзо Груня.

– Прядыть теветь, совак, ломань тенек сась! – пшкадсь тень кузтемпестэ цийниця вайгельсэнзэ ды, потазь, глянкадизе мельганзо кенкшенть.

«Мезе, кодамо ломань, косто, кона ёндо? – чиезь чийсть кевкстемань валтнэ пряудемган кедьёнксон таркаваст путнемстэ. – Совама, эно кода…»

Полавтынь кудыкеле кардазъютконь колошан, панжия стака кудокенкшенть, совинь кудос. Удалцькудонь вальманть каршо стуворнэнть экшсэ озадо аштесь, учось, васняяк сельмезэнь каятотсь, шержей пря атя. Эскельдинь малав. Асодавиксэсь ливчанясто, аволь атякс стясь. Венстизе, лангозон кецниця вановтсо ванозь, панжадо кедькоморонзо. Тень теия монгак. Вейкенек-вейкенек лангс ванозь, нардевстэ лепштинек кеденек.

– Терентий Тимофеевич. Седеем витьсак, карминдерят тень мереме Тимофеевичень таркас – Теряй леляй. Литературань лемем, текенекс, – Дораень Теряй, – ёвтынзе лемензэ ды кода меремс тензэ апак учонь инжесь. «Теряй леляй, литературань лем… «Истят валт велесэ эрямстон кинь кургстояк эзинь марсе, те мезе-бути од..,», – арсезевинь атянть кунсолозь.

– Монь лемдекшнимизь, – эзинь кирдеве – пейдезевинь, – Лёхакс, Алексеекс, мерить тень мекс-бути Алё, – ёвтыя пшкалема лемем каршон стядо аштиця аволь сэрей, моньшкан, коськана рунго, аволь монь кондямо парь эчке, атянтень. Явовсть «ояксчинь» кедькоморонок. Шаштынь эземне ды озынь Теряй лелянь каршо.

Сельмензэ атянть валдо-сэнть. Судозо аволь псакань, кувака, куншкасо будолмине марто. Алце турвазо верценть коряс аламнеде эчке, ды теде кургозо мизолдомсто-пейдемстэ тееви авечкевиксэкс. Секс правты мель кургонзо кирдемс пекстазь. Икеле валдо-чопода, ней умок уш конясто човоньс сияждыця шержей черензэ наразь нурькинестэ. Ансяк конянзо вельксэс кадозь веёнов судрязь черьпакшке.

Инжесь оршазь атякс, лангсонзо куштазь пона, нурька ожа, понкс потс нолдазь панар, раужо, вадрясто, секень вант, керяват, вадяшазь понкст. Сон аволь эчке ловажавтнеде, секс, веёндо ванозь, мерят, од цёра. Лиякс кодаяк, куш аволь келей лавтовонзо лангсо кандтни сизьгемень ветеде ламо иеть. Вана истямокс васенцеде стясь сельмень икелев, совась содавиксэнь тетрадезэнь Теряй лелям, эли, кода книгасонзо, – Дораень Теряй.

Кортазевинек кода-бути апак учо книгадо-ловномадо. Монень маряви, сюлмавксокс тенень ульнесть стуворонок вакссо диванось – вень ютавтнема таркам – ды пряпесэнзэ вальмалангось: лангсост кода понгсь вачказь кулялопатне, журналтнэ, книгатне. Сынь, бешом, ульнесть ушодксокс кортамонь кувтантень. Мелезэнь тусть, кадовсть превезэнь Терентий Тимофеевичень кой-кона мелензэ.

– Истяткак валт пачколесть пилезэнь: мезе, келя, икелень шкатне – галань толга ды раужо навсемкай ведь. Мезень сёрмадомат? Кодамо, келя, превей, васов тердиця-неиця литература? Кодат сёрмадейть? – мерекшнесь вейке «ламонь содыцясь». Сон сестэ истят чаво валтнэнь каршо, ёвтнеманзо коряс, мизолдсь ды тей-тов черькась прясонзо. Талномадонть, мельсэнь, сайсь вальмалангсто кодамо понгсь книга, панжизе ды сеске путызе мекев. Стакасто лекстясь. Озась седе ёнсто.

А стакаль чарькодемс, икелень аштесь превей, ламонь содыця, текенень, сэтьме, чевте кор, седеень мариця ломань. Истятнэде ней ютксонок, масторсонть, косо теевить ламо чопода, тандавтниця тевть, сави видькстамс, ламо а мерят.

– Э-э-э… Сёрмадсть, ды кода сёрмадсть! Жуковский, Вяземский, Пушкин, Лермонтов, Толстой Лев , Чехов Антон, Белинский… А Гомер? А стяко литературань ветицятне ХIХ пингенть лемдизь рузонь литературань сырнень пингекс. Келей эскелькст Советэнь властень пигстэ теезельть эрзянь литературасонть.

Кулдуркаев Яков, Раптанов Тимофей, Куторкин Андрей, Коломасов Василий, Радаев Василий, Абрамов Кузьма, Ганчин Анатолий, Сульдина Аня, Люлякина Серафима, Рябова Людмила…– каштанчинь кирдезь Теряй лелям ледстинзе эрзянь ды рузонь ине сёрмадейтнень лемест ды сэредьксэнь марязь поладызе кортамонзо неень тевтнеде. – Истят лемть, истят литературат, культурань истят тёкшт ды сеске, прок менельстэ прась, книгадонть копорьёнт велявтома. Састь тень кувалма кевкстемат: кие «чумось» ды козонь пачкоди книганть полавтыця, электрониканть, вельде ломанесь. Мезеяк, бешом, лия а теят: наукань ды техникань прогресс. Ломантнень ютксо конёвсо сюлмавкстне полавтовсть телевизорсо, интернетсэ, смартфонсо ды ляя-лия электроникасо. Ялатеке ламонь кувалма тевесь аволь «техникасонть» – ломаньсэнть. Мекс, каня кие а мери ловномо электрононь книгат?

Ёгань Теряй ёвтызе мелензэ, стакасто лекстясь, оймась.

– Виде теяк, Интернетэсь, «чумодо» явозь, – ине вий. Ансяк муеви се, кона ёвтасы, ков вети сон, киберэсь, ды ков пачтясы ломанень сыменть? – поладынь Теряй лелянь, псистэ кортыцянть, валонзо, ёвтыя мелем, максынь питне икеле ёвтазь сювань сталмо валтнэнень.

Терентий Тимофеевич кунсолось, чатьмонсь. Кончтнесь сэнь сельмензэ, ваннось лангозонок, мезе икелензэ. Апак учо пстылязевсь ды пшкадсь тенек, кудонь азортнэнень:

– Алексей ды Груня, вандычинь ютазь садо миненек, учотано. Варштасынк, кода лексетяно, мезде-кода мелявттано, – мерсь шержей пря инжесь таркастонзо эрязасто стямсто. Витизе рунгонзо ды поладынзе валонзо: – Зяроце ие уш эрятано Пичелесэ, вейкенек-вейкенек седе малавикстэ а содатано. Кецнян, содамо карминь: кудосонк явиде мель, тарка книгантень. Ней истямось чуродояк чуросто вастневи… Ловноманть каршо кшнинь пирявкст стявтсть. Лездыть тенень эрицятнеяк. Ярмактнень, сюпавчинть, пешксе пекенть мельга правтомась кравтызь книганть ломаненть ойместэ.

– Сюкпря, Теряй леляй, паро валот ды тердемат кис, сатано апак кавтолдо, – мерсь каршо Груня, коник чиресэ аштезь, эсензэ ды монь пельде.

– Натой тон, Груня, ды мон – чачомань коряс ве велень, аволь тестэнь, те шкас эзинек вастневе. Ильведьксэнть витема, – янксезь, теке марто муст-муст пейдезь, ёвтызе мелензэ атясь лисемадо икеле, кенкш каршо аштезь. – Те ошсо ломантне явовить векедест-вейкедест, велесэ лият тевтне.

Атясь кортась мартонок, лангозонок ванозь, верьга вайгельть. Чарькодия куроксто: пилензэ Терентий Тимофеевичень аволь одонь – камажат. Абунгалемс а савкшны, иензэ… эскелить кавксоньгементнес.

…Урядыя книгатнеде-мезтнеде коникем. Седе ламотне кельгсть вальмалангс. Штавтыя тавадксонть. Толонь вельмевтеме, ловномо эзинь карма. Копачинь велькссэнть. Конинь сельмень. Удомам ёмась. Прок тандадсь. Теке мерят, кезэрень гректнень Морфий пазост допрок стувтымим.

Кувать майсевтсть эйсэнь моданть лангсо эрямонь зэмеденть кевкстематне, кирдевсть превсэнь Теряй лелянь марто вастовоманок, мартонзо кортнематне. Ютасть икельган чинь-чоп эвтезь-чаразь теезь тевтнеде ледстнематне. Поладксокс тенст ледсь мелезэнь лавкасо Наталень неемазо. Гайгезевсь седеень пачк ютыця сонзэ вайгелезэ, ды, окойники, ваязь ваинь удомань вечкевикс эрькентень. Удынь чинзэ лисемс, прок кулозь.

Истя вана чи мельга чи, ков мельга ков, кеняркст-ризкст, ды а редясак, кода прядовить неть читне-ковтне, прядови эрямопингесь. Мезекс сакшны ломанесь моданть лангс, мезень кис, мезень тееме? Ломанесь… А мон? Маней валске чипаенть лисеманзо лангс кецнезь ванома? Аволь апештевиця пекень пештямо? Арась, арась! Ансяк аволь тень кис.




Казнеть эрсить эрьва кодат…


Сыргозинь. Велень а куш а каш. Груня эйстэнь «васоло», икеле кудосо, уды. Курок сонгак сти.

«Мезестэ ушодомс?» – сельмень апак панжо содавтымим кевкстемась. «Мезть кевкстнят? Каня а содат? – кевкстимим модапотмонь кодамо-бути эчке, гавзара-казямо вайгель. – Васняяк, умок содат, пештямат зобняст, симдемат кардазсо оркиицятнень. Ветямат лугалангс, сюлмамат цицигас, симдемат вазтнэнь, каяма, седе котност, саразтнэнень…»

– Теня, саты теть лужалемс! Аволь боярат, – панжинь каракшон, меринь марямга эстень ды брикстядия лангстон кизэнь шожда вельксэнть пильгепес.

Стинь. Витния мельган таркам. Нарынь. Ютынь шлямо-нардамо. Кельме веднесэ шлия-ёрвалдыя чамам, пансия, теке тенстьсэ тенсия, рунгостон кадовикс удомам. Оршнинь ды лисинь кардазов.

«Аштека, аштека! А тон, атя, арсик, мезе кармат каземе Натальнень вандыде мейле?» – апак учо сыця те мельденть тарск теинь. Теяк. Мекс ансяк – Натальнень? Тувталось кодамо? Чачома чизэ? Аволь. Эно мекс сонензэ? Казьсынек, мезе раматано, Груня марто кавонек пельде. А мезе, бути Наталь лемс анокстамс мазыйстэ сёрмадозь-артозь картыне? Ды стихсэ… Кецневтьса, кеман! Мекс – таго куродымим теке кевкстемась – ансяк Наталь лемс? Кода тень лангс ваномо карми Теряй лелям? Содама текенекс тувталонть, мезень кувалма сёрмадозь-кучозь. Арась-арась – те а казне, те някинесэ пакшань налксема.

Монсь казнетнеде истя меревлинь: ве таркасо ботамот, эвтемат! А вечкеви тень те, кадык кезэрень, коесь. Мекс – а содан. Паряк, нузяксчись пильгть путни? Иетнеяк… Мезекс, видеяк? Казне – те максомс лезэ эли теемс мезеяк вечкевикс, важов, мезеяк эрявикс малавиксэть туртов. Сонзэ теемга эряви тувтал: мертяно, урьвакстома-мирденень лисема, нурькинестэ – полыямо. Цётавкс чачома чи – комсеце, колоньгеменце… Весемеде ламо кецневтить ломантне вейкест-вейкест Од иень вастома читнестэ ды, секень вант, аволь седе аламо, Авань чистэ. Аватне, видькстамо, казнень каземань кувалт цёратнень коряс седе дошузт. Пшкадема Грунянень. Сон кол неть тевтнесэ, профессор…

Каземань коесь ульнесь советтнэнь пингстэяк, ансяк казнетнень покш – чист, питнест ульнесь ламоксть лиятат. Аволь кода ней: урныгай – аволь ве миллиононь питнесэ, квартира, кудо – кемень этажонь сэрьсэ, яхта, океансо усия… Истямо казнень макснемадо эзь марсеве, онстояк эзь некшневе. Сестэяк, содави, эрьва мезть вастневсть, ялатеке урныгайс-кудос эзть пачколе. Мик версетнеяк. Казнекс ульнесть лембе, арсема марто сёрмине, почта вельде кучневикс картыне, патефон, книга, паро, тантей чине ведень флакон, вечкевиксэть туртов мазыйстэ викшнезь пацине. Шкань ютазь паро казнекс лововкшность радиолатне. Максневсть, теде башка, Ленинэнь ды Сталинэнь лемсэ Казнень лауреатонь лемть. Мезе ульнесь – ульнесь. А велявтсак. Се, ней уш умонь, эрямостонть аламо мезе ванстовсь. Аволь весементь, ламо мезенть – ванстомаль.

А бути Натальнень паро книга рамамс? Кинь, кодамо авторонь? Косто? Сави ошов ардтнемс. Тевесь эно малавгак аволь тень эйсэ. Мезе ашти монень тов пансемась! Ловныця-аволь? Вана мезде арсема! Казьсак казнеть, сон лангозонзо а варштыяк, усксевеме карми. Мезекс те? Ютазь шкатнестэ книгась ульнесь, кадык аволь эрьванень, паро казнекс. Ютазь шкатнестэ, ней…

Ней? Ней… Седееть нуваргады: чинь куншкава тол мартояк а муят ловномань вечкиця. Ков сынь ёмасть? Мезе мартост теевсь? Мейсэ тувталось? Визькс – книгась велявтсь …шукшокс. Чумо телевидениясь? Истя, сави меремс, улияк. Астяко теицязо, кона чарькодекшнизе, мезес ветясы ломаненть сонзэ «эйдезэ», те самай «сэняжа сельмесь», кудосонзо куломазонзо телевизор эзь кирде.

Кода полавтовсь шкась ды эрямось!

Чикуншка. Кудыкеле каинь пильгстэнь эрьва чинь рудазов колошан, совинь тутмань пештямо. Груня икеле кудосо утюгсо вадяши пельскоське муськемат. Озынь каршонзо диванс. Кевкстеманть, конадо арсинь валскень перть, кирдинь превсэнь, максыя вадяшицянтень.

– Теня, содат мезе, вандыде мейле тердимизь инжекс. Чавонь кедть, эйкакшоськак соды, а яксить. Икеле тень кувалма превть яжамс эзь савкшно. Суликанть зепс ды – чийть! Ней, истя молиндерят, ламот ловтадызь кевень пингень ломанекс. Ютась шкась, зярдо «валютакс» ульнесь пельлитрась. Ёвтык, мезе анокстама тенек, мезе саема?

– Шожда меремс, саема… – аламос лоткась тей-тов яксевтемеде пси утюгонть Груня, путызе икелензэ «стядо», кепедизе вановтонзо мирдензэ лангс ды ёвтызе мелензэ: – Мертяно, мезеяк оршамопельтнестэ… Содама, кодамо покшолмань, кодамо тюсонь, кодамо лувонь-модань, коцтонь… Марят? Эли сайсынек кедьгень масторонть. Мезть эйсэнзэ ансяк арасть! Мезе каземс? Кечинень-кечине – ракамонь тевть. Истя ансяк калмамсто явшекшнить. Текенень, мольтяно аволь кодамояк юбилейс. А мезть майсевемс. Ардтнят валске Валюшонь лавкав ды рамат покш-ламбамо арбуз. Седе вадря казне, зяро иля вешне, а муят, – превс путымим псиденть кудонь панжадо сиве халатсонзо Груня, поладызе тевензэ.

– Виде! Виде – седе а ков! – серьгединь, теке эйкакш, кецнезь. – Кода тень эзь панжово те – превс эзь саеве? Кие эзизе марсе валмеревксэнть: аватнень черест кувакат, а превест… Вана теть нурькинеть! Сень кис яла пря шнатано: минь, минь, цёратне, превейть, докат! Эйстэст вейкенень теяк эзь чулгово – рамамс казнекс арбуз! – шныя, аноколинь «сырнень валонзо» кис Грунянь турвас паламс.




Вандыде мейле


Э-эх! А шказо уш ниленть трокс кирнявтсь, ашолгадсь. Саты теть сэставтнемс-мерькамс ацамотнень. Зюнзютне учить. Атякшоськак астяко кирьгапарензэ разди, ледстни эседензэ ды зярс чувто лангсо авакштонзо.

Штавтыя лангстон лембе, истямо вечкевикс вельксэнть, ацые таркам ды карминь пурнамо-сэрнямо, эсь мельган якамо.

Ушодовсь од, лия чи. Менелень прявтось эрьвела, мизолдыця вановтсо келейстэ вансь вальматнева ды валдонь кельсэнзэ тердсь мартонзо эскелямо, вейсэнь тевень тееме, тердсь ушов.

Стясь тона кудосо, пурны ацавксонзо, састыне козкстни, васты маней чинть Груняяк. Лисинь ушов, саинь латалдо койме ды ютынь кудонок удало модамарень пирезэнек. Шказо, таргамат. Чемень сэвинзе лопаст, касомаст касовсь.

Коймем сялгавтан куракштонть аламнеде потазь – илязо керяво модарне. Ванан текенекс илязо мараво, вельтяво, илязо кадово модас. Аволь покшт тедеде модамартне. А кона ёндо улемс вадрякс, пиземеть ульнесть – чеменесь сэвинзе. Кенярдт, яла мерить, сенень, мезе ули, мезе пазось макссь.

Коймем ды кедень-пильгень содыть тевест, путыть вий – таргить кастозенть. Велявтови ундокс, омбоце… кеменце… Капши, а кадови чувицятнеде пряудемеськак. Эйсэнзэ мельтне кашкить-эвтить пизэсэ коткудавокс. Сынь оймамо а содыть. Ансяк удомсто энгамить. А содыть оймамо Черькайтнеде арсематнеяк. Неемс Наталень, кортнемс Теряй лелянь марто. Сон неявсь, зярдо сакшнось тенек, валонь кирдиця ломанекс, редия теньгак – сон келейстэ ды домкасто арсиця, ламо ловныця. Те истякак содави. Апак ловно, ламонь апак сода аволь романт, ёвтнеминеяк аволь сёрмадо.

Вастовтано – карман седеяк парсте содамонзо. Натальдеяк… Кие сон, кодат содамочинзэ? Косо, мезекс важодсь пенсияв туемадо икеле? Вастовтано – теевтяно, кемеви, седе малавиксэкс. Кие, кода-мезе, те весе… Неемс, варштамс сэнь эрьке сельмезэнзэ, марямс… Вана мезе превстэнь а лисни, вана мезе монень эряви васняяк, вана мезе уски, терди тензэ…

Арсезевинь лия покш тевде – одс вельтямс, кадык зярс аберяньстэ ашти, кудонок, путомс неень шкань лато, келькшсэ вельтязь жестень.

Сась Груня. Комась, кундась мода лангс ливтезь модамартнень кочкамо ды ведрас веркасто кайсеме. Тоцк-тоцк, байк-байк… – маряви кайсемстэст велень келес. Эрязкалезь, теке сараз поксари моданть кавто кедьсэ, иляст кадово модартне модас. Нетькстнэнь ёртни-вырновтни ве таркас.

Тевенек моли увсо. Зярдо пешкедсть кедьгетне – эйстэст кеменьшка, – сялгия коймем ды ушодынь латалов кандтнемест. Явномадост мейле – видьмекс, ярсамс, ракшатненень – нолдасынек кавто лазсто стазь олаккева мацтс. Молевкс кавто пешксе ведра марто вейке, омбоце, колмоце… Зяроксть илязо уле, превтне тевест содасызь, пильгетнеде-кедтнеде косояк а кадовить – мезде ансяк а арсить!

«…Течи прядомальть, ансяк, пелян, а прядовить, вете соткат, аволь аламо. Кажось эно апокш, ванды «сявордсынек». Мейле рунготнень ёрвалдомат. Сисем часос эряви улемс анококс. «Вастовтано Черькайтнень марто, мейле мезе, мезе седе тов? Мезе, мезеяк арась…» – бизмолдсть прясон кевкстематне.

«Кодамо панар оршан? Маряви, раужо кикс марто ашонть, моли тень. Туить куштаз, валдо тюс понкстнэяк. А Груня кода пурны-сэрни?» – нурясть, полавтневсть ловажань кудосост мельтне стака ведрам марто тей-тов яксемстэ.

