Аудиокнига - Qızlar söz istəyir

Nurəddin Babayevin yaradıcılığı olduqca çoxşaxəli xarakter daşıyır. Bir sıra əsərləri rus, alman, ingilis, fransız, ispan, polyak, bolqar, macar və s. dillərə tərcümə olunmuşdur. Ədəbi fəaliyyətə 1939-cu ildə başlamış, bundan sonra məqalə, oçerk və hekayələri tez-tez müxtəlif qəzetlərdə dərc edilirdi. Onun ədəbi yaradıcılığında gənclərin təlim-tərbiyəsinə həsr edilmiş əsərləri xüsusilə diqqətə layiq olub, çox qiymətlidir. Nurəddin Babayevin bu kitabları gənclər üçün stolüstü kitab olmaqla yanaşı hər bir zaman, hər bir gənc üçün tərbiyəvi, əxlaqi nəsihətlərlə, vacib və əvəz olunmaz əsl həyat təcrübəsi ilə zəngin xəzinələrdir. Bu əsərlərdən «Oğluma məktublar», «Qızlar söz istəyir», «Qızlar,sözüm sizədir», «İşıq və məhəbbət», «Ürəklər bir olanda» xüsusi diqqətə layiq olub gənc nəsil üçün çox dəyərlidir. Nurəddin Babayevin bu qəbildən əsərləri böyük məna ilə dolğun olub və saf milli tərbiyəvi ruhda yazılmışdır. Bu əsərlərdə ağır həyat anlarında insanın layiqli qərarlar vermək, başını uca tutmaq, vətənə, ailəyə sadiq olmaq kimi məsələlərə toxunulur.