Таго саия кедезэнь койменеденть, таго карминь сявтнеме нетькстнэнь, бажинь таргамс модамартнень лангс, неявост ды ён улезэ сынст кочкамс. Кочкак, Груня, поксаряк, пештть кедьгетнень! Неть ансяк валт, сонзэ эзь саво кармавтнемс, тейсь тевензэ те аволь веркатнестэ ломанесь – кияк мельганзо а кенери. Сави шнамс, кол авась пирень-кудонь пень а содыця тевтнесэ. Варма, а мерят, аволь эрязкалицятнеде, тень лангс апак вано, тевенть теи куроксто ды вадрясто.

Котьминек чикуншкас. Ярсынек-теинек, лекстинек ды, сиземанть изнязь, поладынек ушодозенть. Телень перть теде-тонадо байтяк эряви, эряви эстенек, ошсо эриця эйкакштненень, аволь аламо эряви кардосо кирдевицятнененьгак…

Пе путынек модамарень таргамонь мелявкстнэнень чивалгоманть якстерьгадома шкастонзо. Чипаесь, кода миньгак, арсесь оймсемадо, арсесь шка максомс экшела менельсэнть сюрокс мендявозь сэняжа муворонтень. Сиземадонть эскелинек Груня марто стамбаро, пильгень ускозь, ялатеке мелень витезь – теинек чинзэ перть ламо. Молинек чатьмонезь. Кортасть кисэнек мацт лангс кандтнезь ведратне. Пиземеде пелемс а сави, пеледест ламо модаренек лато алот.




Арсят истя – лиси лиякс


Кудосо шлинек-ёрвалдынек чаманок-кеденек, нардтнинек шлямонькаенть ваксс эскес понгавтозь чевте нардамосонть. Груня шкань апак ёмавтне кундась стуворонь анокстамо. Мон оршнинь кудокс ды озынь коникс, оймсемань вельть вечкиця Нузяй ваксс, а истяко чеертне кудыкельга-кува чийнить ошконсо ды промкст ютавтнить. Педявтыя вановтом кулялопасо теде икеле муезь, мелезэнь туиця статьянтень. Ловнан, лексян-пувсян.

Вальматнень копачинзе вецана сув. Букватне «вишкалгадсть». Кармась сундерьгадомо. Груня вельмевтсь тол.

Эзинь кенере ловномонзо статьям, апак учо вить бокас шоркадимим истямо пштикс, эль эзинь серьгеде пиже-ожо вайгельсэ. «Те таго мезень апкаж?! Истямо сэредькс вестькак эзимим куроле…» – чиезь ютась пряван.

Кеминь, юты. Стинь. Тарказост, вальмалангс, путынь книган-газетан, ацыя таркам. Мадинь кунст. Венстинь пильген. Зярс-бути сэредьксэсь аламнеде потакшнось. Таго ушодсь карамо. Велявтынь пеке лангс, оймамо эзь арсе. Видькстынь, мезе мартон, Грунянень.

– Теня, ютак медичкантень, паряк, ёвты мезеяк, потмом палозь палы, – сэредьксэнть лепштязь, сеедьстэ лексезь меринь ним туртов. Сон мезеяк эзь мере, каясь мезе-бути ланганзо ды лиссь. Кадовинь ськамон. Пштикстнэ седеяк сеедьстэ, капшазь кундасть сялгонеме. Мезе, кодамо тюниха марто ансяк а вастоват эрямосонть!

Аволь ламо шкань ютазь келейстэ панжовсь кенкшесь, ды мельга-мельцек совасть велень докторонок Сюватонь Галя, азоравадонть аламнеде сэрей, мельганзо Груня. Галя шумбракстнесь, ютась коникем ваксс, стядо аштезь, таргась юдминестэнзэ градусник ды максызе монень – путомс кавалалов.

– Ней ёвтнек, кода ёжот марят, мезе мартот теевсь-лиссь. Иля эрязкале, – мерсь чевте вайгельсэ, чамазон апак кончтне ванозь, прок сельмень ёвтасызь, мезе эйзэнь педясь.

Мон ёвтния, кода-косо маряви сэредьксэсь, зярдо ушодовсь, кона таркасонть, куролимем-арась икеле. Ормань очобицям кунсолось, вансь лангозом. Шканзо ютазь таргия градусникенть ды венстия учицянтень. Кандызе сельмензэ малав, арсезевсь ды «кецневтимим» «аппендицит» содавикс валсонть.

– Эряви тердемс капшакай, – ёвтынзе неть валтнэнь, шаштсь аламнеде коникем эйстэ, таргизе юдминестэнзэ телефононзо ды кочкизе эрявикс номерэнть.

Монень капшакаень тердемась, мельганзо каштось пачкодсть кода-бути гонгиязь ды теке каськасто. Пеень сускозь, кониксэнть велявтнезь-менчевезь кирдинь акирдевикс сэредьксэнть. Груня ды Галя озасть, аштесть чатьмонезь.

«Кода монтемень Груня карми прядомост модамартнень – превс а саеви. Мезе ськамонзо теи? Э-э-э, цёра, тонь допрок бриндат новольсть . Тонь каня тоначив саить эйсэть? Сат. Сат, ды стамбарнэ-стамбарнэ прядсынк. Э-ка! Муить мезде мелявтомс.

…Ванды сисем чассо вастовома Наталь марто. Вастовинь… Кортнинь-калякинь Терентий Тимофеевич мартояк. Учинь, учинь те часонть! Учовсь… А стяко кортыть: арсят истя – лиси лиякс. Аволь весе эрямосонть ашти эседеть, аволь. Ней зярдо, кода вастовтано? М-хы, пря яжат… Ули телефон. Ули… А косто мусак номерэст? Кодаяк муса…»

…Совасть, талай чокшненть лангс апак вано, нупалентень, козонь путымизь, ашо халатсо, сэрей, ведьгеменьшка иесэ цёра-врач ды почаня пря, эчкела рунго, мизолксонь казниця од тейтерне, медсазорнэ. Содылинь: те цёрась – Пичелень, фамилиязо Пивцайкин, лемезэ Пётр Иванович.

– Ну, кодат теветь, откерь? Кода ёжот марят, мезе лангс пеняцят? – лангозон ванозь, пшкадсь тень пеедькшнезь, паро ёжосо, ормань очобицясь. Саизе кедьстэнь градусникенть, педявтызе вановтонзо лангозонзо.

– Теня, – лавшо вайгельсэ ушодынь ёвтнеме ормадон…

Докторось кайсевтимим. Чатьмонезь токшизе-вадяшизе пекеалксом ды мерсь вакссонзо аштиця ашо кавшаня прячерь медсазорнэнтень:

– Нейке, шкань апак усксе, анокстынк операцияс, – ды кавонест вейкест-вейкест мельга лиссть нупальстэнть.

Кадовинь ськамон, эсь мелень-арсеман марто. Марсинь, келя, те керсемась-стамось аволь стакатнеде, шождасто тееви ушодыця хирургонтеньгак. Ялатеке эрьва мезть лиснить те «шождаканть» ютавтомстоэяк. Косто а косто саевсь ды совась потмозон кодамо-бути ризкс-навола ёжо. Эрьва мезть лисснить… «А! Мезе ули – се ули!» – оймавтнинь эсь прям, кшувавтнинь превстэнь чопода мельтнень.

Сёлмон нолдтнинь стяко.

Нупальтнева валскень ютамо шка. Кой. Састыне панжовсь сэрей ашо кенкшесь, ды совасть тенек Пётр Иванович ды, кода свал, медсазорось. Эскельдясть коникем пес.

– Ну, кода ёжот марят, откерь? – коникем вакссо стядо аштезь, пеедькшнезь пшкадсь тень исень валсонзо ормань менстицям. Керявксом эзизе варшта. Саизе венстезь кедьстэнь градусникенть ды ютавтызе ланганзо вановтонзо. – Ниле чинь ютазь, цёра, улят кудосо. Сырькаеть вакссо кармат ёжот витнеме. Ансяк, ва, ирдезт иля яжа, стакат иля кепсе, ве таркасо мель путт а аштемс, яксек састыне.

Кунсолынь ды арсинь: кодамо паро профессия кочкакшнось Пичелень те эрзянь цёрась. Кода а сюконямс сырнень кедензэ кис?

Лездыцязо та-мекс лиссь. Палатантень апак учо кадовинек кавонек. Пётр Иванович озась каршон чаво коникенть чирес ды, кумажанзо лангс нежедезь, лангозон пштистэ ванозь, апак учо кортазевсь допрок лиядо.

– Ванды, содат, таргочи, кочкамот. Кинь кис кармат вайгелеть максомо? – мизолдозь, валаня кемевикс вайгельсэ кевкстимим Пивцайкин. Чатьмонезевсь. Учось, мезе ёвтан.

– Кода кинь? А мезть кортамс, Мештевень, содазь… А мезе? – кониксэнть кунст мадезь аштезь, апак арсе ёвтыя, мезе кирдевсь превсэнь. – Сондензэ, лиянь, а кинь.

– Мон мезеяк а мерян, эрьванть эсензэ арсеманзо… А мекс аволь Прявтонть кис? Вант, кода мелеть, ансяк монь сялдовтсамак, а максындерясак вайгелеть Прявтонть кис. Мерить тень: эзик топавто мерезенть, тень кис, парсте содат, а шнатадызь. Ярмакт тень-сень рамамс а максыть… – нусманясто мерсь мезе мериксэль каршон аштицясь.

Кунсолынь прявт врачонть, ды потсон киштсть, невтнесть сюрост ды пижнесть ошонь келес вардолевкст: оно, оно кода прявтт пурныть, оно кода масторсонок ветявить тевтне – кенгелезь, тандавтнезь, салазь, секс варявт зепенекак…

Саимим седейскириця, нусманя ёжо.

Сеске Пётр Иванович ламо содыцясто, превей, шназь цёрасто теевсь чаво пряпотмо, сэрьс-чамас дёкуш, тутора рунго ломанекс. Лангозонзо ванозь, нусмакадынь, мелем, кой-мезе тензэ ёвтамс, – ёмась. Жаль тень марявсь.

Ломанесь, кадык аволь эрьвась, улезэ ломанекс, валдо мельде пешксе пря, ванькс ойме ломанекс, аволь налкшкекс кинь-бути кедьсэ. Яказо сон эрямонь китнева прянь кепедезь, каштанчинь содазь, азорокс. Улевельгак истя…

Кавто-колмо чинь ютазь пшкадинь Пётр Ивановичнень – седе курок, шкадо икеле, нолдавлимим кудов. Грунянь кедьсэ, меринь, прядса пичксемань курсам. Колмоце чистэ, чикуншка малава, окойники, вановтом вастовсь сэнь-пиже коня, валдо сельме кудом марто. Лу-уньк мерсь седеем кенярксонь ёжодонть. Исень нусманядонть эзь кадово челькинеяк.

Кудо, кадык сон аволь монь лемс сёрмадстозь, путынь эйзэнзэ зняро, зяро сонзэ неень питнезэ. Ялатеке сон кемевикс лато: эжди цят якшамотнеде, вансты юргозь-вешкезь пувиця ушонь ды эрямонь бурятнеде.

– Я! Те тон кода шкадо икеле? – эль кенеринь мельган кудонь стака кенкшенть пекстамо, вастымим Грунянь човине-сэрей вайгелезэ, эскельдясь каршон. – Мерекшнить, вандыде мейле нолдатадызь.

– Истя уш лиссь, – эзинь карма ёвтнеме, кода-мезе ульнесь педе-пес.

Оршнинь одс, ды совинек Груня марто икеле кудос, озынек чевте диванс.

– Кода прят марят? Ёнсто ютась керсемась-стамось? Лия мезеяк эзть керя? – пеедькшнезь кевкстимим Груня. Озась седе ёнсто, нежедизе кутьмерензэ диванонь удалксонтень, учось.

– Теня, эзинь маря, эряви варштамс… – Грунякс пеедькшнезь меринь кевкстнеманзо каршо.

Ёвтния педе-пес, кода ульнесь.

– Пекеть вачсь? Ярсамо кармат? Оно мезе, – кепедизе, «оно»-ть лангс лепштязь, вайгелензэ, юхадсь вить кедьсэнзэ мештензэ икелльга Груня, – гайневтсь Терентий Тимофеевич. Кевкстнесь, мекс эзинек сакшно тенст, кода кортазель, инжекс. Ёвтыя тувталонть. Истямо мель ёвтась: садо, зярдо савтадо. Максызе телефононь номерэнзэ. Оно, вальмалангсо конёвпанкскесэнть. Мусак. Икелест, видькстан, чумо теинь – эзинь гайневте асамодонок, – паро кулянь ёвтыцясь сурсонзо нардынзе турванзо, стакасто, виень путозь витемтизе рунгонзо ды ютась удалце кудов.

– Паро, колмо-ниле чинь ютазь варштатано, – меринь дивансто стямсто ды эскельдинь Груня мельга. Мария, пекем каравсь, ледстни пештемадо. Озынь свалшкань озамо тарказон стувор экшс. Учан.

«Эрь эно, стяко пелинь, стяко мелявтынь, – арсезевинь, – лиссь кортазенть коряс, читне ансяк аламнеде шаштовсть. Мезе теде полавтовсь? Сюк пазонтень, Везувий одс эзь вельме, Равгак пелеве ёнов чудеме а арси. Колмо-ниле чинь ютазь ультяно Черькаень кедьсэ. Содамс, кода оршазь вастсамизь Наталь? Пароль, кода сестэ, васенцеде вастовомстонок, – нурька пильге, чопода-сэнь човине коцтонь понкст, сэняжа тюс, теке менелесь, ожавтомо ковтыне. Те уш кода пазось мери. Иненть а кармавтсак».




Вана сон кодамо, Наталь!


Пичепев од содавиксэнек туртов молемадонок икеле лиссь вана кодамо тев.

Шумбрачинь кудосто самодон мейле омбоце чистэ, чикуншкань ютазь, совась тенек апак учонь, киде зярдояк арсезьгак арасель, инже – Вельдяень Ирина, Пичелень библиотекаресь, свал ков-бути капшиця, верка, теке штере авась. Паряк, секс истямо коськанаяк? Оршамотне лыйнить лангсонзо.

– Шумбратадо, Паксютт! – ансяк кенерсь совамо, киякссто потолокс пештизе кудопотмонть жойниця ванькс вайгельсэнзэ. – Кода эрятадо-аштетядо? Тевенк молить, мезе лангскак а пеняцятадо?

Аванть аволь книгань-библиотекань кевкстнемадонзо васня талакадынек. Те кода истя, кевкстни – теке Сюватонь Галя медичкась. Меремс мезеяк эзинек мере. «Пеняцямодо» чаво валонзо ютавтынек пиле вакска.

Иринанень ведьгеменьшка. Минек коряс од ломань. Сыретнень юткс а совавтсак. Седеяк – лангс ванозь. Кодамокс иляк лово, эрязачинзэ лангс ванозь сявадыть ламонь сельмть. Моли – мельганзо чиезь а кенерят. Секс сонензэ пароль улемс аволь книгань азоравакс, а сёрмань-кулялопань кандтницякс. «Кунсолока, атя, паряк, неень библиотекартненень улемаяк Иринань кондямокс?! Чийнемс, а мезть нувсемс книгатнень марто чаво нупальсэнть».

– Ютак икелев. Озак, прякан варчить, – сэрей-сорныця вайгельсэнзэ тердизе Груня совицянть. Оно, невтсь панжадо коморсонзо стуворонть, вакссонзо чаво эземненть ёнов.

– Арась, арась, Груня патяй! Сюкпря, шкам арась, – эрязкалезь, прясонзо сеедьстэ чертязь, мештензэ икеле сеедьстэ ахолязь, ёвтызе мелензэ Ирина, кудокуншкасо стядо аштезь. – Мон вана «Валдо» журналонь од номер тенк кандынь. Кеман, Алё лелянь кецявтса! Сон велесэнек весемеде виев книгань «порицясь». Номерсэнть ёвтневи минек велень авадо – Черькаень Натальде. Тынь, Груня патяй ды Алё леляй, аволь минек велень, содасынк сонзэ, а маняван, чульть-чальть. Секс ловносынк сёрмадовксонть паро мельсэ.

Мон аватнень юткс, мезде-кода кортазевсть, эзинь эцне, чатьмонезь аштинь стувор экшсэ ды састыне «варчнинь» Грунянь модамарень истямо кавшаня ды чевте-тантей панжакаензэ. Сускат – келеть нильсак.

Иринань кургсто марязь кавто валтнэде, кецнемадонть эль эзинь кирнявто потолокс, кивчкадсь, ютась пачкан мезе-бути ёндолонь кондямо. Мон стинь, автордыя аванть кедьстэ журналонть ды озынь «ловнома тарказон», мелень ванозь, монськак а содан мезде пелезь, панжия ансяк кандозь «Валдонть». Вельксэзэ-лангозо теезь мазыйстэ, кода кортыть, танстень марязь, – ваны лангозот сэняжа-ашо тюсонь фотокувостонть эрзякс оршазь мазый – сельметь а саевить – ава. Нолдык чумом, «Валдо», талай эзитинь сайне кедезэнь.

Варштынь ёнкскентень, кинь сёрмадовксост номерсэнть. Кузьмин Григорий, Тимофеев Алексей, Пахомов Яков, Василий Ёндол, Радай Васильев… Содавикст, содавикст! Те сынь 30-це иетнестэ ульнесть юронь путыцякс эрзянь литературантень, сынь теекшнизь ашождыне васень эскелькстнэнь. Кода эно, вечкевикс сёрмадеень! Кода а содамс ды а вечкемс масторонть келес содавикс «Кенгелькай» романонть авторонзо Колмомасовонь? Сисемеце классо тонавтнемстэ эрьвантень, кие мезеяк а истя ёвтыль, раксезь-згилязь мерилинек «кенгелькай». О-ох, кода те умок ульнесь, кода васов кадовсть сеть шкатне!

Пачкодинь, лемтнень ды сёрмадовкстнэнь ваннозь, Сыреськина Раиса видьс. Те сон кодызе-сёрмадызе «Авань мазычи» фотокуво марто покш статьянть. Сонзэ кедьчелькесь! Панжия невтевикс ёнкскенть ды сельмень эртевсть… Наталень ёнкскенть келесэ покш фотопортретс!

Ловныя Раянь шкинемань видевксэнзэ весть лекстязь, ютынь омбоцеде. Берянь мезеяк а мерят, парсте, сюпав кельсэ викшнизе Раюш статьянзо. Ве таркасонть – покш абзац – ёвтневи откерьаванть рунгонь-чамань мазычидензэ: «…рунгозо – а эрьва тейтернень сави шнамс пря – тундонь од килей, вановтозо – пицезь пицесы седееть, чамасонзо мизолксось сияждозь сияжды…».

Видестэ, петнявкскень пес видестэ невтизе. Ансяк теде, видькстан, ловномс монень а мезть. Неия, латынень кельсэ мерезь, в натуре, аволь кодамояк алкинепитнень артовкссто. Аволь ансяк неия, вана нейгак гайгезь гайги пилесэнь сырнень вайгелезэ.

Таркань ютазь сёрмадыцясь ёвтни Наталень ошсо ды велесэ кудоютконь, кардазонь ды пирень ламодояк ламо мелявкстонзо. Уски сынст, кода сёрмады Рая-Раиса, – лишмекс. Те уш, монень маряви, вельть казямосто – лишмекс. Эряволь седе чевтинестэ. Теке марто журналось теньсэ невтизе аволь ансяк Наталень мазычинзэ, невтизе тевень вечкиця-теиця ломанекс. Сонзэ кунсолыть цёрань тевтнеяк, кунсолыть узересь, инксэсь, пилась, мушкорось… Тевтеме, диван лангсо лужалемань эрямось – аволь сонзэ, те аволь эрямо.

Эзия редя, зярдо выр-выр тусь Ирина, мельганзо састыне панжизе кенкшенть, лиссь эмежпирев Груня, мон яла а явован Иринань истямо тень питней казнензэ марто.

Пекстыя журналонть. Кедьсэнь сонзэ кирдезь, сельмень конязь, зярс-бути аштинь озадо таркасон. Арсинь. Арсинь ловнозденть, статьянть кельдензэ, Натальде… Ней сатано тенст аволь кода веёндонь ломанть, а кода талай шкань содыцяст. Тенень лездасть «Валдо» журналось ды Вельдяень Ирина.




Арсезесь топавтовсь


Сынек шкастонзо, кода кортазель Терентий Тимофеевич марто. Чокшнень сисем чассо лоткавтыя «автом» кавтов панжтневиця, тень аламнеде содавикс, кшнинь келей кенкшенть икелев.

– Вана тесэ, пиже пацясо копачазь неть пичетнень ало, эрить-нежедить Теряй атя ды низэ Наталь, – меринь мекс-бути салава талнозь Грунянень, ансяк лисинек урныгайстонть. – Тесэ сынь, прок письмарт, ютавтнить лембе шкатнень. Те таргавкшны чадыковсто ожоковс. Тунда сыть, пизэ пурныть, экшенди – стить, кода нармунть, сёлмо лангс ды саить ки лембе ёнов, ошов.

Панжия потмо ёндо тулодозь сэнь кенкшенть, ды совинек азортнэнь «масторс». Сыргинек пиренть кувалт видьстэ таргавозь, лугасо вельтязь янганть кудынест ёнов. Пирест пелеве ёно, песэнзэ, – ветешка-котошка иесэ пичинеть. Удалост, сеске пиренть тона ёно, прок тетяст-аваст, – свал пиже, пондакш пря сыредеяк сыре пичеть. Сынь ванстыть пелевеёнксонь кежей варматнеде аволь ансяк эйдест, од пичинетнень, ванстыть пиренть куншкасо оно се чувтонь кудынесэнть эрицятненьгак, Черькайтнень.

Яннэнть, кува Груня марто эскелятано мельцек-мельцек, кавто ёндо пирить васня инзеень тусто куракшт, мельгаст – шукшторовт, торлат. Сынст удалга, керш ёнга, – аволь сыре умарьчувтт. Сынст мазылгавтыть ожола, пиже, якстере умарть. Те тешкс азортнэнь, васняяк, кеман, Наталень, мелявксчидест. Ве аэрявикс, зыян тикшине а неят – косо ледезь, косо мелень путозь чупонезь-изазь.

– Неят?.. – састо эскелязь, тей-тов ваннозь, марямга, прок экскурссиянь ветниця, пшкадинь Грунянень, ахолдынь керш кедьсэнь умарьчувттнэнь пелев.

Умарьков. Ушосонть општ. Маней. Менелень сэньштесь, маряви, салавине, эль марямга гайги. А неят пельпакшке. А рестыця пси, а экше, кодамо эрси те шкастонть. А сеськеть, а карвот. Певтеме мазычи ды медьарвонь чине кошт. Лексят лексевлить! «Мекс, мекс тенек свал мезеяк ды а саты, мекс свал маряви тесь-тонась аламо, мекс а содатано пештявома? Валдочама чить, сэрей вирть, келей паксят, сэнь сельме лейть-эрькеть, морят-океант, пандот… Весе сынь минек… Эряк, кецнек, морак! Мезе тенек невак эряви? Топодтяно-арась зярдояк?» – арсезевинь, седеем колавсь тувталтомо.

– Неян, – нурька чатьмонемадо мейле прась Грунянь кургсто, теке пупордясь, валось. Мелезэ кортамс арасель – ваннось, мезе касы-кастови перьканзо, велявтнесь прянзо тей-тов.

Терентий Тимофеевич ды низэ Наталь аштесть озадо кузтемпень лато ало. Неявсь, учость. Редимизь, стясть, лангозонок ванозь ды эсь ютковаст мезде-бути кортазь.

– Шумбрачи, шумбрачи! – каятотсь човор, азортнэнь ды минек пельде.

Теряй лелям венстизе вить кедензэ монень, паро мельсэ лепштинек кедьлапанок, сэнь сельмесэнзэ цитнесть кеняркс ёжонь сяткинеть. Нолдызе кедем ды парсте марямга, прок ушман, яволявтсь:

– Мон тынк кедьсэ ульнинь. Секскак содавтневемс а мезть, Теряй атянь содасынк. Тыненк Груня марто мон саван лелякс, секс тынсь чарькодьсынк, кода тень пшкалемс. Покштянь-сырькаень койтнень эрявить ванстомс, – паро ёжосо, мизолдозь, макссь тенек, одтнэнень сонзэ коряс, превть

– А мон – Черькаень Наталь, тетялемем – Викторовна. Саван кавоненк туртов, кода маринь, кирдажокс, – пеедькшнезь содавтызе эсь прянзо азоравась, теке мель путсь невтемс ашо, цитниця вейкеть пеензэ. – Паро, теевинек, окойники, седе малавиксэкс. Мон те велень, ансяк пенсияс туемазон сакшнынь аволь сеедьстэ, сакшнынь авань варштамо. Шкань ютазь … Ну, те уш лия моро.

– Монень чачома чистэнь саезь мерить Груня. Минь Теряй лелянь марто ве велень, аволь Пичелень. Мелявксонок, кода велень эрицятнень весень: ботатано чоподасто чоподас, пе а содатано, кудосо-кардазсо, лембе шкатнестэ – пиресэ. Лисни, минь Алё марто – алкуксонь велень эрицят, – чамдызе потмонзо ним, кузтемпесэ Наталень каршо аштезь.

Колмо-ниле валт ёвтынь эседень, Алё-Алексейде. А вечкеви, зярдо тень истя пшкадить. Мекс – а содан.

– Мезе, адядо кудос, – апак учо каятотсь, шаштынзе веёнов содавтомадо кортамотнень, Теряй лелянь чевте, вечкевикс вайгелезэ. Корты сэтьместэ, кунсолыцянзо марязь. Бути кодамояк пелькстамо, ушоды кортамо, мезенть редия невак икеле вастовомстонок, псистэ ды кемевтезь, а поты, мерезенть а полавтсы.

– Ужо, атя, иля капшавто, – сорновтызе раужосто артозь прячерензэ, сертизе поланзо азоравась, – адядо васня, инжеть, невтьса тенк, пря шнан, «эмежуманок».

Теряй лелям мезеяк эзь мере. Озась удалонзо эземнентень. Моньгак арасель мелем, каня эсенек пурькатне-якстерькатне лият? Седе ён, седе мель витевель кадовомс теске. Арась, тень ловия мелень аваномакс. Секс апак капша, перькан ваннозь, увол-авол сыргинь Груня ды Наталь мельга.

Валтнэнь ёвтазь, Наталь саимизь – сонсь икелев, теке экскурсиянь паро ветиця, – кудонть тона ёнов, икелев, косо кастовсть эмежензэ – эмежпирев. Састо, киртязь эскелькссэ эскелясь пандятнень юткова, сонсь, кедьсэнзэ тей-тов невтнезь, лодорсо, паро кайкссэ-мельсэ ёвтнесь пирень путовкстонзо.

Ёвтнесь, кодат парт тедеде ульнесть чурьканзо, лепиякшнозь ёвтнесь ожолгадыця помидордонзо, пурькадонзо, таргазь модамардензэ. Лия ёвтнема ютавтсь куяртнэде.

Эмежтнеде «экскурсиясь» прядовсь. Ветицязо саимизь «эрькензэ» ваномо. Те – кеменьшка-кеветеешка метрань келесэ-кувалмосо, метрань сэрьсэ ведте пешксе чувовкс.

– Ведезэ, нетядо, чемень тюжа. Маштови ансяк валномс. Теяк паро. Ялатеке эйсэнзэ калтнэнень эрямс маштови. Эрить. – Тень эйсэ ванноманок прядовсь. – А ней, оят-ялгат, – ахолдась «эмежумань» прявтось кедьсэнзэ, – адядо варштадо эрямо пизэзэнек…

Якинь аватнень марто пандяюткотнева ды превстэнь эзь лисне мелесь: мекс минек эмежень, умарень кастомань профессиясь васенце таркасо ды весемеде вечкевикс? Ламотнень-ламотнень туртов модасо котьмамось – васень тев. Артист – превсэнть эмежть, инжеер – эмежть, седеень хирург – эмежть, тонавтыця – эмежть… Мик балеринаяк – эмежть! Логигань коряс эряволь тенек копачамс планетанть модамарьсэ, помидорсо, куярсо, чурькасо, капстасо… Тень таркас усктано сынст Египетстэ, Израильстэ, Мексикасто, Белорусиясто, Грециясто ….

Те кода истя? Месэ тувталось? Вейкеньсэ: вельть ламот – «агрономт». Кастыть эмежть сеть, кить «эмеж» валонтькак а содасызь. А содыть, кона ёндо модас озавтомс чурьканть. Эрьвась эсензэ тевензэ кода эряви топавтозо! Балеринаськак… Фараонтнэнь пингстэ саезь ульнесть сюронь кастыцят, кевень таргицят, кевень лаксицят, кепсицят, путницят…Истя вана! Истя апак явно, зярдояк Эфиопсонь пирамидась, Модамасторонь дюниясь, путозь зярдояк аволь уле.

Теряй атя нучказь аштесь таркасонзо. Арсесь. Оймсесь. Учось самонок.

Кайсинек кузтемпенть икелев карсеманок ды азораванть мельга мельцек-мельцек сэдявкскенть ланга, колмо-ниле чалгавкстнэнь изнязь, кузинек-совинек кудыкелев.

– Вана тесэ, – чольдердсь, сизема эзь сода, Наталень вайгелезэ, ахолдась кедьсэнзэ керш ёнов, – кода поладкс кудонтень – баня. А вана эрямо пизэнекак, – панжизе ожола-тюжа покш-сэрей кудокенкшенть.

Совинек кудос.

«Алкукскак «пизэ», – арсезевинь, зярдо эскельдинь лиятнень марто кенкшалксонть трокс «зепешка» нупальс. Кельгсть эйзэнзэ: керш ёно – диван ды мельганзо стуворнэ, вить ёно – голландка ды кезэрень пингень апак лотксе урныця кельмонькай. – Велявтомс а косо. Кода эрить?» Икельце кудоськак теке – пештешка. «Кода эрить?» – эзь лисне превстэнь.

Икельце кудонь каршо стенасонть Наталень раужо-ашо покш портретэнзэ. Вейке фотокувосонть сон балеринань оршамосо, теи балетэнь па. Фототнеде башка, мезть ансяк арасть понгавтнезь стенаванть: театрань ташто афишат, грамотат, газетасто керсевкст… Пианинанть лангсо част, книгат, покш ваза, конёвонь кувта, бальцянонь кечине, ашо илевстэ мазыйстэ кодазь кептерь…

– А ней, инжеть, – стувор экшс! – кармавтыця жой вайгельсэ мерсь Наталь, ансяк прядызе ёвтнеманзо кудочидензэ.

Ютынек удалце кудос. Мерсь озамс таркаваст аравтнезь эземнетнес. Калдор-калдор ойсинек.

Груня – стуворнэнть тона пес, келей вальманть икелев. Сонзэ каршо – мон. Теряй атя – монь ваксс. Наталь эзь оза. Сон азорава. Удалонзо плитанть лангсто саизе рестазь модамарь пачалгонть ды путызе стуворонть куншкас. Кельмонькайстэ таргась салатто пешксе вакан.

Те «вакандонть» кой-мезе лия ёвтама. Эйсэнзэ ве таркас керсезь кенерезь помидорт, куярт ды чурькат, аламнеде почодовить салсо, каяви майонез эли чиньжарамой. Парсте човорямодо мейле ярсамось анок. Груня лездась керсемс кши, печтькетнень вачкинзе вакашкес, таркаваст путнинзе пенчтнень. Кодамо ава а муи эстензэ стуворэкшень тев? Салатось – монь вечкевикс ярсамопелем. Маряви, сондензэ тантей мезеяк арась. Порян… Теке теде содась Наталь!

– Эряволь куш пенчкень-пенчкень, – Теряй атя кепедизе прянзо стуворонть велькссэ лавсиненть ёнов, тов, косо кирдевить зярыя сортонь чаракавтыця ведтне.

– Минь тонь марто, атя, коське кургот, Алёяк Груня марто, содан, истятнэде. Сестэ кинень нуртямс? Стуворонокак аволь неень шкань, пепсить-мепсить эйсэнзэ арасть. Весе эсенек. Экологически, кода ней кортыть, ванькст, – ливтнесь стуворонть велькска Наталень гайгиця вайгелезэ, «пенчкень-пенчкень» мелесь яволявтозель аэрявиксэкс ды шаштозель веёнов.

Истя тантейстэ, мик мазыйстэ, рестазь модамарде, монень марявсь, зярдояк эзинь ярсне. Теке Груня истят зярдояк эзь рестне. Пачалгось, ванан, чамсь куроксто. Лисни, тусть аволь ансяк монь мельс.

Ярсамонь кирдась прядовсь. Наталь урядынзе стувор лангсто кедьгетнень ды ушодокшнось кофень кайсеме. Ушодксонть колыя мон.

– Ужо, иля капша, – кепедия кедем ды кардыя сонзэ, мезеньгак лиянь апак ёвта, меринь аламос учомс. Чатьмонезь стинь таркастон ды эрязкалезь лисинь ушов, ношкстынь «Нивам» ёнов.

Курок велявтынь. Эль-эль панжия кенкшенть ды совинь кудос. Мештезэнь лепштязь, кавто кедьсэ кирдинь покш арбуз. Путыя, сеедьстэ лексезь, стака канстом вальманть каршо келей эзементень. Тестэ сеске путыксэлия стувор лангс. Эзь лисе. Савсь путомс мекев ды озамс тарказон.

– Ужо, ужо… – кардымим азоравась. Сонсь куроксто совавтсь кудыкельде покш вакан ды путызе стувор лангс, таргась покш пеель. – Ней тев тонеть, Алё!

«Ну и штере, – арсезевинь Натальде, – эрьва ков кенери! Палозь палыть тевтне кедьсэнзэ».

Стинь таркастон, путыя пиже покш оскам совавтозь ваканонтень, прок пизэс, саия анокстазь пееленть ды керсия ламбамо потьмеж умаренть палонь-пал. Ярсынек ды апак эрязкале кортнинек эсенек юткова теде-тонадо. Шкань-шкань та-кода салава кепсия вановтом мельганок яксиця Наталь лангс. Лангсонзоль, мезесь вельмевтсь мештесэнь кецневтиця ёжот, се сэняжа нурька ожа, ансяк лавтовонь копачиця, ковтась.

Апак учо сыргозсь потсон стихень ловномань толгам. Витемтия рунгом, кепедия вить кедем мештем икелев ды талнозь, каршон вальманть лангс ванозь, пшкадинь Есенинэнь валсо:



А янксян, а тердян, а авардян,

Пингем тусь, прок валскень стямсто сув.

Сёксень поекс пизем ало тардян —

Мештесэм ней аволь тундонь увт.



Тон ней састо веренть сангам пансят

Кельмсэ чавозь, пужозь седеем.

Ды а тердить эйсэм лаймот-паксят

Кепе чийнемс ней арась мелем… —



прядынь меельце валтнэнь ды мария, кодамо стака канст талномадонть каинь лавтовон лангсто. Чамам палсь. Кедем эль неямга сорность. Теке марто, совасть эйзэнь вечкевикс ёжот. Прядовсь ловномам талаень каштсо ды сеске цяпамосо. Теряй атя эсь мелензэ нурькинестэ ёвтнизе Есениндэ, сонзэ шкинеадонзо.

Эзень арсе, превскак эзь совсе, эзимем содавтнея мелесь: Наталь апак учо, вана ней, кази тень истямо седейс педтця, астувтовиця казне.

– Мельвановикс инжеть, Алё ды Груня, ледстнемакс течинь чиденть мелем поладомс Есенинэнь. Алё ёвтнесь поэттэнть стихсэ, Теряй лелям пачтясь тенек шкинемадонзо, мон, прынь мельс, поладомс моросо



Вальмам вельссэ ковось.Вальмам ало варма.

Сиянь тюс тополесь штапьскадомо кармась.



Гармониясь ризнэзь васоло аварди,

Нусманя вайгелесь веленть песэ тарди…



Кунсолынь, мерян видьстэ, апак згиля, кургонь автезь. Истямо ванькс, сэрей, истямо чольдеркай вайгель марсемс тень эзь савкшно, прянь апак шна, радиостояк. Прядызе Наталь морамонзо, озась, талномадонть, марявсь, кундатось келезэ, зярс-бути чатьмонезевсь. Нусманя моронть лувозо, менельга ливтниця вайгелесь яла гайгсь пряудемсэнь.

Кода сеедьстэ эрси, аватнень кортамонь темаст аволь чуросто эрси вейке: эмежть, умарть, пиреть, оршамот, ярсамопельть, питнеть.., цёратнень – лия.

Лисинек Теряй лелянь марто кузтемпес. Озынек тесэ свал кирдевиця эзементень. Чись эскелясь прядовома ёнов. Перьканок васолга-кува чатьмонезь чарасть сундерькст. Опаня. Каршонок маралякс аштиця пичетне аштить, сорк а теить, теке учить мезе-бути покш, мелень топавтыця. Кортамонок мольсь васняяк масторонок, покш масторонок каладомадо, СССР-нь ёмамодо. Покш мель явинек, мекс чикор-лакор молить ве кудосо, ве семиясо эрямонь тевтне, мекс явицятнеде полыицятнень коряс седе ламо, мекс ламо урозэйкакшт… Талновтсь Теряй лелянь, кода моньгак, эрзянь келенть резэма ормазо. «Кие чумось? Мезе теемс?» – кевкстематне сизесть каршо валонь учомадонть.

Теде-тонадо кортамонок мольсь, зярс чипаесь эзь кекше чополгадыця виренть тона ёнов ды эзь эскельдя седе малав сэтьме чокшнесь.




Уле ушодкс ды уле-уле пе


Кизэнь се маней лембе чокшнесь умок теевсь астувтовиця ледстекмакс се вастовомадонть. Ютасть кеменьшка, паряк, седеяк ламо иеть. Ламо ведь чудсь лейтнева. Ламо эрьва кодамо тюсонь ды парцунонь пельть сиземань апак сода уйсть Пичеле велькска. Ансяк сынсь содасть, мезде арсесть ды кодамо тевень тееме капшасть.

«Мезе полавтовсь эрямосонок Черькайтнень кедьсэ улемадонок, се опаня чокшненть ютазь?» – шкань-шкань совси прязон кевкстемась, совси монь апак кевкстне. Мезть кевкстнемс? Мезе ульнесь – ульнесь. А ёртсак.

Полавтовсь ламо мезе. Васняяк, содави, кемень-кеветее иес сырединек. Теде а кекшат. Эрямонок Груня марто кода ульнесь, истя кадовсь. Кудонь-кардазонь ды пирень тевтне мольсть эсест киява, седе ламо, сеедьстэ – каштмолезь. Теезель, мерян апак покшкавтне, ютазь шканть перть аволь аламо.

Ветявтынек газ. Калавтнинек каштомонок. Сонзэ таркас теинь лия нупальне – пидема-панема, ярсамо ужине. Копачинек ташто, сыредеяк сыре кудочапонть пластикень валдо лазсо, сайдинг мерить тензэ. Вельтинек кудолатонок сэнь жестьсэ… Саты, маряви. Каня зняро иень перть «изнявксонок» педе-пес ледстявить? Теяк, кинень сынь, неть «сявордозь» тевтне, эрявить, лиянень, кинень?

Ней икельганок поркснезь асфальтонь кияванть эрьва эскелицясь киртясынзе эскельксэнзэ, полгарьгавтсынзе сельмензэ сэнь-валдо, сэнь-пиже кельсэ кортыця «дворецэнек» лангс. Те вечкеви, рашты потсон валдо, кенярксонь мельть-арсемат. Эно кода эрямс, шешкемс мода кеняркстомо? Мезень кис сакшномс эрямонь паксянтень? Удомо ды пекень пештеме?

Кемень-кеветее иень телетне-кизэтне челькевтеме эзть юта эсенек ютксояк. Мон ды Паксютонь Груня теевинек вейкенек-вейкенек туртов седеяк лездыця, седеяк чарькодиця ялгакс. Бажинек стака шкатнестэ аравтомс вейкесь омбоцентень лавтов. Истя, тевсэ-мелявкссо, кеняркссо-ризкссэ, кивчк ютасть, теевсть ледстнемакс аволь аламо иетне.

Черькайтнень арась урныгаест. Арасель сеть иетнестэяк. Сонтемензэ, содавикс тевесь, – стака. Те кода умонь шкатнестэ кадовомс лишмевтеме. Истятнэнь ломанькс эзть лово велесэнть. Секс Черькайтненень, васняяк Натальнень, аволь чуросто эрявкшнынь: тень ускомс, тонань…

Саемс тунда ошсто велев самонть. Ярсамопельть ускома, эрьва кодат курмот-кармот, сыньгак эрявить… Таштавить аволь аламо. Ардт, ускомат… А редясак, прядови якстере кизэсь, мельганзо, ванат, бизмолды, тарка вешни, сёксесь. Аламонь-аламонь анокстама ошов, телень кудов. Мелявкстнэде прявелькска! Пурнамат, ильтямат: чурькат, модамарть, помидорт, умарть, торлат, эрьва мезе марто эрьва кодат банкат… Ведьгемень вайгельпетнень истямо канст марто а эскелясыть. Лишмесэяк, кода икеле, а усксыть. Ёмасть сетнеяк. Эряви мезеяк сынст полавтыця. Монь – «Нива». Мезе седе вадря? Аволь урныгай – пача, эрьва кува юты, ускияк… Аволь весть, аволь кавкстькак эмежень-умарень кансттнэнь, тундонсетнеде башка, «кандтнесь» лишмень вийсэнзэ «телень кудов» самай те урныгаесь.

Седе сеедьстэ Наталь марто – эряволь меремс Наталь патяй, сон кеменьшка иеде, тагояк ледстяса, мондень покш – ардтнинек кизэнь куншка, кстыень кенерема шкасто, Валдайвелев, буйкуншкань найманов.

А содан мекс, «патяй» валось удемезэнь совамо эзь капша. Мекс – а содан… Мекевлангт, сон айгсь, васолгавтсь эйстэнь аванть. «Кодамояк а патяй!» – сеересь мештесэнь кодамо-бути кольнякай вайгель. Тевесь, бешом, аволь свал ансяк иетнесэ. Улить ёнкст, ёжот, онкст, конатне сынст лангс а ваныть.

Талай эзь чулгово тень, мекс те лемесь монь иетнень а кунсолы, сеедьстэ совси пряудемезэнь, мукшны эстензэ лембе таркине ды бизны эйсэнзэ, теке чаво кедьгес понгозь промо.

Шкань ютазь панжия тувталонть…

Кувать кандтнинь, усксинь, лездынь мейсэ маштынь «Нивасо» вакссон ардтницянтень, те, монень марявсь, моданть-масторонть лангсо весемеде мазый-гайгиця лементень, чамантень, рунгонтень вейкень кис – сон эрясь седейсэнь эсензэ сэтьме эрямосо.

Ламоксть ардтнинек мартонзо ошов, седеяк ламоксть – найманов ды лияв-ков. Зяроксть? Каня ловови! Ды, мерема, тевесь тень эйсэ? Мельсэньгак арасель – ловомс. Усксинек мезе эряви ошов, мезе эряви, сеедьстэ кой-кодат ярсамопельть, – ошсто велев. Вечкевсь мартонзо ардтнемс, мель витсь, мезеяк а мерян.

Велеванть, эзь саво учомс, ёвтасть тень, срадсть-якасть лисьмалангонь келят-мелят. Истя-истя, келя, Паксютонь Алё-Алексей, мазый кудонь теицясь, Черькай Наталь марто тапсеви. Мезть ансяк эзть мендеря! Келесь, кода кортыть, ловажавтомо – сизема тунь а соды, мезе мелезэ, сень банговты. Ули текенень валмеревкскак: эрьванть кургонзо а потомдасак.

Те – келят.

Ёвтнемс, кода ульнесь, тунь апак сёпо?

Ёвтнеса.

Васняяк кодаткак «тапавкст» ютксонок – видьстэ мерезь, вейсэ, ве таркасо удсемат-кеверькшнемат – арасельть. Сёпомадо, эсь прянь идемадо мельгак превзэнь эзь сакшно. Паряк, видькстан, зяро иень перть тень эйскак пачкодевлинек… А содан… Мезть а эрсить эрямосонть… Мон виздинь теемс эскелькс малавгадомантень, пелинь. Кирдинь неть мельтнень потсон. Кекшезь кирдинь. Ёжодон Натальнень вестькак эзинь ледстне, «вечктян» валось кургстон эзь лисне. Вестькак эзия пала, эзия кутморда.

Аволь весть стардокшныя Наталень кудосо эли кузтемпесэ-пиресэ ськамонзо, Теряй лелявтомо. Аволь чуросто пси читнестэ пельсштапо. Ды мезе? Вадря, улиндеряй мелем, путы чай, кофе, аламошка калякатано теде-тонадо ды – вастомазонок! Вана кода ульнесь алкукс.

Истя кемень иеде ламо вечкинь салава, эсь пачкан, кекшнинь вечкемам вечкевиксэнь эйстэ, Натальде.

Лездынь урныгайсэнь. Лиясо-мейсэ. Чинь-колмонь ютазь совсинь варштамо, кортнеме Теряй лелянь марто. Кой-зярдо кулялопань, телевидениянь материалтнэнь, масторсонок молиця тевтнень кувалма пачколинек мартонзо пси пелькстамос. Мерема, Теряй лелям маштсь марязентень, ловнозентень эли неезентень виде питнень путомо, «сэвтнеме», явномо-путнеме. Маштсь диалогонь ветямо. Превей атясь, мезть кортамс. Лия марто Пичелесэ а кинь марто ды а мезде кортамс, а кинень пшкадемс. Сон – ськамонзо. Кулозь веле. Каня алкукс велетне весе истят? Мекс истямос пачкодсть? Кие чумось? Кияк арась? Эли аламонь-аламонь чумотано весе? Улиндеряй весе – те, лисни… кияк. Эрси-арась истя?

Веле, веле…

Сёвонь Микольмезень алкине, олгсо вельтязь кудынест икеле пандочамине. Телень гайги чи. Салазкесэ ды эйгажасо кирякстниця эйкакштне, кода коткудавт пизэсэст: кузить, ардыть, чийнить, пижнить… Якшамось а маряви. Чамаст эвтемадонть якстереть, палозь палыть. Зняро, кодамо вий ды кемема икеле чинтень неть а аштиця рунгинетнесэ! Умок те ульнесь. Пек умок. Стувтомс вана эзь стувтово.

Ней Сёвонень юртсо пря невтни, каштансто ваны лиятень лангс покш, кавто сэрьксэнь якстере кирьпецень кудо. Сонзэ прок кияк мунизе-колдовизе:

Ламо-ламо иеть икелензэ пандочаминесь эзь маря, ды уш зярдояк а мари, а цёрынень, а тейернень вейкеяк вайгель, ве телеяк эзь пурнавкшно кирякстнеме эйкакшонь пизэ.

Велень тевтнеде арсезь, совсить удемезэнь ютазь пингень колоньгемень иетнестэ якстерестэ чудиця лейтнеде сёрмадовкстнэ. Мезекс, мезень кис, кинень эрявсь ильтямс тоначив Теряй лелянь кондятнэнь? Мезе те макссь? Секень вант, теде ламонь кувалма эрьва мейсэ сюпав масторсо эрятано кажосо.

Бути, мельсэнь, колмо-ниле чить кодаяк а пачкодилинь Натальмезнень – кудонь тевть, кодаткак лия тувталт, – эрьва юткошкасто валгиль седейзэнь тошначи, теке ёмавтылинь мезеяк пек эрявикс, педсесь эйзэнь ёжо, теке мезе-бути тень а саты, китны мезень-бути кувалма мештесэнь верень пансицясь…

Вастован те аволь сэрей-келей аванть марто, ды эрямонть каргоцьчизэ поты, валдоми, пештяви безарьксэнть таркас кеняркссо.

Зяроксть эзинек вастневе Теряй лелянь марто, кулелямонь, Натальнень акемемань валт, видьстэ эли чирьстэ ёвтазь, пельдензэ эзинь марсе. Кемсь, кемсь, монень маряви, нинстэнь педе-пес. Кода илязо аште, ульнинек мартонзо ламонь кувалма паро ялгакс. Зярдояк лангозон эзь пеняця, пеень пачк эзь корта. Чевте вайгелезэ кадовсь тень паро ледстнемакс.

Таго Натальде.

Свал кирдинь мель содамс сондензэ седе ламо ды эрьва ёндо. Кие сон, кодат бажамонзо, кодамо вечкевикс, оймень туртов тевезэ – хоббизэ, улить-арасть эрямонь тештензэ, ков сынь тердить? Кодат ютазь кинзэ-янонзо, ков ветить, кодат лия ёнкст корсонзо… Мель явинь, содави, – теевемс седе малавиксэкс.

Карминь содамо: кемгавтово иеть эрясь мирде марто, ульнесь урьвакс. Явсь. Мекс? Эзинь кевкстне. Авадря. А кевкстнить. Сонсь валгак эзь ёвта. Чачтась-кастсь тейтерь.

Пинге важодсь филармониясо морыцякс, ансамбля марто ардтнизе масторонть трокс-кувалт ды трокс-ушкс. Пачколесь томбалевгак. Пенсияс лисезь, кундась кудонь-кардазонь тевс. Путсь эсензэ велес кудыне ды тундонь лембе читнестэ саезь сёксес эри тесэ, чачома масторсо, ютавты чинзэ пирень ды кудоютконь певтеме мелявкстнэсэ. Тевень ды кудоютконь ваньксчинь вечкиця – тень мон редия сеске. Валонь кирдий. Вановтом вакска эзь ютакшно теяк: эйсэнзэ кирдеви микшнемань-рамсемань, ярмаконь ванстомань-таштамонь ёжо.

Нурькинестэ: берянь, эйстэнзэ шаштовтыця, явиця, кодаткак авитевиця безарькс ёнкст эзинь тешкста.

Теньгак а кекшсак, тедеяк мерема: вечкиця седеесь, те уш эседень, – сокор, ламо мезе а неи, ламо мезенть а редясы, юты вакска. Мон истятнэстэ…

А сонсь Наталь?

Кода вансь монь ёндо эрьва мелензэ топавтоманть лангс, кодат ёжот ченгсть-палсть потсонзо? Эли кодаткак арасельть? Каня эзь чарькоде, мезень кувалма, мекс, теке уре, топавтынь эрьва, лиясто стяконь, кольнема ёнов молиця энялдоманзо?

Арсян, чарькодсь, ансяк тевтне-усксематне сайнесть верькс. Лездынь аволь ансяк урныгайсэнь! Васолдо неявиця ожо тюс сайдингсэ вельтязь кудонь чапось, вакссонзо латалксось, пирекенкшкетне, пирявкстнэ – сынь «сювордазь» монь кедьсэ. Соват баняс – мазычиденть аймельгадат! Аволь баня – таташке. Тень теия, чарькодеви, ярмакто. Теия мелень путозь. Теяк, важодевельгак сиведезь ломань, саевель кавксть, паряк, колмоксть седе ламо. Кода илязо уле, чипайкс вандолдыця те кудынесь кадовсь весемеде астувтовикс ледстнемакс Наталь марто ояксчиденек, сеть, ней уш умонь, иетнеде.

Мезде илязо тошка седеесь, бажинь топавтомс энялдоманзо, лездынь. Кирьвалесть-эзть вечкемань икстерькат Наталень мештесэ? Кодат ёжот яксесть эйсэнзэ? А содан. Истят кортамот ютксонок арасельть. Палсь седельмась, велявтсь куловкс… Мезе ульнесь – ульнесь.

«Коське», ламо иень романом прядовсь апак учо.

Весть Наталь тердимим Валдайвелень найманов. Эрявсь, улема. Мезеньгак рамамо, паряк, миеме. Бути эряви ды бути шкат ули, мекс ломанентень вадря а теемс? Сынек шкастонзо. Чипаесь эзь кенерекшне кирвазтеме каштомонзо. Пси эзь маряво. Тень лангс апак вано, ломантне кашкасть, теке коткудавт, вешнесть кинень мезе эряви ды седе уцяз. Эрьва ёндо пирязь келей-кувака таркась увнось вайгельтнеде, урныгайтнень урномадост, тандавтниця вешксемадост.

Аравтыя урныгаем совамо тарканть малас, панжия удалце кенкшенть ды одс озынь тарказон ветямкаенть экшс. Наталь саизе кавто ёндо ды кандызе васня лапужа, аволь домка ящикенть, кандынзе вейсэнь кувака стувор пес, мельганзо – омбоценть. Эйстэст эрязкалезь таргсинзе кстыйде пешксе литрань покшолмасо пластикень ведрынетнень. Аравтнинзе седе мазыйстэ ды неявиксстэ. Стясь стуворонть экшс ды ушодсь, тей-тов ваннозь, рамицянь учомо. Прясонзо кувака нерь ашо кепкине, лангсонзо ламо зепе-зепине марто ашназа тюс панар. Кирьгазонзо понгавтозь кескавне – те сонзэ «кассазо».

Урныгаем пания лия таркас, аламнеде веёнов. Пельспанжадо кенкшканть шкань-шкань варштнян микшницянть ёнов – «чиить-арась» тевензэ? Меремс, ламо рамицянзо, а мерят. Ялатеке аламонь-аламонь, ванан, кирдевицят, кевкстницят-ванныцят икелензэ пурнавкшныть. Седе ламо, кода эрьва косо, эрьва кода кизэкс оршнезь аваломанть. Наталь тевень содазь, ливчанясто кайсесь кстыйтнень ведрынетнестэ рамсицятненень полиэтиленэнь кескавнес, ловсь, сайнесь ярмакт. Ве таркасо, лисни, тевезэ эзь нерьге.

Шкась мольсь.

Ванан, Наталень каршо стясь бурина, палманень сэрьсэ аволь од-сыре цёраломань. Раужо сакалонзо нурькинестэ наразь. Тусто-раужо, теке кренчень сёлмот, черензэ нолдазь лавтовонзо ланга. Марявсь тень, чикуншкань эрицятнень эйстэ. Чамакиськезэ тюжала, сельмензэ-сельмечирькензэ раужот, судозо будолма марто. «Тостонь, тостонь, неяви…» – прынь мельс.

Кемевсь тень, те рамицясь колмошка ведрынеть «амольди» апак кавтолдо. Тень таркас – кувака, монень эзь маряво мезде, налкставиця, сельместэ сельмес ванозь кортамо. Кортасть, кортасть, цёрась апак учо юрк ютась стуворонть пева Наталь ёнов, стясь ваксозонзо ды вить кедензэ, теке мезеяк араськак, теке вакссонзо низэ, каизе Наталень лавтовонзо лангс, норовиксэль паламонзо. Наталь, цильнезь-пейдезь, керш кедьсэнзэ виень путозь тостядизе сакалов альгачонть. Вырк потась визькстэменть эйстэ. Стувтызе, мереват, микшнемань тевензэяк.

Те идем сценась сыргавтынзе тортан. Кирвазинь прякасмосто пильгесурс. Неезесь тень ульнесь гай маней чистэ пурьгинень зэртекс. Кода кирдевсь прям – чиемс кутморицятнес ды кирьгадо чочамс, кадык мондень сэрей, чикуншка ёнксонь раужо черень кандтницянть, – превс а саеви. Паряк, лиякскак теемаль: нолдамаль моторонть ды ношкстамаль кудов. Истяк эзинь тее. Кадовинь.

Найманось прядовсь. Носкозь-чатьмонезь, Наталь пурнынзе микшнемань кедьёнксонзо вейс ды кандынзе «Ниванть» ваксс. Сонсь панжизе удалце кенкшенть, путынзе урныгаенть потс чаво ведрынетнеде-мезде пешксе ящиктнень.

Мон чувтомозь, «кельтеме» аштинь озадо ветямкаенть экшсэ, ванынь икелень вальмаванть, неемс мезеяк эзинь нее. Лездамодо эзинь арсеяк. Вал эзинь правто. Аноколинь сезевемс апародонть. Сорнынь. Эзь кирдеве, потсон гувнось акемемань, кулелямонь тол.

Кальцьк, мария, мерсь кенкшкесь. Озась Наталь. Виень путозь пекстызе мельганзо кенкшкенть. Нолдыя, мотордозевсь моторось, ды састыне сыргавтыя урныгаенть икелев, Пичелев келей кинть ёнов.

– Тон, ванан, анокат мадемс, – эзинь кирдеве, лиссь кургстом, – эрьвань алов. Ёвтынь валтнэнь вайгелень апак кепеде, явнозь-явнозь. Сезия пилес эциця ды кутькиця чатьмонеманть ансяк кенеринек лисеме Валдайвелестэ.

– Нейке лоткавтык! Нейке! – соракадсь, кедьсэнзэ, теке карводо, ахолязь, пиже-ожо вайгельсэ серьгедсь кабинасонть вакссон аштицясь. – Лоткавтык, нейке лоткавтык, лисян!

Мон чатьмонинь. Ёвтазь валдон шожда тень эзь карма. Эзизь оймавто верем пижнематнеяк. Сынст кунсоломо «лишмем» эзь арсеяк. Кургонь пекстазь пачкодинек Пичелес, пачтия Наталень кшнинь пирекенкшест икелев. Лоткавтыя «Нивам», панжия удалце кенкшенть, капшазь таргсинь ящикензэ-мезензэ, пекстыя кенкшенть, озынь ды велявтынь ажиян кудов. А монь, а Наталень кургсто эзь пра валгак.

Мезе сестэ, кизэнь се маней валскестэнть, лисекшнесь наймансо микшнемстэ, чумоль-аволь Наталь, кадовсь асодамокс, ваясь шкань чопода потмакстомо отьмас. Паряк, а истя теекшнинь? Кода, алкукскак, а покордавомс тензэ валтнэде, конатнень ёвтакшнынь сестэ ды конат эзть стувтово течис? А кода сестэ улемаль эстень?

Истя прядовсть ламо иень перть вастневеманок, ояксчисэ ды аволь кеняркстомо эрямонок. Кадовсть эйстэст, кадовсть видькстамовтомо вечкемадон валдо, ёжонь витиця ледстнемат. Паряк, те ульнесь ванькс-маней, прок од шкань, вечкема? Монь ды …сонзэ? Эли те ульнесь седейшкавань ояксчи? Содык варчик…

Чуман? Кевкстнян ней эсь прям цянавокс ливтниця иетнень ютазь. Кочксян прясон кеняркссо эрязь иетнень ды янксян, мекс истя шождасто, мик псистэ, кемзисемге иесэ цёрынекс нолдакшнынь кулелямонь ёжон… Мекс сестэ эзть кирдевкшне ведьмень?.. Эряволь тень седе превейкс улемс… Эряволь, эряволь… Удалце превсэ минь вейкень пес превейтяно.

Те ней, ламо иень ютазь, васолдо, ён, паро кортамс, превть максомс, астака улемс откерекс. Сестэ… Ломанень оймесь, яла кортыть, – чопода. Сонзэ панжомга, седе домкасто содамга, вейсэ эрязь, ютама ламо келей-кувака кить, конатне ламонь таркава почодозь поркснезь суликасо.

Омбоце ава марто эрян. Курок топодить кемзисемге иеть, кода Груня марто вейсэ нергтяна. Ды мезе? Грунянь корозо таркань-таркань каднови чопода векс. Истямокс уш, мерема, сась Ломанесь Мода планетанть лангс.

Абунгалемс а мезть: Модамасторось, Менельёнкстнэ ды весемесь, мезестэ сынь аштить, эрить-кирдевить авейкетьксчинь коенть лувсо. Эрьвась – сонсь. Модась, Ковось, пиземень байгинесь, молекулась, атомось… Лия истямо, сонзэ кондямо, – вешнек эрямопинге – а муят. Видестэ вейке ине поэтэсь мерсь: эрьва калмонь марнэнть ало калмазь Чипелькс.(косо-бути те мелесь ёвтазь, икеле)

Черькаень Наталь кадовсь паро, чинек-венек тевсэ лакиця ломанекс, ялгакс. Кодамо сон обуцянь, коронь коряс, потмоёндо, кемень иень перть эзь панжово. Тень туртов эрявсь ютамс кувака, чувнозь-лазнозь, таркань-таркань поркснезь суликасо почодозь ки. Ды аволь вейке-омбоце вайгельпе. Эрявсь эрямс вейсэ, ве кудосо. Ды аволь ие-омбоце. Неия, наймансо тонол раужо пря цёранть марто эльнемадонзо башка, ансяк паро ёндо.




Кевень седей





Кода теть пшкалить?


Кизэнь маней аволь пси чи. Аловелесэ ютавтовсь эрзянь кезэрень Озномань покш кой-кирда. Сакшность эйзэнзэ эрьва ёндо ламодояк ламо ломанть, морыцянь курот, киштсть-морасть аволь ансяк тестэнь, лия ёнкстнестэ сыцяткак. Ульнесть зярыя омбомасторстояк. Истят Эрзянь Инешкипазонтень Озномат-покшчить ютавтневить вельть чуросто.

Прок кодаткак раужо, тандавтниця пельтькак зярыя пингеть а кирдевить эрзятнень велькссэ. Моротне-киштематне, налксематне, эрьвела ёжотне жойнесть-шалность чадыведекс келей луганть келес. Певтеме мизолкст, пеедькшнемат, кенярксто цитниця сельмть…

«Мекс ломантне куш аламнеде васов а ваныцят, сокоронь кондят? Мекс неить ансяк сень, мезесь судост ало? Мекс марить ансяк сень, мезе мерить верде? Мекс эрить ансяк течинь чисэ?» – чарасть-велясть ды эзть паневе, прок кирмалавт педясть, Ёгань Тимань Теряень превсэ арсематне, зярс эскелясь таркантень, косо учось бусост.

Покш чинть прядовомга цёрась сыргась кудов. Пазикесь, конас кузсь-совась, – пешксе. Ютась удалов. Муевсь, теке сонзэ учось, чаво таркине. Варштась тей-тов, озась. Эйстэнзэ вить ёно аштесь, вал эзь правто, келей чама, валдо черь-чама цёра, керш ёно – ава. Сэрьс, озадояк чарькодевсь, Теряйде аволь сэрей. Нурькалгавтозь тусто черензэ судрязь човоньс, сюлмазь парсеень лентынесэ. Тей-тов юхаить пулынекс. Теряй эськанзо тешкстызе: «Аволь цивтор журналтнестэ, ялатеке ваксканзо лангозонзо сельмень апак кая а ютат…».

Зярс-бути ардсть чатьмонезь. Кунсолость икеле таркатнесэ озадо аштиця аватнень лужаня кувака морост ды седямонь таркас моторонть урноманзо. «Теяк, – сась мельс Теряй, – мезть, мезде кармат кортамо асодавикс марто? Келентькак онкстязь кирдемс кавто часонь перть, кудов пачкодемазонок, а ён». Илязо каназкадо…

Васенцекс кшувавтызе лепштиця каштмолеманть, эскельдясь троксканзо, макссь вайгель, Ёгань цёраст – Теряй.

– Кодамо, тонь койсэ, морокуро морась весемеде парсте? – велявтызе шержей кавшаня черь прянзо аванть ёнов ды салонсонть морыця вайгельтнень пачк серьгедезь серьгедсь чатьмониця, икелев ваныця шабранстэнь; керш лавтовозо тень пингстэ, маризе, токавсь аванть вить лавтовс.

– Кодамояк, – ёртозь ёртынзе валтнэнь, велявтызе прянзо, варштась кевкстниця цёранть сельмс асодавикс авась ды апак кавтолдо, мештензэ икеле кедьсэнзэ ахолязь, ёвтызе эсь мелензэ. Кортамсто човине турванзо ютксо кувтолк-кувтолк кивчкаесть вейкеть ашо, теке артозь, пеензэ.

«Вый, кодамо мазый! Косто Инешкипазось кандызе тей истямонть? Сэнь сельмть, аволь кувака, эль редявикс будолминев судо, пеень ванстыця турват… Истямо чуросто-чуросто понгони сельметь икелев…» – токавсь, сась мельс цёрась.

– Те кода истя? Истя, мон меревлинь, а эрси, – берянесь вадрявтомо а эряви. Те – пингеде-пингень кой. Сон киненьгак а полавтови. Кияк ды морась ветень питне, – вить кедьсэнзэ Теряй юхадсь икельганзо сравтневикс коштканть, псистэ варштась сельмезэнзэ, эзь пра вемельс сеедьстэ кортыцянть марто. Гайгиця вайгельсэнзэ марявсь кеме кор, нардевчи.

– Истя вана, моравиця морось ютавтовозо седеень пачк, тосто лисезэ, сестэ сон чачи морокс, сестэ карми гайгеме ды ёвтнеме кодамояк ёжодо. Истяко… – авась пря эзь максо, мелензэ верьга вайгельть ёвтамсто сеедьстэ ахолясь кедьсэнзэ, мерть, потевтеме (теньгак редизе Теряй) мештензэ икеле, неявсь: обуцязо – тол.

– Паряк, истяяк. Мон неть тевтнеде васолан, маряви, видеть валот, – сэтьме вайгельсэ, апак тално ёвтызе тень лангс вановтонзо Теряй; аламнеде сюконязь аштезь, видемтизе рунгонзо, варштась превень максыцянть лангс, козкстась ды поладызе: – Кортнетяно, а кинень кода мерить – кашт. Мон – Теряй, Ёгань Теряй.

– Вельть уш леметь кодамо-бути чуросто вастневиця. Теряй… Васенцеде марян. Косто истямонть муик? – кевкстницясь, прясонзо тей-тов чиремтнезь, эсь лемензэ ёвтамонь таркас кармась пеедькшнезь кевкстнеме-исковамо валонть юрдонзо. Кедензэ лангсек-лангсек путозь кирдсь элесэнзэ.

– Мекс ачарькодевикс? Эрзянь тюштянь пингень лем. Паряк, «терявтомс» валстонть. Монь койсэ, сядоксть мазый эрьва кодат Альберттнэде, – кармась ловомо керш кедень сурсо Теряй, – Эдуардтнэде, Христофортнэде, Евлампийтнеде ды лиятнеде. Эзить марсе советтнэнь шкатнестэ пек содавикс «народной» академиктенть Мальцев Терентийде? Арась? Содавиксэль ломанесь, пек содавиксэль… А кода тонеть пшкалить? Ёвтасак-арась?

– Мон – Черькаень Наташа, седе ламот – васняяк, велесэ – мерить тень Наталь. Морыцян. Важодян тескень филармониясо, – икелев, ветицянть ёнов ванозь, гайги вайгельсэ ёвтызе аволь ансяк лемензэ, важодема тарканзояк.

Авась чатьмонезевсь, лепштинзе турванзо, теке учось, мезе вадря-паро мари шабранзо пельде. Седе ёнсто путызе кумажанзо лангс раужо цивтёркай юдминензэ. Вить кедьсэнзэ витизе ашо, пизёлонь якстере цюцькасо «пупсезь» панаронть сивензэ, нолдызе керш кедензэ ды путызе юдминенть лангс. Вить кедьсэнзэ кирдсь, илязо томбаво-эшкеве, икелензэ кшнинь недьсэнть.

– Тетят эли ават казизе теть те мазый, зэмень кирдий лементь? Эрзянь кельс ютавтови – «парочи», марсить?– пеедькшнезь, паро ёжосо шнызе Наталень лемензэ Теряй, саизе вить кедензэ икелензэ озамкаень кундамостонть ды нолдызе, кода Наталь, элезэнзэ, велявтызе прянзо аванть ёнов ды яволявтсь тензэ: – мон теть карман мереме Натуш, эрзякс, кода пшкалесть покштянь покштянок. Каршо молеме а кармат?

– Арась, – мельспародонть цивторк мерсть пеензэ, пейдезевсь авась, – гайги? Алкукс мазыйстэ? Зярдояк эзинь арсе. Тетям мерекшнесь аванень путомс те лементь войнав туемстэнзэ, авам – каршоль. Сон путыксэль Маруся. Изнясь тетям. Превеель… – Апак учо нусманя сувось нардызе чамастонзо эрьвела ёжонь тешкскенть.

– Тетят… кирдевсь мельсэть? – нурькине чатьмонемадо мейле варштась салавине, кевкстизе Теряй прянзо нолдазь аштиця Натушонь. Косто-бути васолдо апак учо сась тензэ мель ёвтамс авантень мезеяк вечкевикс, чевте, лембине, седейс педиця.

– Арась. Ковонь ютазь чачомадон мейле – авам тень зярыяксть ёвтнизе – сонзэ саизь немецтнень каршо «за Родину, за Сталина» тюреме. Мекев уш эзь велявто. Касынь тетявтомо. Секскак превзэнь мезеяк, кодамояк ледстнема эзь кадово, – прядынзе валонзо цёранть килангонь ялгазо ды, сельмень апак кончтне зярс-бути буссонть икеле озадозетнень лангс ванозь, стакасто лекстясь.

Неть валтнэнь марязь, ледсть Теряень мельс ледстнематне эсь тетянзо марто явовомань чокшнесь. Ледсь мелезэнзэ мизолксозо, вайгелезэ, якшамо кудованть, мекев-васов яказь, мелявкссто пешксе сельмензэ. Тердекшнизь Сура чирестэ, косо чувовсь-путовсь немецтнень каршо туремань буесь. Удось, а валскестэнть саизь тов, косто уш эзь велявто. Ульнесть ацамковонь пейсэст чикордыця якшамот. Кода эзть врадо, менсть сеть якшамотнеде ды вачо иетнеде, превс а саеви Теряйнень течис.

– Тон авать – ськамот? Вейкине эйкакшат? – кивчк кепедевсть сельмечирькензэ, кевкстизе Теряй, мекс-бути стакасто лекстясь ды чиремтизе прянзо керш ёнов, седе парсте марявост Наталень валонзо.

– Тон мезть… Каня а содат, аванок шкасто вейке эйкакшто кортамот, мерть, эзть марсеве. Те ней… Мон колмо лелядо мейле нилецян. Чачинь кемнилее иень ютазь веженсь лелянь чачомадо мейле. Истя уш лиссь авань… Кемнилее иеть касынь вейкешкакс. Кодамо тонь чачома пизэть? Ламольть эйсэнзэ левкскетнеде? Ламот ванстовсть? – паморькске кашт, ды пшкадсь Натуш, валтнэнь лодорсо певердезь. Истямокс, капшазь, марявсь Теряйнень Натушонь кортавксозо.

– Монь… Мезе монь… Ветенек авань ульнинек: колмо тейтерть ды кавто цёрат. Ветенек войнадо икелень видевть. Вете… Аволь кода ней – вейкеськак а муеви! Мусызь, таго кажо – ламонень удем мартокс, ломанекс а кепедеви, – Теряй козкстась, таргась понксонь вить зепстэнзэ пацине, нардтнинзе турванзо, ливезденть – конянзо, нерьгстызе пациненть, састо нолдызе вить кедензэ, тарказонзо.

Бусось кисэнть та-кодамо авейкетьчиденть аламнеде нулк-чирть тейсь, ды Наталень вить пилензэ велькссэ черень кавшаня пакшкесь токась Теряень чамабокас. Пачканзо цёранть ютась чевте лембине налнэ. Истя сон вечкевсь! Аноколь энялдозь серьгедемс ветицянтень: варчик, ялгай, чиремтик бусот омбонькирда!

– Вай! – лиссь Наталь-Натушонь кургсто тандадомадонть, ды кавто кедьсэ автордась икелензэ кшнинь недентень. Кишк шка – оймась, кортазевсь допрок лиядо: – Тонь, содави, чинек-венек музгордиця ни, эйкакшт… – валонзо ёвтынзе апак эрязкале, явнозь. Мезде-бути арсезевсь. Конинзе сельинзэ.» Сыргозсь», чиремтизе прянзо ды варштась, учозь, вакссонзо аштицянть чамас. Лыказевсь, полавтынзе пильгень тарканзо.

– Неят, тень аволь колоньгемень, аволь ниленьгеменьгак, секскак… – пейдезь ды теке прянь шназь ушодсь Теряй. Вановтозо эртевсь аванть цивтёрдыця вановтс, – секскак, кода монень маряви кевкстнемс а мезть. Истя, монь ялгинем?

– Нолдык чумом, невак кевкстема, пиций… Эрят-арась тон нить марто? – видьстэ, аволь пулонь кайсезь, кевкстизе авась Теряень. Мерсь ды сускизе, алце турванзо. Варштась бусонь вальмаванть ваксканок уиця пижестэ оршазь чувтотнень-куракштнэнь лангс. «Каня истя, визьксэнь апак сода, пшкалить? Кодаяк седе стамбарнэ эряволь, мон теке узерекопорьсэ…» – янксезевсь эсь пачканзо Натуш. Янксек-иля, валось аволь нармунь.

– Мезекс те теть? Ну, эрян… Мейле мезе? – ливчанясто келемтинзе панжадо коморо кедензэ мештензэ икеле, вейкеньсэнть кундась икелензэ кундамонтень, омбоценть путызе кумажанзо лангс. Эзь туе Теряень мельс. Мик кодамо-бути навола ёжо пачканзо ютась истя набойстэ, апак визде ёвтазь кевкстемадонть.

– Истяк, – лия мезеяк эзь муе ёвтамс Натуш, тень мерезь, одс велявтсь вальманть ёнов ды одс педявтызе вановтонзо тона ёнга сиземань апак сода удалов кадовиця кизэнь пейзажтнес.

Ваны, а сельмензэ икеле аволь сравтневезь паксят, аволь чувтонь пиже лехат, а алкине кузтемпень чалгавкс лангсо озадо аштиця лунь ашо пря сыре авазо. Учи, чить лови, зярдо пачкоди, кецневтьсы тейтерезэ, марясы вайгелензэ. Лангсонзо раужо паля, кедьсэнзэ мандыне. Икелензэ лугиненть лангсо уды, венстинзе псиденть пильгензэ, Ашакай пининезэ…

Кортамотне кавтотнень ютксо зярс-бути эртевсть пирявксос.

– Таргицят? Косто-бути махрань чине маряви, – сыргозсь, сорнозевсь прок тандавтниця ондо, лутызе вановтонзо розень-товсюронь зярс пижела тюс паксятнестэ ды варштась, ютавтызе вановтонзо икеле аштиця ломантнень пелев, – те кинь истя набойчизэ сатотсь?

– Арась, а содаса, мезе те истямось. Чинесь.., монгак мария, качады, маряви, салонсонть икеле таркатнесэ ардыцятнень ёндо, – никстясь весть-кавксть ды тертязь вайгельсэ, мельде-валдо, валтнэнь таргсезь мерсь Натушнень Теряй. Сонсь вановтсонзо яла вешнесь чумонь теицянть. Кадызе тень. Чатьмонезевсь. Конинзе сельмензэ.

«Мезде карми сы кевкстемазо? – арсезевсь Теряй. – Вейкень пес тензэ содамо. Секень вант, копорян-арась, кевкстьсамам».

Истя лисськак.

– Кода тон, Теряй, ванат симнеманть лангс? – каятотсь, теке цяпадизь пилеюрга, ды теке те кевкстеманть Теряй сельмень конязь учось иень перть.

– Мезде? – панжинзе сельмензэ, пейдезевсь, Теряй, полавтовсь сонзэ кайксэзэ, згилязь кевкстизе эрьва мезде содамо бажицянть. – Лисьмаведте, чайде, кофеде, пепси-коладо?.. Эли конадояк палыцятнестэ?

– Теке а содат… Ченькстэ, содазь, моли кортамось, – музгордезь мерсь ды нолдызе вановтонзо алов Натуш, а стакаль чарькодемс – од содавиксэзэ пеедькшни лангсонзо. Зярыя шкань перть, теке аламнеде покордавсь, Натуш вадяшась истякояк валаня, кумажанзо лангсо кирдевикс раужо цивтёрдыця юдманзо. Окойники юдманть ёзыця кедезэ оймась.

– Кода меремс, – стамбаро, валтнэнь явнозь, ней апак пеедькшне мерсь Теряй, сонсь вансь, мезе-бути редясь, икелев, – савкшны кой-зярдо кепсемс цярканть. Эрямонок ней истямо – куш эрьва чистэ кепедть. Вастомат-вастовомат, ильтямот, покш чить, чачома чить, фестивальть, олимпиадат, чемпионатт, чачомат-калмамот… Мезеяк а мерят: сюпавсто-эрьвеласто эрятано! Секень вант, копордамонь певтеме тувталтнэ усксамизь рудаздо пешксе латкос. Эли уш ускимизь? Икеле симсть чоподачиденть, ней – валдодонть, вельть уш ламо содыть, эрьвань диплом. Содык варчик ломаненть! Вана истямо монь «теориям» симнемадонть.

Натуш кунсолось прянь нолдазь ды ве таркас ванозь.

– Истя, истя… Видестэ, Теряй, кортат… Теня, телефононь номерэть а ёвтасак? – эрязасто кепедизе прянзо ды апак учо ингельёнт велявтызе кортамонть авась; ёвтынзе валонзо ды чатьмонезевсь, каршо валонь учозь, варштась вальмава ушов.

– Мезекс? – кувтолк варштась Теряй аванть лангс ды валонть лангс лепштязь, мик кежтнеде вайгелень кепедезь, кевкстизе ушов ваныцянть. Сон талай чарькодизе, кона ёнов чиремти ваксонзо ардыця «пулынень» азоравась.

– Истяк, – велявтызе прянзо Теряй ёнов, варсодизе валонть ды пейдезевсь Натуш цельця тейтерекс.

– Сёрмадомка муят? – прок мельде-валдо, пельвайгельсэ пшкадсь цёрась авантень, кувакасто таргизе оймензэ.

– Муян… – валонть нилезь, эрязкалезь саизе кумажанзо лангсто юдминензэ, панжизе, сокарясь-тейсь ды таргась мезе эрявсь – сёрмадома кедьёнкске ды коморс кельгиця блокнотке.

Теряй чарькодевиксстэ, эрьва цифранть явозь, ёвтызе номерэнзэ ды теке басом ледстизе:

– Сестэ эно тешкстык эсь номерэтькак, – кармавтозь, Натушонь чамас ванозь, мерсь Теряй, сонсь а соды мекс, вельть марямга.

– Мезекс? – ней Наталь налксезь кончтась ды пейдезь максызе теке кевкстеманть. Сонсь цирь сезсь блокноткестэнзэ лопине, тешкстызе эсь номерэнзэ ды венстизе Теряйнень. Нерьгстызе блокноткенть тарказонзо, пекстызе – цянк мерсь – юдминензэ, конань путызе седе ёнсто элезэнзэ. Керш кедьсэнзэ кундась икелензэ недентень.

– А содан… Паряк, маштови мезекскак, вастовтано – кунсолоса морамот аволь сцена лангсто, седе маласто, – Теряй мизолдозь саизе венстезь конёвпанкскенть ды путызе панарзепинезэнзэ. Превсэнзэяк арасель: зярдояк карми мезекскак маштовомо. Юты шка ды ёмавтсы.

Теевсь кавто ёндонь чатьмонема. Чамдовсь, маряви, гулькакс гулдордыцятнень кулямонь, содавиксэкс теевемань паргост. Оймасть, сизесть, бешом, икеле эземтнесэ морыцятнеяк. Энгамсть вайгелест. Теде седеяк виевстэ поладызь велувонь кувака морост бусонь капшиця-капшавтыця чарытне ды чаравтыцяст. Тандавтниця-калдордыця моросост марявсь мезе-бути лангс пеняцямо ды теке марто та-кинь сялдома.

Шкась мольсь. Мезе сиземась – сон а соды. Мелезэяк арась содамс.

Кортамотне кортавсть, моротне моравсть. Веенстнэ, сизезь, чатьмонсть, лиятне нувсесть, неявсть удыцяткак. Курок бусось пачкодсь ошонь автовокзалонть икелев. Эрьвась бажась седе курокке лисемс. Меельцекс кадызь бусонь стака коштонть Ёгань Теряй ды Черькаень Наталь.

«Черькаень, – сась, сонськак а соды косто, Теряень пряс мелесь бусстонть лисемстэ. – Натушонь нурькине, чевтинестэ-куроксто ёвтавиця лемезэ, кода ютавтови эрзякс, содаса а вана кудолемест… Лисни, буесэст кие-бути ульнесь черькиця, озадо а аштиця, лыкиця. Ютась шка, ламо иеть, паряк, аволь ве пингеяк, ды те валось теевсь кудолемекс. Истя-аволь – содык снартык!»

– Ну, мезе, тейтерь, чива-кудова? – паро кайкссэ, нардев гайги вайгельсэ путсь Теряй пе вейсэнь ардомантень. Сонсь оржа вановтсо кивчк варштась аванть чамас, сельмс, кирдевсь вановтонзо теке тейтерень рунгонзо лангсо. «А сон алкукскак аламнеде мондень алкине», – меельцекс тешкстызе эськанзо Теряй.

– Мон а содан, паряк, кодаяк вастовтано, паряк, арась, а вана те вейсэнь ардомась, седеяк – «калярдомась», кадовить паро, астувтовикс ледстнемакс, – ёвтызе мелензэ Натуш. Максызе, мизолдозь, лепштямс кедькоморонзо, кивчк варштассь Теряень сельмс ды текекс явовстькак. Эрьвась тусь эсензэ киява эстензэ.




Кеминь, учить эйсэнь маней зорят…


Ютасть малав кавто иеть. Ёгань Теряень эрямозо велень советсэ кемекстазь нинзэ марто мольсь, кода кортыть, чикор-лакор. Чи юты – сёвнома, омбоце сы – теке, пси тол ацирьгалемат, стяконь кис инзамот, седеень раздий аксунгалемат… Те а истя, беряньстэ, тона… А тезэнь озыть, а тона ёнов варштыть… Савкшнось натой лиснемс вензэ лангс удомо шабратненень, невак та-ков. Весть таргонь перть удсесь ялганзо кедьсэ.

Истямо «уцяскадо» пешксе кудосо ютавтсь пингензэ Теряй ие, омбоце, колмоце….Эзь сода цёрась, мезе теемс, кода улемс, кода кацтамс, кардамс ордакш нинзэ ордакшкалемадонзо. Мель путсь совавтомс кудозост валдо, сэтьмечи, вейкень-вейкень чарькодема. Тень таркас…

Кирдевсть превсэнзэ мельть эйстэнзэ допрок туемадояк, вешнесь газетава-кува адрест, кие нолды эрямо. Мукшнось, Ансяк кинь мельс туи кодамояк чеерьваря колмо нупалень квартирань таркас? Истят мельтькак содавтнизь: кие теть карми лия таркасо пидеме-панеме, мельгат лопавтнеме-муськеме? Муемс истямо пизэ…

Эзь лезда ояксчисэ, апак сёвно эрямонтень, седеяк меельце шкасто, нинзэ эрьва палманентень кулелямозояк. Кинень, кодамо аванень ансяк эзь «педявтне»! Вансь, прок пшти сельме мучказ, эрьва эскельксэнзэ мельга, ков мирдезэ, Теряй, мельганзо сон, низэ; ваннось, «никсесь», пельсь, ванстсь, илязо сюлмаво полазо лия ава марто.

Зыян кандсь теяк: сон эзизе сода мирдензэ келенть, кортась рузкс. Те эзь вечкеве Теряйнень, меельце иетнестэ свал кирдевсь эйсэнзэ те ёжось авалгстовикс кевпоколекс. Седеяк, зярдо сонензэ савкшнось вейс пурнавозь зярыя эрзя ютксо кортамс рузкс.

«Те кодамо эрямо?..» – ризнэзь арсиль, онкстниль эсь пачканзо, зярдо раужо сувокс валгониль икелензэ кудонь эрямозо, зярдо ёмиль эрямонть зэмезэ, зярдо цякскадыль ды анок эрсиль явовомс эрямонть марто.

«Мекс, алкукскак, а кадомс седеень раздиця, тоначив паниця кежпаргонть? Эйкакштне покшт. Эрьвань эсензэ кизэ. Весементь, мейсэ сюпаван – содамочисэ, тевсэ, седеймарямосо, – максыя тенст, ней мон сыненст истя, кода икеле, а эряван, куш варчния тетявтомо эрямонть танстензэ касмодо верьга – аволь медь. Мезе эно кирди? Эрямо тарка? Аваломань? Тертень таркас олячи? Маряви, теяк, тонаяк. А ойментень эряви, оймесь веши сэтьме, валдо эрямо. Эно мезень кис сынь моданть лангс?».

Истят арсематнеде, конатне эзизь стувтне цёранть, ледсь та-кода мелезнзэ Эрзянь кезэрень пингень Покшчистэ вейсэнь ардомась, авась, конань марто кортнекшнесть кувака кинть перть ды конань телефонозо, ледстизе, ванстовсь, секень вант, эрямо таркань книгинесэнзэ.

Учизе, зярдо кудось чаволь, книгинензэ марто ютась телефононь стуворнэнть ваксс, кепедизе почконть ды талнозь, пельсь, кияк илязо сова, илизь стардо, кочкизе эрявикс номерэнть.

– Шумбрачи, Натуш! – тошказь-сорнозь пувсесь валонзо вить пилезэнзэ лепштязь почконтень Теряй.

– Мон, мон. Те кие? – каятотсь аламос аштезь, почкосонть кашторксонь пачк, содавикс човине, гайгиця вайгелесь; марявсь истя, мерят ломанесь кортась шабра кудосто.

– Те мон, Теряй, эли стув… стувтымик? – омбоцеде седе марямга, талномадонть кокныця вайгельсэ ёвтынзе цёрась валонзо ды нардевстэ, седе марявозо, лепштизе пилезэнзэ почконть.

– Кодамо Теряй? Те кто… косто? Кто истямось? – эль кирдевсь пильге лангсо, колызь цёранть ёжонзо неть кевкстематне ды ютксост «кто» – сь.

– Ды мон, мон… Вейсэ ардокшнынек Аловелестэ… Эль стувтык Озномань покшчинть? Кавто иеть ютасть. Ледсь мелезэть? – якстере тюс телефон марто стуворонть икеле аштезь, сорнозь, верьга вайгельть ледстнесь Ёгань Теряй уськенть тона песэ кунсолыцянтень умонь шкань вейсэнь ардомадост.

– А-а-а… Оно ки-и… Ледсь, Теряй, ледсь! Беряньстэ марявить, валтнэ сезневсть! Кодамо паро куля ёвтавлить? – цёковокс, марявсь, цёкордсь авась эрямо эли, паряк, важодема таркасонзо. Теряй вить пилесэнзэ кунсолось почкосонть кашторксонь пачк марявиця вайгеленть, кершсэнть – ва кияк илязо сова. – Мезе меревлить, Теряй?

– Истяк, мезеяк арась, понгсь сельмень икелев телефонот ды прынь мельс гайневтемс, арсемс шумбрачи. Те каня аволь паро куля? Эзить стувто Покш-чистэ тыц пешксе буссо вейсэнь кортнеманок? – Теряй ёвтась ниле-вете валт эседензэ, мерсь «вастомазонок» ды путызе тарказонзо кедьёнкскенть.

Цёранть кедензэ сорность. Чамаумарензэ палозь палсть. Теке сявдиксстэнзэ нолдась стакадояк стака канст. Кувакасто лекстясь ды озась стувор экшс, кундась конёвонь сезезь тевезэнзэ.

Теряй ды Натуш ютксо вастовоматне, таго телефононь пачка, поладовсть. Мольсть салава нурькине кортамосо зярыя ковонь перть. Шкань ютазь вастневсть сельмеде-сельмес. Малавгавтынзе, седе виде карми меремс – вейсэндинзе Теряень ды Наталень… Теряень коень-закононь низэ.

Тевесь ульнесь истя.

Весть ниле-вете ломанень промкскесэ, косо кортамось мольсь эрзянь келенть ёжодонзо, кулялопань нолдамодо ды конань ветясь Теряйде комсешка иеде од ава, квартиранть азорозо, апак учо келес панжовсь кудокенкшесь ды даволкс совась кежтнеде лакиця-пургсиця Теряень низэ. Сон весень пингстэ карциганокс каявсь мирдензэ лангс, аноколь сонзэ сезнемс. Каявиксэль промксонь ветицянть лангс, кинень кулелясь мирдензэ. Эзизь нолда, кирдизь цёратне, мель путсть оймавтомс аванть, совавтомс превс, кардыксэлизь. Мезеяк эзь лезда.

Берянель, визькс ульнесь те идем, ордакш сценадонть нупальсэнть улицятненень, седеяк визьксэль Теряйнень. Сон аноколь туемс нинзэ юдмасонзо лангозонзо ахолямодонть, превстэ лисезень палыця вановттонзо модань пачк.Эйсэнзэ даволкс велясть нусманя-ризкс ёжотне-мельтне.

Лиссь лиякс.

Кулелямодонть майсевиця Теряень низэ цярадизе кенкшенть ды тусь капшазь кудов. Мелензэ топавтызе – «стардызе» «злыдарь» поланзо. А Теряй аламос аштезь лиссь мельганзо ды сайсь ки Черькаень Наталень ёнов, кинень яннэсь шешкезель.

Тусь эсензэ лембе-келей пизэстэнзэ, таркастонть, косо чачсть-кассть кавто цёранзо, тусь зярдояк-зярдояк а велявтомга. Теемс истямо эскельксэнть ульнесь ашождыне, те кандсь ламо стакасто ды шкань таргсезь аютыця седейризкст. Кадомс пиземеде-даволдо ванстыця потолоконть, лембень кирдиця стенатнень, весементь, мезесь тонадовкшнось ламо иень перть, кадомс эйкакшот – те мештесэть стака, алов ускиця кев куломазот. Прялить явоманть эрьва кода: эрсить эрямостонть туематкак.

Ульнесь те ламо иеде икеле сундерьковонь куншка шкава. Састо-састо чаразь-велязь, теке мезде-бути арсезь-мелявтозь, вельтясть моданть чевте покш ловнетне. Мольсь васень лов. Китне, латотне, чувтотне вельтявсть кецневтиця ванькс ашосо.

Апак капша эскелясь Теряй ашосо копачазь кевъянганть Натушонь кудо ёнов. Прязо эль эзь сезеве калгодо назой арсематнеде, эвтезь эвтсть нусманя мельтне: «Видестэ-аволь теян – эскелян те кияванть? Кирдян ки, косо учить? Мезе тень канды вандынь чись? Па…паряк, мурдамс? А? Ков? Мизолксонь, пеедькшнемань таркас пижнематнеде-ацирьгалематнеде пешксе стенатнень юткс?».

Се ашо-нусманя чись ванстовсь Теряень седейсэ теке исень чись, ды сон, се ашосо артозь чись, кадови раужо ледстнемакс Тоначив туемазонзо.

Од пингестэнзэ Теряй косто-бути ловнокшнось: ломанесь уцяскав сеньсэ, а соды, кодамо уцяскавокс тензэ улемаль. Мертяно, цёрантень, седеяк, маряви, авантень, пазось эзь максо чачтнемань талика, дёп. Содавольтькак сынь, кодамо те уцяска – шкинемс, важдамс, кастомс пакша, – секень вант, кой-кить… ормазкадовольть. Иди теде – …асодамось.

Теряй те ёндо ульнесь уцяскав. Эйкакштнень чачомаст казть тензэ чансть, казть покш-келей, чиревтеме мастор, конань, кармась содамо, лемезэ педагогика. Секс тензэ тень кувалткак стакадояк стакаль перьгедемс эйдень-эйкакшонь вечкевикс куростонть.

Кие содась алкуксонь тувталтнэде, конатне ветизь Теряень ды нинзэ, веёндо ванозь парсте, ояксчисэ эрицятнень, явомантень? Ансяк сынсь. Асодыцятне, ланга-верьга арсицятне сеске сюлмасызь вечкеманть марто. Келя, Наталь-Натуш эждизе умок урьвакстозь, умок аволь одтнэде цёранть, чаракавтызе, колдовизе-мунизе.

Вечкема… Сон, келя, чумось. Ды сон, варштындерят седе домкасто эрямонть лангс, истя, паряк, улияк. Эно кие? Зяро сондензэ морот моразь, книгат сёрмадозь, пьесат-фильмат невтезь! Эрьвась ёвтни вейкеде: сондензэ мазый виев неже вейсэнь кошонь пурнамсто, полыямсто мезеяк арась. Вечкемась, кемевтить, – вейсэнь эрямонтень кевень юр. Сондензэ «тантей», нардев, келя, иля вешне. Э-эх! Улевельгак истя, кода сёрмадови-морави, – зняро явицят, зняро урозэйкакшт, ськамост, цёравтомо эриця ават авольть майсеве, зняро сельведень эрькть моданть лангсо аволь уле. Вечкемась, умок эряволь видькстамс, – те прыця тештень кивчкадема эли валске мартонь сув. Варшты пси вановтсо чипаесь ды панжови мезе кекшневсь…

Паряк, те оргавтомо сусласькак, конанень мерить «вечкема», лездакшнось зярдо-бути валовомс кавтотненень вейс. Паряк… Секень вант, Теряень превстэ а тукшныця мелеськак – куш иешка эрямс олячинь валдосо, а марямс кежтнеде каргоць, лиясто кижнэзь пижниця вайгель, седеень пупсиця валт – лездась тенст васодевемс Натуш марто. Шумбрачинь пултыця кежтнень-сёвноматнень таркас, марявсь сестэ Теряйнень, кармить кецневтемензэ кенярксто пешксе вановтт, мизолдыця турват, чевте, седеень эждиця валт… Кода эрямс паронтень апак кеме?

Бульчом, ломанесь уш шкинезь истямокс: кеми валдос, уцяскадо, чанстте пешксе эрямос. Мезень кис эно, сынтемест самс, кадык аволь свал лембе, аволь свал важов, моданть лангс? Ченярдомо-ченгеме? Чинев вецана чеядавкссо ботамо-шлебердеме?

Нимилявнекс ливтнесть ды эцнесть лавтов лангсо ловажань кудынентень мельтне: «Эрямот, Теряй, кемть, карми арсезенть кондямокс: ванькс, сэтьме, вейкень-вейкень марязь, вейкеде-вейкеде мелявтозь, олячинть танстензэ марязь…». Лиякс сестэ эрямонзо эзизе нее. Кемсь цёрась, кемсь, кемсь.

Истя ушодовсь Теряень од эрямозо. Лия кудо, лия стенат-потолок, лия кенкш, лия стувор, пенчть… Лия аваломань, лия вайгель, кортамот… Допрок, вейкень пес лия!

…Кода-бути весть, телень сэтьме ашо чистэ, совась «Вайгель» газетань редакцияс Теряень кирдажозо, кулялопас свалшкань сёрмалицясь-поэтэсь Панькин Миколь. Теряй ськамонзоль. Стувор экшсэ витнесь – псилгалесь – печатазь та-кодамо текст. Витнесь, кода икеле кортыльть, гранкат. Миколь апак кйсе лоцьк озась каршонзо. Саизе прястонзо шапканзо ды путызе кумажанзо лангс. Ловныцясь кадызе ловноманзо, саизе Миколень кедьстэ сёрмадовксонзо. Вановтозо кирдевсь лемензэ лангсо. Турванзо явовсть мизолкстонть. Ловномонзо эзь карма.

– А содан мезе, кодамо сюпавчи потсонзо, лемень кувалт видьстэ мерян теть: кеменьс понгить, эрявикстнэде эрявикс! «Рудаз», видькстак, ламо эйсэнзэ, койме эли коймине тень анокстамо? – пеедькшнезь, сыцянть сельмс ванозь мерсь «Вайгелень» прявтось ды путызе Миколень «шедевранзо» эрявикс кувтас.

Кортазевсть пиреде-менелькстэ, теде-тонадо. Ледстизе кулялопань свалшкань авторось Теряень од латало эрямодонзо кулянть.

Теряй мезеяк эзь мере. Стясь таркастонзо, зярыяксть ютась, кедензэ удало кирдезь, нупальганть мекев-васов, варштась стуворонзо икеле озадо аштиця цитниця касмо Панькин лангс ды мерсь тензэ:

– Кода тон, Миколь, арсят, темась те, полыямодо, сравтневиця? Эрявикс минек кулялопантень? Мезекс те тонеть, лиятненень, кода мон эрян-пиштян ят лато ало? Мезень лезэ? Кельть човсемс? Мерть, кортамонок теде пекстазь, – превть макссь ялганстэнь Теряй ды озась тарказонзо.




Эсеть эйстэ а туят


Кинень мезе, яла мерить, Инешкипазось кази. Кинень куломазонзо резэмс коник лангсо, чивалдос а лиснемс, кинень экшелямс чанстень эрькесэ. Кинень мезе… Вейкесь кувака-казямо иеть ютавты, тарди-мелявты панжома экшсэ, омбоцесь – эри-важоди олячисэ, топавты лезэнь, кенярксонь кандыця тевть. Кинень мезе…

Черькаень Натуш вечки эрьва мезень таштамо. Мезе понги кедь малас – сонзэ. Чеменев эске, ёртозь карть, лавсь, лазпеть, суликат, эрьва кодат квитанцият, оршамот, кедьгеть… Кодаяк а нардасак трямкань обуцядонть ярмаконь таштамонтькак. Машты, машты трёшникень тееме-ванстомо…

Ламо иень перть пурнавсть кармотнеде-курмотнеде аволь аламо. Веенст понгавтнезь кескавтнева, лият путнезь эрьва кува чавнозь лавсятнева, ламо кой-мезть нерьгстнезь эзем ды коник алкстнэва. Сынь кирдевить кудосо, кудыкеле, латало. Зярдо мезеяк эряви муемс, вешнек чоп – а мусак, эли дух а муеви, ёми.

Весть телевизорось ёвтнесь-невтсь Америка ёнксонь аволь сыре, куншка иень, ськамонзо эриця авадо. Сон майсевсь таштамонь ормасо. Кандтнесь квартиразонзо эрьва ёндо эрьва мезть зняро, эзь кадново тарка, косо удсемс, а кува ютамс, эль лисневсь кудостонзо ушов. Эрямо тарказо тыц пешксе ташто, аэрявикс, яжавозь, ёртозь кармодо-курмодо. Эзь сода пайстомо авась, кода улемс, мезе теемс. Аволь весть пачколесь сельведень нолдамос. Лезэ? Кодамояк! Кортак-иля, мурнек-иля, лезэ иля учо – орма. Те ансяк мереви – пазонь казне.

Те аволь кецневтиця сюжетэнть Теряй ды Натуш ванызь телевановтсто вейсэ. Теряй кемсь: невтезесь кармавтсы нинзэ лиякс ваномо эсь «орманзо» лангс, а карми кандомо кудонтень мезе понги сельме икелев. Сеске сон тензэ мезеяк эзь мере. Ютасть кавто-колмо чить, ды зярдо низэ косто-бути усксь эйдень нилень таркас колмо чарыне лангсо янгазь чарынькай, эзь кирдеве: ледстизе ванозь «кинонть».

Кавонест атят-сырькайть кочкасть ведьинзейть. А пек кецневти те тевесь. Вельть пупицят ацавиця нетькссэнзэ салмукскетне! Верь пупскесэ вельтявить кедеть, а оршиндерят калгодо коцтсто стазь кувака ожа панар, кедезэть – варьгат. Сень кис куроксто пешкеди кедьгинеть – а налкстават. Кочкак. Теряй эскельдясь нинзэ малас ды пшкадсь тензэ:

– Минекак кудонок, латалксонок Американь се аванть ёнов молить. Мезе ансяк арась, мезе ансяк а кирдеви! Ней те колмо чары лангсо крандазкесь латало, умок уш тосо лавсь усксеви… Мезекс пурнык те каладырьканть, эли сизьгемень иесэть чачтомо арсят? Латалксось тыц, – снартсь атясь превть максомс, мерсь пелезь, лепштязь вайгельсэ – илязо цяраде пурьгине. Арась, истя, кецневтизе, эзь лисе. Маряви, кинось, куш кенжинень покшолмасо, – лездась. Атянзо мереманзо – нилинзе. Вал эзь правто. Ялатеке пазонь «казненть» ёртомс шукшпряс тензэ ульнесь ашождыне.

Ковгак а молят: кинень мезе…

– Мезекскак ды маштови, яла думаян, – кода-бути зярыя шкань ютазь, таго пупиця инзеень кочкамсто, тевензэ апак кадо мерсь Натуш эсь прянь идемга. Ёвтынзе валтнэнь сэтьместэ, апак машнете, прок чумонь марязь. Ёвтынзе ды венстизе вить кедензэ верев, вановтонзо икелев понгсть инзеень зярыя раужо-сэнь цюцёвт.

– Те а истя, – эзь са Натуш марто вемельс Теряй, кавто ёнов чиремтнизе прянзо, – «маштови»… Валось виде, ансяк содама тензэ онкс. «Маштовицятнеде», мезть понгавтнезь, вачказь, аравтнезь эрьва кува ды ванстовить ламо иень перть, – озязонь нерь. Астака понгомс, кода ченьксэнь эли нарконь вечкицятне, кода Американь се авась, таштамонь полонс. Кельме калмонтень кодаткак сюпавчить а эрявить, а сырнеть-мезть, а кармот-курмот…

Обуцянь те ёнксось – таштамс, ванстомс, – а берянь. Тевесь лия, зярдо пурнави-таштави мезе понгсь, апак онкста, апак сода ды апак арсе – карми-арась эрявомо косто-бути кандозесь эли муезесь?

«Косто те оймень костиця апарось педясь Натушонь обуцяс, кода эйстэнзэ менстямс?» – аволь весть, аволь кавкстькак совсесь Теряй атянь прязонзо. Виде-аволь, марявсь тензэ, истямо коронтень юрокс ульнесь текесь: вейкинекс, вейке эйкакшокс касомазо. Паряк, гентнэ ды кодаткак лия тувталт «лездасть» тенень? Содык терявтык…

…Меельце шкастонть кудазоравась чапсь истямо кой: кофе велькс марто симемс чизэнзэ весть. Валске марто ярсамонь прядозь. Ансяк. Чикуншкат, чокшне – арвочине ведь, компот, чай эли ловсо. Кой – улияк кой. Сонзэ, вадря-берянь, топавтома. Ансяк вана…

Теряй атя умок-умок майсеви верень ламбамочиденть. Кирдить, ванстыть эйсэнзэ таблеткатне ды диетась. Секскак сахар марто а мереви симемс-ярсамс а теде, а тонадо. А каят кофе кечинезэть сахар пеельнернесэяк! Диета… Ансяк те симемапеленть, седеяк велькс марто, ули, кадык лавшине, танстезэ, чинезэ, совавты, текенекс, эйзэть потмовий. Секс сон вечкеви атянтень. А тесэ – кой!

– Содат мезе, монень чизэнзэ кавксть эряви, – яволявтсь Теряй весть валскень ярсамсто, вакссонзо стувор экшсэ озадо аштиця Натушнень. – Пельпенчке яжавтозь кофе ды пелькечине ансяк лаказь ведь, монень саты. Яла тансть, яла аволь кода чаво пси ведь пансят. Куш тень эйсэ седеенть витемс.

– Арась, арась, ансяк кода мон меринь! – цяр путызе ды шаштызе апак прядо кофе кечинензэ Натуш; мештензэ икеле вить кедень сурсонзо юхаезь, мерсь кшнинь вайгельсэ, пря максомо эзь арсеяк, кирдсь эсензэ: – Чизэнзэ весть ве пенчке! Вот так вот!

Теряй лангс путсь пшти сельме, вансь мельганзо покш пря коршокс – мерезденть верьга атясь илязо симе. Марясы икельце кудосто эли косто лиясто сиянь пенчкенть чольдердеманзо эли чайникенть тыжнэманзо, сеске чии, эли каяты кудонть келес: «Тон таго кофе! Зяроксть теть мернинь… Дух не слушается…».

Теде мейле ушодови уроконь кондямо: «Мон уш теть ёвтнинь телевизорсто марязденть, ледстнинь – свал кофеде симнезь, ломанесь тееви кофеголикекс. Теяк – питнезэ те симемапеленть… Содат. Аволь кода чаенть. Те истя зяро целковойть «симневить» ковозонзо? А иезэнзэ?! Думаешь? Сайть ручка, озак ды ловт!».

«Тееват кофеголикекс» тандавтнеманть Теряй мезекскак эзь лово, пеедькшнесь ансяк. А вана ярмаконь ютавтомадо Натушонь ледстнеманзо, «озак ды ловт» валтнэ совсесть мештезэнзэ чеменев изамо пеекс.

«Мекс, мекс сон, Наталь-Натуш, – кирдсь мельсэнзэ, яла кевкстнесь эсензэ Теряй, – эрямонть мазычинзэ-питнейчинзэ онкстни ансяк ярмаконь таштамосо? Оймесь косо? Меремс тензэ? Пшкалинь. А лезэсь? Мезеяк полавтовсь? Арась. Пазось, тагояк мерян, максы эрьванень сень, мезе максы. Лиякс а велявтсак, а путсак.

Саик, невтемань кис, Паксютонь Алёнь, Пичепесэ, эйстэнек кемень кудонь трокс, эри Груня нинзэ марто. Допрок, тунь, дух, а яви мель ярмаконь пурнамонтень ды ютавтомантень. Зяро ютавты сон эрьва кодамо журналонь-газетань сёрмадстомга, зняро аволь велесэнть, буесэнтькак а ютавтыть. Паряк, а эрявитькак зняротне, мезекс? Те кевкстемась инжекскак тензэ а пачколи. Мезе илязо саво рамамс, питне кевкстни чуросто. «Мезе эряви – эряви, рамама», – вана сонзэ мелезэ-коезээ. Алё а лови ярмаконть эрямонь кузтемасонть весемеде сэрей чалгавксокс. Ды те пек паро! Алё-Алексей а лови эсь прянзо урекс, ярмаконтень нулгодькс савтницякс, а сорны поень лопакс эрьва нулав целковоенть икеле, а озны. Икелечиденть верьга-ланга а мелявты. Зепензэ чавот, сень кис оймезэ валдодо-ваньксчиде пешксе. Истятнэ, сюморкс айтянзат, вастневить эрямонь килангсонть аволь сеедьстэ. Педе-пес видестэ ёвтазь: «Эсеть эйстэ, седе, мезе теть верде максовсь, а туят».




Каня сельметь таргизь!


Астяко ёвтазь: эрямонть эрямс – аволь паксянь трокс ютамс. Аламнеде лиякс ёвтазь: ломаненть содамс – аволь вайгельпе ютамс, ютама мартонзо латкова-луткова сядо эли, паряк, тёжа вайгельпеть.

Ульнесь кизэнь маней валске. Пичеледе авасоло пандо алга чудиця леенть велькска-чирева, зярс эзь кенере келейстэ варштамо чись, удомаст явавтнесть сувонь кельме пельть. Пиресэ эмежтне ды умартне лембе, састо ды кувать молиця пиземеденть ургатетсть касомо – виень-потьмежачинь таштамо. Сынь кецнесть ды эсь пачкаст кучнесть сюкпря летькень кучиця менелентень, лембень раштыцянтень.

– Кодамо коштось ванькс! Лексят лексевлить. Течи вальсемат модамартне, шкаст, чинь-колмонь ютазь потмозост а совават, – ледстизе Натуш, удомадо мейле кургонь автнезь, ансяк кавонест Теряй марто лиссть кудосто ды валгсть кузтемпес. Аванть лангсо каркске марто валдо-пиже човине коцтонь вень кувака паля. Секс валскень экшеденть эзь аштеве, мерсь мезе-бути эстензэ марямга ды юрк совась, теке чеерь варязонзо, кудос.

Теряй кундась тевс. Васняяк тонгсь резинань кемть. Совась панжадо кенкш латалов, сайсь модашка. Келейстэ эскелязь ютась вальмало путовкс «умантень» ды кундась мерезенть топавтомо – вальсеме. Кирда, модакикс, мельганзо омбоце, колмоце… Тевесь мольсь. Зярдо тесэнь путовкс «паксясь» прядовома маласоль, састыне сась теке удомань оршавкссонть Натуш.

– Те зярс эзик прядо?! А-я-яй… Лыкама седе, лыкама… Мон арсинь… Капшак. Пиземе илязо туе. Мейле а соват. Вот так вот! Несак, зярошкат кассть? …Ярсамо адя, – паро ёжосо черькстась прясонзо, кончтась ды прядынзе кармавтоманзо. Теряень апак учо велявтсь ды сыргась, пиже янганть нурькинестэ эскелязь, кудов. Молемстэ кайсесь превсэнзэ, кодат тевть теема течи васняяк, мезе тантейне, седеень витиця путома стуворс чикуншканень. «Тевтне – тевть, а пекесь соды эсензэ!» – марямга прасть кургстонзо валтнэ, сонськак эзизе редя.

– Прядса икельксэм, сован! – серьгедсь мельганзо Теряй, колызе валскень гайгиця экше каштонть, ды поладызе барцаеманзо, мель путсь седе парсте вальсемс модамарень эрьва куракшкенть. Коштось экше. Тень лангс апак вано, кутьмерезэ ялатеке начксь панартомояк.

Эзть юта вете минутаткак, таго вайгель, ней кудоужосто, веёндо:

– Кежень илить савтне! Кеменьксть эждеме а карман! – серьгедсь ярсамонь анокстыцясь ды выр-вар тусь эрямо пизэзэнзэ.

Мельганзо, кадызе тарказонзо, модакиксэнтень, модашканзо, сыргась, стакасто эскелязь, вальсицяськак. Кузтемпесэ каинзе пильгстэнзэ рудазов карсемканзо, оршизе панаронзо.

Ансяк панжизе кудокенкшенть, стуворонть вакссо стядо котьмиця низэ варштась совицянть лангс, ледстизе:

– Кедеть шлить? Аволь, аволь тесэ – ушосо. Вант, иля пургсе, таго монень сави мельгат нардтнемс. Кедеть нардтнить палманентень эскс понгавтозь нуласонть.

Те «инструкциядонть» мейле Теряйнень савсь лисемс ушов. «Фу, допрок стувтыя теемс тень сеске!» – ютась пряванзо, янксезевсь. Сон шлинзе-нардынзе кедензэ, топавтызе кармавтозенть ды апак эрязкале совась кудос.

– Озак! – нулновтсь прясонзо ды невтсь сурсонзо озамкаенть ёнов азоравась. – Каян сывельям. Печксек кши. Аволь, аволь те пеельсэнть! Оно сеньсэ. Човинестэ бажак! Конёвнеть мекс эзить сравтне? Теньгак теть ёвтама…

Теряй керсесь кши, таргась стуворпотсто пенчть, кандсь тона кудосто нинстэнь эземне. Окойники озасть стувор экшс.

– Мекс конёвнетнень пест эзить мендя? Паморькстнэ киякссо улить! Каня, а чарькодеви, каня эзинь мерне? Кинь учат? Пенченть, пенченть мекс аволь сень саик?! Ваканот седе малав шаштык! – прок эрямо парьстэ валозь валовсть Натушонь кургсто кармавтоматне ды превспутоматне, эйстэст, секень вант, тармазкадат. Кода кирдсь сынст атясь, а чарькодеви.

Теряй чатьмонсь. Сон содась, пе те «уроконтень» карми а курок. Пенчезэ ды пейсалазкензэ содасть эсест, чевелясть – пештясть пеке. «Уроконть» кувакачидензэ теке ведьс вансь.

– Вант, паморькст иля правто масторов, комак ваканонть вельксэс! Текень содан, эрьва чистэ мельгат ветексть тенсян, вот так вот, – ярсамстояк эзь чатьмоне, превть макссь, яла тонавтсь, кармавтсь стуворонь прявтось. – Саик, саик турваужостот педязь кувиненть.., во-во, текень учинь, – кедькоморсонзо… Ну кие, кие истя тейни? Каня а чарькодеви – сурсо саема, сур песэ! – тень мерезь, венстизе вить кедензэ ды невтизе кода эряви – невтий сурсонзо нардызе педявкскенть турвастонзо.

Стуворонь азоронть моронзо кунсолозь, Теряй сэвизе сывель марто модамарьям ваканонть, симизе кечине кофензэ, ёвтась сюкпря ды чатьмонезь лиссь ушодозь тевензэ прядомо.

Вальмало «уманзо» прядомадо мейле ютась умарьпиресэ путозтнень вальсеме. Сынь озавтозь байтяк шкань ютазь. Вишкинеть. Шкасткак эзь са. Эйстэст ветешкатнень пирень прявтось нерьгстынзе човор газононь тикше марто. Эль-эль неявить. Вейкень Теряй эзизе редя, цёх керизе, керявозь модамарень нетькскетне вельтявсть модасо.

Тень Теряень вакска яннэванть састо молемстэ неизе азоравась. Неезденть Натушонь ёжопонанзояк стясть, пачканзо кивчк ютась псинь нал, соракадсь, теке маштыкс куродызе. Сельмесэнзэ кивчкадсть-чийнезевсть кежень сяткот. Сон вачо вадовокс каявсь каршонзо стядо, модашканзо лангс нежедезь аштиця лов ашо пря атянть лангс. Аноколь раздемс.

– Каня а неят, мезе теят, каня сельметь таргизь?! – кежтнеде сорнозь, пирень келес пижнезь, автордызе атянть кедьстэ модашканть ды весе вийсэнзэ, теке превстэ лиссь, вередемсь невтемань кис яхоеме-вальсеме. Цят шка – илыкезэ маштсь. Варсодизе псинзэ пачк модашканть Теряень пильгензэ ваксс ды поладызе тонавтоманзо ней уш кельсэ: – Кодамояк тев теть а тееви, мезекскак а маштоват, чаво ломань, ничего тебе не надо!… – пижнезь-сялдозь, Наталь «човсесь» мирдензэ. Прядомакс цюх сельгсь ды велявтсь, полавтызе мелензэ, мекев, кудоёнов.

Теряйнень эряволь сеске туемс аксунгалицянть икельде: а мезть кунсоломс кежсэ пургсиця ломаненть, сонзэ ормаза моронзо. Сон сынст содасынзе. Тейсь ильведькс – эзь туе. Марязденть-неезденть гувк тапардызе пси, эрязкалезевсь седеезэ. «Мезень кис, мезень кис?» – теке кевкстнесь сон . Прязо налкставиця мельтнеде увнось. Эзь сода, мезе теемс, ков молемс. Варштась икелензэ усксевиця модашканть лангс ды прянь нолдазь, састо эскелязь сыргась пирекуншкава янганть вирь ёнов. Сон ушодови Черькаень Наталень уличинзэ-моданзо пестэ сеске.

Торох, дух а мезень кис лангозонзо каявомась, маней менельксэнь келес пижнемась, прясто кочкаряс покордамось эзть максо прянтень арсемс мездеяк лиядо. Лепштясь…

«А! Полавтомс эрямонь мазычинть, эрьвела, ванькс ёжотнень модамарень эль лексиця нетькске лангс! Кодамо авечкема ды нарьгамо оймень ваньксчи лангсо! Кодаяк а чулгови, мекс истя? – лакасть, чавсть авидечиденть валтнэ-мельтне, кевкстематне Теряень прясо. – Кинень пшкадемс, мезе теемс?

Вирь, вирь, мекс чатьмонят? Мекс тынь, кувака рунго пичеть, вал а каятадо кисэнь? Каня а марясынк мештестэ лисиця кувсеман? Ёвтынк меленк, кода тень улемс? Саема, паряк, латалксонь стенас понгавтозь пиксэнть ды… Мезе лия кадовсь? Паряк, ёвтатадо мель, кода лисемс кажостонть? Те кодамо эрямо? Ужо-ужо… А кие сестэ, арсек, тевень топавтсынзе? Ушодозь эйстэст аволь аламо. Аволь, малавгак аволь ансяк пандянь-кардазъютконь! Лиянень сынь а теевить, монень, лексек-пувсек, ускомат. Секскак тоначив туемадо мельтнень – шукшпряв. Те истя. А кода улемс вейсэнь эрямонть марто? Кода? Муемс лия эрямо тарка? Муинь… Эрямс ськамот? Теяк… Аволь макшов мукорян. Чангодть, Инешкипаз!»

Модамарень керязь нетькскеденть таргонь перть Черькаень кудосо кирдевсь кельме кошт, коня алга варштавкст, пеень пачк ёвтазь кавто валт: «уле» ды «арась».

«Кирдемс мештесэть зняро кежть, сэредстиця, навола ризкс ёжот… – арсесь Теряй Натушонь пукштяиця, ордакш обуцядо. – Инешкипаз, каня тень туртов чачозтяно? Мезень кис аванок зняро майсесть ды мелявтсть мартонок? Лиси, сакшнотано тей вейкень кис: майсевеме.

Туемс? Ков, косо ды ки монь, сыре каргонть, учи? Косо кемемась, колмоце муевксэсь карми седе мариця ойме, валдосо гувкаиця? Илязо лисе седеяк пшти», – яла онкстнесь, яла кайсесь эськанзо Теряй, ды кода-бути ледсь мелезэнзэ умоктояк умок, тона нинть марто эрямсто, ловнозь Лев Толстоень «Крейцерова соната» келей ёвтнемазо. Эйсэнзэ невтеви семиясо эрямонть алкуксонь «мазычизэ», сонзэ «танстезэ». Сон истямо ды невтезь истя – удомазо цёранть сезневкшнесь аволь ве таргонь перть. Эйсэнзэ тешкстави: вейксэньгемень вейксэ процентт семиятне-кудораськетне – эрить сёвнозь-тюрезь, мельга-мельцек салава ваннозь, микшнезь, полавтнезь. Стака ульнесь марямс истят валт ине философонть пельде.

Ды аволь ансяк Лев Николаевич! Лия сёрмадейтнеяк ёвтнесть ды ёвтнить кудораськеденть аволь цяпамонь валт-мельть: «зона», «колония», «палач»; ававттонть – «мучказ» («надзиратель»), «полон». Астяко тюрьмань валт-лемть педявтнесть! Ды… педявтнить.

Секс Теряй вельть эзь правто туемс Натушто, те кежсэ-ацирьгалемасо цилькаиця эрямо таркастонть. Кирдсь кор. Кирдсь пеень сускозь, кирдсь кода маштсь…

«Тук, варчик! Семань Итёк оно сисемксть кайсесь кирьгазонзо ашко, совсесь содамокс. Сисемексть! Ундоксткак – тейтернеть-цёрынеть – кенерькшнесь зярыя таркава нолдамо. Кадык эно цёрась улевель нузякс кандо эли кодамояк меельце симагай. Покш, виев, мазый, тевсэ – сырнень кедь. Вейкесь «нитнеде» санонзо таргась, омбоцесь, колмоцесь… Сисемецесь истя карсизе – сельгсь ды ношкстась эйстэнзэ мейсэ авазо чачтызе. Оргодсь вень куншкат, ков сельмензэ несть».

Кежей Наталь, сезеви эрьва штелькстэ, акирдевиця кор, сень кис винапетнявкс а каи, валонзо лангсо – азор. Мезе мери – топавтсы! Уски-важоди лишмекс, сивекскак а эряви. Кудоютконь тевтнесэ – дёрдо дёр! Секскак Теряй атя лия ёнга ливтнемадо арсематнень малавгак эзинзе нолдтне.

Мезесь кедьсэть уле – уле, а редяви, ёми – чарькодьсак, кодамо питнейчи, мезе ёмавтыть. Лиясто мик ёмавтыцянть летькемить сельмензэяк, нолдасынзе кедензэ. Секс…

Ёгань Теряй тунь эзь чумондо Натушонь, тунь. Каня аламо цёрат-ават, одт-сыреть майсевить панжома экшсэ чумочинь кис, конань эзизь тее? Чумонь теицятне, васняяк, – тетяст-аваст. Сынь, теде малавгак апак арсе, апак сода ды апак редя, «казить» эйкакшост туртов берянь кор, анокстыть-стявтыть нолажа киланга эскелицят, тюрьмава аштицят. Истя лиссь Натушонь аванзо мартояк. Сон а чумо, лиссь истя – кастызе кемнилее иень перть пакшанзо колмо цёрадо мейле вейкине кольнягай тейтернекс ды казизе тензэ ордакшонь-аксунонь «орманть». Шкань-шкань Натуш марявсь атянтень натой жаль.

…Аволь уш истя сеедьстэ ёндолтнэ кивчкаесть ды сезнесть Пичеле велькссэ новолезь пиземень чопода тандавтниця пельтнень. Ульнесть седеень кецневтиця, маней, мизолдыця читькак. Кодамокс илязо уле менелесь, эрямось ве таркасо эзь аште.

Чинь тевтненень путозь пе. Теряй атя озадо аштесь кузтемпесэ. Оймсесь. Икельганзо, пирепеваст, ожо меште пичетне чатьмонезь учость чокшненть самонзо. Вановт кецневтсть пиресэст пиже ябунцясо копачазь умарьчувттнэ. Кодат тустот ды рукшнат лопаст! Сэнь масторонть азорозо кенерсь валгомо оймсеме. Конизе сельмензэ ды кекшсь пичетнень томбалев. Виренть велькска менелесь артовсь палозь палыця ожо-якстерестэ.

Сась, кода свал апак учо, прязонзо ледстнема вейке ковол шкастонть, зярдо паротнеде, маней читнеде потмуратнень коряс, Натуш марто вейсэнь эрямосост седе ламольть. Одольть…

Зярдояк а стувтови Домка эрькев экшелямо якамост. Эйзэнзэ велестэнть вайгельпешка. Ансяк ютамс сынст келей лаймеванть ашождыне. Теине, тей-тов менчевиця яннэсь ветясь тов куракш, карксамга сэрей тикше юткова, начко-рудазов таркава. Видестэ лемдекшнизь умонь эрицятне – Домка. Алкукс истя. Текеде, паряк, истямо ванькс ведезэ – сельведь. Эйсэнзэ кирьгава аштезь шождасто неявить-лововить пильгесурот. Перьканзо касыть, мазылгавтыть эрькенть ды тесэнь ёнкстнэнь, калень, эрьбань, ламарень, чевгень ды лия эрьва кодат куракшт.

…Шказоль чикуншкадо мейлень. А куш а каш. Оймсесть чувтнэнь потсо нармунтне. Псиденть чатьмонсть, эзь маряво тикшенть потсто тастынетнень кайгасо налксемасткак.

Эрькечирентень аламнеде апак пачкоде, васенцекс, тунь апак визде, кайсесь, мезеяк эзь кадо лангозонзо, Натуш. Киде виздемс? Оршамонзо, венстизе кедензэ, понгавтынзе рацяня пешкс куронь нурьгиця тарадпес. Састыне, ёжонь марязь, ожо пси чуваронть ланга ютась, икелев ванозь, веденть малас.

Теряй понксонзо-панаронзо каямо эзь эрязкале. Стядо аштесь нидензэ авасоло ды вансь сонзэ аволь сэрей, аволь эчке, теке тейтерень, рунгонзо лангс. Вансь сельмень апак кончтне, сэвезь сэвсь вановтсонзо. Некшнизе нинзэ эрьва кода, эрьва косо ды, содави, аволь весть, а вана истя, пижесэ пирязь эрькечирева, ожо чуварнэ ланга эскелицякс, эрьвела ёжосо, прясто пильгс штапокс, – васенцеде.

Зярс-бути Натуш аштесь стядо, вансь чипайденть цитниця эрькенть чамас, аламо шкань ютазь вановтсонзо ютась куракшов, пиже кундокс неявиця, чиреванзо. Ландясь ды састыне нолдызе вить кедькоморонзо ведентень. Икельганзо тей-тов укшность вежаськедеяк вишкине сияждыця калнэть, сэперькеть. Кечинекс кедькелензэ теезь, амольдясь ведь ды пургизе-начтызе мештензэ. Стямсто потензэ ланга чипаенть визьксэнь асодыця вановтто нолаштсть, теке сиянь эрьгинеть, цитниця ведьбайгинеть. «У-у-у, кодамо экшине!» – рунгонзо витемстэ таргизе «у-у-у»-ть сорныця вайгельсэ. Ялатеке тандавтниця кельмекс эзь маряво. Кедензэ кавто ёнов келемтезь, прок нармунь сёлмонзо, экшентень апак тонадо, сурневксэнь марязь, састо-састо совась ведентень – васня кумажава, мельганзо карксамга, седе верьга.

«Вай, вы-ый, кодамо кельме! – цирнезь серьгедсь пертьпельксэнть келес, сонсь варштась удалов, эйстэнзэ авасоло палманькс аштиця поланзо лангс.

– Мезть сельметь полгарьгавтнят? Эли эзимик некшне? Кайсек ды бырсэ ваксозон! Иля пеле, а сусктан!.. – серьгедсь Натуш пеедькшнезь ды болдор-болдор тусь «пинекс» уезь. Пильгсэнзэ ботамодонть кувтань-кувтань кепсевсть ведьбайгень сырнень сяткот. Тейсь кирькс, мельганзо омбоце…

Теряй кайсесь ды учось, зярдо Натуш лиси ведьстэнть ды одс невтьсы чипаень валдосо артозь авань мазычинзэ.

Умок те ульнесь, вельть умок! Вейсэнь эрямостост васенце эли омбоце иестэнть. Ды теке исяк! Ваясть сынь домкадояк домка шкань отьмантень. А велявтсыть. Паро теяк – кадовсть кизэнь се пси чиденть, се экшелямодонть, сеть уцяскадо пешксе минутатнеде, теке пиже-мазый панжиковдо, валдо ледстнемат.




Азгондят, теке лытагай!


…Валскесь ушодовсь кода свал. Эль кенерсь менелень валдось састыне-састыне совамо вальматнева ды пештямо аксялкстнэнь, Теряй штавтызе лангстонзо кизэнь шождыне вельксэнть, чалгась кияксос ды ютась удалце кудонь вальманть икелев: мезе моли менельсэнть? Мезе полавтовсь? Тень топавтозь, ёрвалдызе шлямкайсэнть чаманзо, нардынзе кедензэ. Оршнесь ды лиссь, панжизе кудокенкшенть, кудыкелев. Саинзе чаво ведратнень ды мартост калдор-кулдор валгсь кузтемпес.

– Шумбрат, маней валске, шумбрат, якстере вановт чилисема! – паро ёжосо, марямга мерсь Теряй атя, мизолдыця чилисеманть якстере сёлмонзо лангс ванозь. Валтнэнь ёвтазь, сыргась пиренть трокс «викториянь» пандятнень юткова яннэванть лисьмалангов.

Таргась ведра ды жойсэ каизе эсензэ ведрас, амольдясь омбоце. Кандтнинзе-совавтнинзе кудыкелев ды кудос ведте пешксе ведратнень. Банянь уштомс кандсь кавто керьметь эчке, беряньстэ лазнозь пенгть, нардынзе голландкасто куловтнень, пештинзе ведте банянь ачеменииця покш кедьгенть. Эзь стувто, варштась кардазовгак – нолдынзе пиринестэст ды очкозост каясь товсюро саразтнэнень.

«Фу, окойники!» – мерсь эськанзо, валскень тевензэ прядозь, атясь. Сон арсекшнесь аламошкас новолемс кузтемпесэ тонадовозь эземнентень. Эзь кенере. Панжовсь пижесэ артозь кудыкельксэнь кенкшесь, ды кенкшалксонть лангс стясь Натуш.

– Тон курок? Стуворось учи, – верде атянзо лангс ванозь, мизолдозь, чевте пельвайгельть тердизе, прясонзо тейсь нулк-нулк, Теряень ярсамо, – кедеть илить стувто ёрвалдомс! Нардамокс нулатне, сапонесь – судот ало, неят.

– Паро, пельсекундань ютазь учок! – ахолдась кедьсэнзэ, серьгедсь Теряй пеедькшнезь, сиземань апак маря. Шлясь-нардась, ютась кузтемпе малас, каинзе пильгстэнзэ колошанзо, тонгсь кудонь карсемкайть ды совась кудос. «Мекс а улемс, а эрямс эрямонзо истямо вадря ёжосо? – кивчк ютась мелесь, Натушонь неезь. – Мекс а улемс истямокс течи, ванды, свал? Уле-арась истямо эрямо косояк?»

Учость Теряй атянь сывель марто пачалксинеть, велькссэ петезь кофе кечине ды Натушонь паневть капста марто чевте прякине. Сон нилинзе верьламбамодо таблетканзо, путсь икелензэ стуворонть лангс конёвлопа, мендизе чирева ды паро мельсэ кундась путозтнень «тевс нолдамо», итьмамо.

Натуш эзь карма атянзо учомо, ярсамонь кирданзо ютавтызе совамодонзо икеле. Ней летьке тенстьсэ ахолясь тей-тов, тенсесь киякс. Кирдемс ваньксчи – те, кода кортыть, верьсэнзэ. Теряй пеедькшнесь тень кувалма лангсонзо: «Тон спиртсэ, спиртсэ ёзык стуворонть, киякс лазтнэньгак куш иезэнзэ весть! Ве эрий бактерия кудонтень а кадови…».

Теряй ярсавсь, шлинзе мельганзо пенчтнень-вакантнэнь, ёвтась азоравантень сюкпря ды лиссь кузтемпес. «Зяро валдо, кенярксчи ушосонть! Иля нузялдо – амоляк!» – лип ютась пачканзо кеняркс раштый ёжо. Айгизе эземненть, ён улезэ озамс. Састыне, атякс, новольсь эйзэнзэ.

Те сонзэ, зярс ушосонть кизэ, зярс эзь кенере чалгамо сёксесь, вечкевикс тарказо. Ваны-арси, мезе тееви-моли менельсэнть, кона ёнов кирдить ки а капшиця ашо, лиясто качамо сэнь пондакш пельтне, мезе полавтовсь эсест ды шабратнень пиресэ. Кодат, мезде ансяк ледстнемат а содавтнесызь! Ледстнемат эйкакшпингедензэ, школасо ды лиясо-косо тонавтнема шкадонзо, кавксть урьвакстозь эрямодонзо, аволь аламо эрязь иетнеде…

Озы, нолдасы прянзо, нежедьсы мештезэнзэ улонзо, конясынзе сельмензэ, ды мекшвелекс совить прязонзо, а учить тердема, арсематне, ледстнематне теде-тонадо. Кодаяк тензэ превс а саеви, мекс моданть лангсо таштавсь зняро авидечиденть, мекс певтеме ламо ды визьксэнь апак сода кенгелить ды теить сонзэ, кенгелеманть, натой эрявикс коекс. Маряви, видечинтень озамо таркинеяк ломантне эзть кадо. Маряви тенст нулгодькс чинев кенгелемась медтеяк тантейкс. Те каня превс саеви? Пазонь кучовксокс ламот пряст ловить, тердить паронь, ансяк паронь тееме – раштыть кежть. Мекс истя, кодамояк логиканень а панжови!

Апак учо совась прязонзо мель: ютамс вирьга. Ледсь мелезэнзэ таркась, косо мелят увсо панжсть ды кецневтекшнизь Теряень валдо-сэнь покш пря баягинетне. Совась вирень латонть алов. Яксесь, вешнесь се тарканть, арсесь вастовомс ёвксонь кондямо мазый сэнь сельме балягиненть марто, талай. Стяко. Эзь муеве. Се мелят ульнесь. Тедеде… Виде, ламот-мезть эрямосонть вастневить ансяк весть! Иля вешне, ютазенть мекев а велявтсак. Тедеде кичиретнень ожосо артынзе шкерьгесь. Эрьвань эсензэ шказо.

Сизесь. Эртевсь вармадо умок сяворезь эчке пичес. Озась. Виресь чатьмонсь. Зяро эзь «стявтне» пилензэ, вейкеяк нармунь эседензэ эзь яволявто. Стувтокшнызе, сынь «яволявтнить» эседест капшазь, кода ломантнеяк, ансяк одшкастост. Ней… Ламот эйстэст уш чикуншка ёнот, ламот тона пелев кирдить ки. Саты, тесэнь кизэст ютась. Сёксесь оно, кадык зярс кекшнезь, чары-тандавтни ожосонзо.

Ваннось перьканзо, кунсолось. Окойники кепедизе вановтонзо вельксканзо капшазь уиця вецана, чопода тюс пельтнес. Сынст тунь а талновты ломантнень ютксо вейсэнь эрямост. Уить ды уить. Мезе тенст эряви, кинь вешнить?

Стясь ды теке янганть, чувтотнень-куракштнень юткова, апак эрязкале сыргась кудов.

Натуш латалдо ливтезь мокшнашка эземненть лангсо ватксесь модамарть, ватксезтнень кайсесь вакссонзо ведте пешксе кастрюлянтень – анокстась ярсамс. Маряви, таго карми човорямо вечкевикс памшамопелензэ – сывелень консерва марто томбазь-чевелязь модамарть. Оршазь авась шождасто, кизэкс, лавтовонзо ланга каязь човине коцтсто ковтыне, прязо штадо. Эно кода лиякс? Ушосонть гай умарьков!

– Косолить зярс? – прянь апак кепеде, тевензэ апак сезе, музгордезь пшкадсь сыця мирденстэнь. Пельдензэ валонь апак учо поладызе теке вешкезь «кортамонзо»: – Азгондят, теке лытагай, тев а муят… Шукшторовтне апак чуролгавто, апак керсе… Монтемень теяк теть а тееви, учат, яла мон, яла мон кундазан…

– Шказо аволь пелевень… – верьга, казямо вайгельсэ мерсь Теряй, истя ёвтазь валсонзо путызе тарказонзо аксун нинзэ, ваксканзо келейстэ эскелязь ютамсто.

– Тонь свал текесь, ансяк шканть таргсемс, – кепедизе прянзо тевстэнзэ, лотказевсь ватксемадояк, серьгедсь мельганзо, ильтизе келейстэ эскелязь ютыця Теряень.

Кузтемпес ды тосто кудос совамсто Теряй мериксэль: «Мон мезе, барщинас прям эцие? Лекстямс а максат! Эли батракокс сиведимик?». Кирдевсь, эзизе нерькста келензэ, оляс эзизе нолда пейтнень экшстэ. Астяко сеедьстэ ледстнесь Пушкинэнь: «Ды иля пелькстне чавола марто…».

Содась цёрась: гувкади толпандя, менельс кирнявтыть толкельтне. Пси карми. Теряй атя од шкастонзо, зяро иеть чадыведекс чудсть – а лововить, ловнокшнось кодамо-бути кулялопасто малав истямо «кортамонь» лувдо покш статья. Эйсэнзэ ледстневсть тувталтнэ, конат ветить истямо «важов- сёвномавтомо» эрямонтень.

Те сёрмадовкстонть кадовсь Терентий Тимофеевичень мельс истямо тев. Кодат-бути мелявкст телень куншкат, маней якшамо чистэ, ветякшнызь сонзэ тескень университетэнь педагогикань кафедрас.

Совась аволь покш нупальс. Икелензэ стуворост экшсэ нувсесть конёвост велькссэ ниле-вете аволь од, аволь сыреяк ават – тонавтыцят. Кода кирдевсь превсэнзэ – эйкакшонь оймень содыцят.

– Шумбрачи! – арсесь совицясь аватненень, лангаст вановтсонзо ютазь.

– Шумбрачи, шумбрачи! – гайгезевсть, пештизь нупаленть, вайгельть.

Аватнестэ, конёвост марто, Терентий Тимофеевичень вановтозо кепедевсь стенатнес. Эйсэст тердсть улемс истямокс, кодат сынь, инекс, модамасторонь келес содавикс педагогтне: Жан-Жак Руссо, Константин Ушинский, Антон Макаренко, Василий Сухомлинский, умонь угрась, мейле мадьярось Януш Корчак… Ютксост – вейкеяк ава! «Ха! Те кода истя? Кода чарькодемс?» – абунгадсь сыцясь.

Инжесь нолдызе прянзо. Валгсь менельстэ масторов: пшкадсь штадо пря, домкасто конёвост велькссэ «майсевиця» аватненень.

– Ёвтынк, энялдан: кить алкуксонь педагогтне? Цёратне, – Теряй невтсь кедьсэнзэ верев, – эли… аватне – тынь?

– Цёратне!!! – вете вайгельть апак тално, сеске серьгедсть вейсэ, пештизь жой вайгельсэст нупаленть. «Вай, авакай! Сынст мезе, тонавтызь истя вейсэ, велувсо сеереме?» – арсезевсь «апак учонь инжесь».

Теряй аймельгадсь, эзь сода, мезе меремс. Теке гамадизь пря ланга. Каня эрси истя?

– Мекс эно кафедрасонк, ванан, илядо покордаво, ансяк ават? Прявтонкак ава, – пшкадсь озадо аштиця тонавтыцятненень, лангозост вановтонзо кайсезь, ды теньсэ совавтынзе аёнчис, визделгавтынзе. Теевсь кашт.

Кода илязо уле, Теряй атя ловсь ды нейгак лови те сценанть-вастовоманть вельть ламодо кортыцякс. Сон корты васняяк теде: эйкакшонть тряст-кастост кавто – цёраломань ды тейтерьава, тетя ды ава, текенекс, ветицякс ютксост улезэ, малав свал, цёрась. Аволь чуросто Теряень содавтнизь Януш Корчаконь, ине педагогонть, валонзо: «Эйкакшт арасть – улеть ломанть».




Весе ушодови эйкакшпингстэ


Умок, пек умок редязь: ули тувтал ды ули эйстэнзэ лисиця поладкс. Те философиянь сыредеяк сыре коесь аравтни-вети тевтнень кода Моданть лангсо, истяня Менельде верьгаяк. Сонзэ виезэ редяви куш кодамо тевсэ-мелявкссо ды куш зярдо. Те коенть эрямостонть а ёртсак, виензэ а тертясыть.

Косто, кодамо юрсто ушодовсь Натушонь обуцязо – эрямс лепштязь пружинакс? Мекс кежтне сонзэ кивчкаить эрьва ёндо ды эрьва мезде? Кодамо, косо тувталось – кирваземс, теке сардыне, а истя, кодаяк чирьстэ ёвтазь валдо, а истя эскельдямодо, озамодо-стямодо эли лиядо-мезде? Мекс? Мекс эрьва штелькскеденть, кона чеменев эскеяк а ашти, гувкаи, теке толкель, сёвномо?

Неть ашожда кевкстнематне а весть сакшность Ёгань Теряень превс, а весть сезнизь удоманзо. Онкстнесь, ловнось, кочксесь, мель путсь чарькодемс сынст эрьва ёндо.

Сась мелезэнзэ Натушонь ёвтнемазо пиже шкадонзо. Сонзэ ульнесть колмо лелянзо. Меельгаст кемнилее иень ютазь авазо кандсь тейтерне. Очконардавкскенть лемдекшнизе Натальнекс. Кассь «покольнезэ» покштнень ютксо вейкине, тетявтомо эйкакшкекс – някинекс. Кудосонть мартонзо эйдень кельсэ кортниця-налксиця ялгине арасель. Ськамонзоль.

Мезе те вейкинесь, кодамокс кепети-касы, Наталень авазо, кода лелянзояк, эзть арсе. Эзть сода, превть эзть яжа ильведькстнэде, конатнеде аволь аламо лиснить вейкинетнень важдамсто-трямсто.

Васенцесь эйстэст – кольневтемась. Зярдо кудосонть, невтемга, колмо эйкакшт, тенст эрявиксэсь (налкшкетне, ярсамопельтне, оршамотне…) явови вейкетьстэ – колмов, зярдо вейке – весе, петнявкскень пес, понгить сонензэ: мезеяк тантейне, вечкевикс, мазыйне налкшке… Понги тензэ, текенекс, седе ламо, аволь кодамояк колмоце эли нилеце пелькске. Мезе веши, кодамо питней, чуросто вастневиця илязо уле, – муема ды путома икелензэ. «Покольнентень» – весе. Эрьва кода савтнить тензэ! Истя кемекстави пакшанть превсэ-седейсэ мелесь: «Весемеде покшось, эрявиксэсь, виевесь, вечкевиксэсь модамасторсонть – мон! Вейкень пес, мезе перькан, – васняяк монень! Лиятнеде, кить перькат, а мезть мелявтомс, стувтыть. Прявтось кудосонть – мон».

Тевтнень, конат теевильть пакшантень, тейсь тарказонзо авазо, эзь кармавто тяканзо, сыргози, тарканзо ацамо, эзь тонавто лиянь мелень ваномо. Эзь чарькоде авась, три истя эсь прянь вечкиця, эрьва челькинеде кежиявтниця, ордакш, натой аксун ломань. «Кода а вечкемс эсь умарнеть!» – марсевсь кургстонзо, яла идесь эсь прянзо. Эзь арсе – колы тень эйсэ умонь пингень превспутоманть: «Вечкть эйкакшот удомстонзо эли зярс кельги путомс эзементь трокс». …

Ламот, секень вант, се шкань эрицятнеде эзизь сода те валмеревксэнтькак: «Вейке эйкакш – а эйкакш, кавто эйкакшт – пельэйкакш, колмо эйкакшт – эйкакш». Неень аватнедеяк, маряви, аволь ламо кить марсизь неть сырнень валтнэнь, содавлизьгак, «някат» авольть чачтне, теевельть истя, кода кортави валмеревкссэнть.

Мезес пачти эйкакшонь сокор вечкемась, Теряйнень шабрань кедьстэ превть кевкстнемс эзь савкшно. Сонензэ содавикс вейкинень важдамось. Покш ды веженсь цёранзо ютксо – кавксо иеть. Лиссь истя: кавксть кавксо, иеть нинзэ марто трясть-кастсть кавто ськамонькай цёрынеть. Васенценть школав туема шкастонзо – уш покш цёрынель – чачсь ялакскезэ Вежай, теяк, ловт, кассь ялгавтомо. Видяй лелянстэнь уш кавксо, сонензэ… Ве кель-вал муемс зняро иень авейкетьчисэ ашождыне. Сестэ Теряйнень эзь чарькодевкшне, одоль, мезе те улемс тетякс содыль аламо, превскак эзь сакшно, кодат тешкскеть кады обуцязост ялгиневтеме касомась, кадык ланга-верьга – кольневтнематне.

Эскелясть иеть… Эрьвань апак неяво, састыне кассь эсензэ, кодамо илязо уле, корозо. Кодат челькеть сынь, неть явовтыця иетне, кадсть уцясказост, Теряй содасы…

Кавксо иеть… Натальне сась модамасторонть лангс веженсь лелянзо чачомадо мейле кемнилее иень ютазь! Юткось покш. Шкатнеяк лиятальть. Секс тейтернесь кенерсь таштамо ськамонькаень обуцянь ёнкстнэде ламоксть ламо.

Теяк: Наталень аванзо коряс Теряй ламодо од, сюпав, кода тетя, содамочисэ, ламо тонавтнесь, ловнось, сёрмадомань вечкиця. Наталень авазо ульнесь сёрмас а содыця велень ломань. Секс кольневтсь «левкскензэ» кода ды мейсэ маштсь, буень апак сода. Теке марто, тиринезэ кадсь тензэ питнейдеяк питней казне – тевень вечкема. Тевтне, асатыкстне войнань ды мельганзо иетнестэ прядо велькскальть. Теяк, кудосонть колмо цёрат. Кие карми лездамо аванстэнь кудонь, кардазонь ды пирень тевтнесэ? А эйкакшост ваномо кие карми?





Конец ознакомительного фрагмента. Получить полную версию книги.


Текст предоставлен ООО «ЛитРес».

Прочитайте эту книгу целиком, купив полную легальную версию (https://www.litres.ru/nuyan-vidyaz/arseman-mon-arseman/) на ЛитРес.

Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.